Read Papantla Totonac 2 Reinan 13 Bible Online

2 Reinan 13 - Papantla Totonac bible

2 Reinan 13

¹Den e di bint'i tres ana di Joas, yu homber di Okozias, rei di Juda, Joakaz, yu homber di Jehu, a bira rei di Israel na Samaria, i el a reina dieshete ana.

²I el a hasi malu den bista di SENOR, i a sigui e pikanan di Jeroboam, yu homber di Nabat, ku kualnan el a hasi Israel peka; e no a bandona nan.

³Asina e rabia di SENOR a sende kontra Israel, i E tabata entrega nan kontinuamente den man di Hazael, rei di Siria, i den man di Ben-adad, yu homber di Hazael.

⁴Anto Joakaz a roga SENOR, i SENOR a skuch'e; pasobra El a mira e opreshon di Israel, kon rei di Siria tabata oprimi nan.

⁵I SENOR a duna Israel un libertador, asina ku nan a skapa for di man di e sirionan; i e yunan di Israel a biba den nan tentnan manera antes.

⁶Sinembargo, nan no a bandona e pikanan di e kas di Jeroboam, ku kualnan el a hasi Israel peka, ma a kana den nan; i e imagen di Asera tambe a keda para na Samaria.

⁷Pasobra di e ehersito el a laga pa Joakaz no mas ku sinkuenta koredo di kabai, dies garoshi i dies mil solda-na-pia; pasobra rei di Siria a destrui nan i a hasi nan manera stof den tempu di bati mainshi.

⁸Awor e demas echonan di Joakaz i tur loke ku el a hasi i su poder, nan no ta para skirbi den e Buki di Kronikanan di e reinan di Israel?

⁹I Joakaz a bai sosega serka su tatanan i nan a der'e na Samaria; i su yu homber Joas a bira rei na su luga.

¹⁰Den e di trint'i shete ana di Joas, rei di Juda, Joas, yu homber di Joakaz, a bira rei di Israel na Samaria, i a reina dieseis ana.

¹¹I el a hasi malu den bista di SENOR; e no a bandona tur e pikanan di Jeroboam, yu homber di Nabat, ku kualnan el a hasi Israel peka, ma el a kana den nan.

¹²Awor e demas echonan di Joas i tur loke ku el a hasi i su poder ku kual el a bringa kontra Amasias, rei di Juda, nan no ta para skirbi den e Buki di Kronikanan di e reinan di Israel?

¹³Asina Joas a bai sosega serka su tatanan, i Jeroboam a sinta riba su trono; i Joas a wordu dera na Samaria huntu ku e reinan di Israel.

¹⁴Ora Eliseo a bira malu di e malesa ku lo a kousa su morto, Joas, rei di Israel, a bin serka dje i a yor'e i a bisa: "Mi tata, mi tata, e garoshinan di Israel i su koredonan di kabai!"

¹⁵I Eliseo a bis'e: "Kohe un bog i algun flecha." Asina el a kohe un bog i algun flecha.

¹⁶Anto el a bisa rei di Israel: "Pone bo man na e bog." I el a pone su man na dje; e ora ei Eliseo a pone su mannan riba rei su mannan.

¹⁷I el a bisa: "Habri e bentana di pariba," i el a habrie. Anto Eliseo a bisa: "Tira!" I el a tira. I el a bisa: "E flecha di viktoria di SENOR, e flecha di viktoria riba Siria; pasobra lo bo derota e sirionan na Afek te ora bo a destrui nan."

¹⁸E ora ei el a bisa: "Kohe e flechanan," i el a kohe nan. I el a bisa rei di Israel: "Dal riba suela." Anto el a dal tres biaha i a stop.

¹⁹E ora ei e homber di Dios a rabia kune i a bisa: "Bo mester a bati sinku of seis biaha, e ora ei lo bo a dal Siria te ora ku bo a destruie. Ma awor lo bo dal Siria tres biaha so."

²⁰I Eliseo a muri, i nan a der'e. Awor e trupanan di e moabitanan tabatin kustumber di invadi e tera tur ana na e tempu di primavera.

²¹I ora nan tabata dera un homber, ata, nan a mira un trupa di bandido; i nan a tira e homber den e graf di Eliseo. I ora ku e morto a toka ku e wesunan di Eliseo, el a rebiba i a lanta para riba su pia.

²²Awor Hazael, rei di Siria, a oprimi Israel tur e dianan di Joakaz.

²³Ma SENOR a mustra grasia na nan i tabatin kompashon ku nan, i a bolbe serka nan pa motibu di Su aliansa ku Abraham, Isaak i Jakob, i no kier a destrui nan, ni tira nan for di Su presensia te dia djawe.

²⁴Ora Hazael, rei di Siria, a muri, su yu homber Ben-adad a bira rei na su luga.

²⁵E ora ei Joas, yu homber di Joakaz, a bolbe kita for di man di Ben-adad, yu homber di Hazael, e statnan ku esaki a kita den guera for di man di su tata Joakaz. Tres biaha Joas a derot'e i a rekobra e statnan di Israel.