Read Papantla Totonac 2 Reinan 12 Bible Online

2 Reinan 12 - Papantla Totonac bible

2 Reinan 12

¹Den e di shete ana di Jehu, Joas a bira rei i el a reina kuarenta ana na Jerusalem; i nomber di su mama tabata Sibia di Beerseba.

²I Joas a hasi bon den bista di SENOR tur e dianan ku saserdote Joiada tabata instruie.

³Solamente e luganan haltu no a wordu kita; ainda e pueblo tabata ofrese sakrifisio i kima sensia riba e luganan haltu.

⁴E ora ei Joas a bisa e saserdotenan: "Tur e plaka di e artikulonan santu ku nan ta trese den e kas di SENOR, na plaka koriente, tantu e plaka ku ta stipula pa kada hende, komo tur e plaka ku kada hende ta propone den su kurason pa trese den e kas di SENOR,

⁵laga e saserdotenan tuma esaki pa nan mes, kada un for di su konosinan; i laga nan drecha e danonan na e kas, na unda ku nan hana kualke dano."

⁶Ma a sosode ku den e di bint'i tres ana di rei Joas, ainda e saserdotenan no a drecha e danonan na e kas.

⁷E ora ei rei Joas a manda yama saserdote Joiada i e otro saserdotenan i a bisa nan: "Pakiko boso no ta drecha e danonan na e kas? Pesei anto, no tuma mas plaka for di boso konosinan, ma paga esaki pa e danonan na e kas."

⁸Asina e saserdotenan a bai di akuerdo ku nan lo no tuma mas plaka for di e pueblo, ni drecha e danonan na e kas.

⁹Ma saserdote Joiada a kohe un kaha i a bora un buraku den su tapa, i a pone esaki banda di e altar, na banda drechi ora bo ta drenta e kas di SENOR; i e saserdotenan ku tabata tene warda na e drempel tabata pone tur e plaka ku a wordu tresi den e kas di SENOR den dje.

¹⁰I ora nan a mira ku tabatin hopi plaka den e kaha, e eskriba di rei i e sumosaserdote a bin mara esaki den sakunan i a konta e plaka ku a wordu hana den e kas di SENOR.

¹¹I nan a entrega e plaka ku nan a pisa den man di esnan ku tabata hasi e trabou, esnan ku tabatin enkargo di e kas di SENOR; i kune nan tabata paga e karpintenan i e trahadonan ku tabata traha riba e kas di SENOR,

¹²i e meslanan i e kapdonan di piedra, i pa kumpra palu i piedra gekap pa drecha e danonan na e kas di SENOR, i pa tur e otro gastunan ku tabatin pa drecha e kas.

¹³Ma ku e plaka ku a wordu tresi den e kas di SENOR nan no a traha kopanan di plata, kosnan-pa-paga-lampi, puncheronan, trompetnan, artikulonan di oro, ni artikulonan di plata, pa e kas di SENOR;

¹⁴pasobra esei nan a duna na esnan ku tabata hasi e trabou, i kune nan a drecha e kas di SENOR.

¹⁵Ademas, nan no tabata pidi e hombernan, na kende nan tabata entrega e plaka pa paga esnan ku tabata hasi e trabou, pa duna kuenta, pasobra nan tabata onesto.

¹⁶Nan no tabata hiba e plaka di e ofrendanan pa kulpa i e plaka pa e ofrendanan pa pika den e kas di SENOR; esaki tabata pa e saserdotenan.

¹⁷E ora ei Hazael, rei di Siria, a bai bringa kontra Gat i a kaptur'e; asina Hazael a propone den su kurason pa bai kontra Jerusalem.

¹⁸I Joas, rei di Juda, a kohe tur e artikulonan santu ku Josafat, Joram i Okozias, su tatanan, reinan di Juda, a dedika, i su mes artikulonan santu i tur e oro ku a wordu hana den e luganan-di-warda-tesoro di e kas di SENOR i di e kas di rei, i a manda nan pa Hazael, rei di Siria. E ora ei el a bai for di Jerusalem.

¹⁹Awor e demas echonan di Joas i tur loke ku el a hasi, nan no ta para skirbi den e Buki di Kronikanan di e reinan di Juda?

²⁰I su sirbidonan a lanta i a traha un komplot, i a mata Joas na e sitadel, ora ku e tabata baha bai Sila.

²¹Pasobra Jozakar, yu homber di Simeat, i Jozabad, yu homber di Somer, su sirbidonan, a dal e mata; i nan a der'e serka su tatanan den e stat di David, i su yu homber Amasias a bira rei na su luga.