Read Papantla Totonac 2 Reinan 11 Bible Online

2 Reinan 11 - Papantla Totonac bible

2 Reinan 11

¹Ora ku Atalia, mama di Okozias, a mira ku su yu homber tabata morto, el a lanta i a destrui henter e desendensia di rei.

²Ma Josaba, yu muhe di rei Joram, ruman muhe di Okozias, a kohe Joas, yu homber di Okozias, i a sak'e na skondi for di den e yu hombernan di rei ku nan tabata bai mata, i a pone e ku su yaya den e kamber di drumi. Asina nan a skond'e pa Atalia, i e no a wordu mata.

³Asina el a keda skondi ku su yaya den e kas di SENOR seis ana largu, mientras ku Atalia tabata reina riba e tera.

⁴Awor den e di shete ana Joiada a manda buska e kapitannan di shennan di e karitanan i di e guardia, i a trese nan serka dje den e kas di SENOR. E ora ei el a sera un aliansa ku nan i a pone nan bou di huramentu den e kas di SENOR, i a mustra nan rei su yu homber.

⁵I el a ordena nan, bisando: "Asin'aki boso mester hasi: un di tres parti di boso, ku ta subi warda riba dia di sabat i ta tene warda riba e kas di rei

⁶(un di tres parti tambe mester ta na e porta di Shur, i un di tres parti na e porta tras di e guardianan), mester tene warda riba e kas pa defensa.

⁷I dos parti di boso, tur ku ta liber riba dia di sabat, tambe mester tene warda riba e kas di SENOR pa rei.

⁸E ora ei boso mester para ront di rei, kada un ku su armanan den su man; i ken ku drenta e filanan lo wordu mata. I keda serka rei ora ku e ta sali i ora ku e ta drenta."

⁹Asina e kapitannan di shennan a hasi konforme tur loke saserdote Joiada a ordena. I kada un di nan a tuma su hombernan ku mester a subi warda riba dia di sabat, huntu ku esnan ku tabata baha warda riba dia di sabat, i a bin serka saserdote Joiada.

¹⁰I e saserdote a duna e kapitannan di shennan e lansanan i e eskudonan ku tabata di rei David, ku tabata den e kas di SENOR.

¹¹I e guardianan a bai para kada un ku su armanan den su man, for di e banda drechi di e kas te na e banda robes di e kas, banda di e altar i banda di e kas, tur ront di rei.

¹²E ora ei Joiada a trese e yu homber di rei pafo i a pone e korona riba su kabes, i a dun'e e testimonio; i nan a hasie rei i a ungie, i nan a bati man i a bisa: "Biba rei!"

¹³Ora ku Atalia a tende e boroto di e guardia i di e pueblo, el a bin serka e pueblo den e kas di SENOR.

¹⁴I el a wak, i mira, segun e kustumber, rei tabata para banda di e pilar ku e kapitannan i e supladonan di trompet banda di dje; i henter e pueblo di e tera tabata regosiha i supla trompet. E ora ei Atalia a sker su pananan i a grita: "Traishon! Traishon!"

¹⁵I saserdote Joiada a ordena e kapitannan di shennan ku tabata nombra riba e ehersito, i a bisa nan: "Sak'e for di meimei di e filanan, i ken ku siguie, mata esun ei ku spada." Pasobra e saserdote a bisa: "No laga mat'e den e kas di SENOR."

¹⁶Asina nan a gar'e, i ora ku el a yega na e entrada pa kabai na e kas di rei, el a wordu mata ayanan.

¹⁷Despues Joiada a sera un aliansa entre SENOR i e rei i e pueblo, ku nan lo ta e pueblo di SENOR. Tambe el a sera un aliansa entre e rei i e pueblo.

¹⁸I henter e pueblo di e tera a bai na e kas di Baal, i a bash'e abou; su altarnan i su imagennan nan a kibra na pida-pida i a mata Matan, saserdote di Baal, dilanti di e altarnan. I e saserdote a nombra ofisialnan riba e kas di SENOR.

¹⁹Anto el a tuma e kapitannan di shennan, e karitanan i e guardianan i henter e pueblo di e tera; i nan a trese rei for di e kas di SENOR, i a drenta pa e porta di e guardianan bai den e kas di rei. I el a sinta riba trono di e reinan.

²⁰Asina henter e pueblo di e tera a regosiha i e stat tabata trankil. Pasobra nan a mata Atalia ku spada na e kas di rei.

²¹Joas tabatin shete ana dia ku el a bira rei.