Read Papantla Totonac 2 Reinan 14 Bible Online

2 Reinan 14 - Papantla Totonac bible

2 Reinan 14

¹Den e di dos ana di Joas, yu homber di Joakaz, rei di Israel, Amasias, yu homber di Joas, rei di Juda, a bira rei.

²E tabatin bint'i sinku ana dia ku el a bira rei, i el a reina bint'i nuebe ana na Jerusalem. I nomber di su mama tabata Joadan di Jerusalem.

³I el a hasi bon den bista di SENOR, ounke no manera su tata David; el a hasi konforme tur loke su tata Joas a hasi.

⁴Solamente e luganan haltu no a wordu kita; ainda e pueblo tabata ofrese sakrifisio i kima sensia riba e luganan haltu.

⁵Awor a sosode ku asina ku e reino tabata firme den su man, el a mata su sirbidonan ku a mata su tata, e rei.

⁶Ma e yu hombernan di e matadonan e no a laga mata, konforme loke ta para skirbi den e buki di lei di Moises, manera SENOR a ordena, bisando: "E tatanan no mester wordu mata pa motibu di e yu hombernan, ni e yu hombernan no mester wordu mata pa motibu di e tatanan; ma kada un mester wordu mata pa su mes pika."

⁷El a mata dies mil edomita den e Vaye di Salu i a konkista Sela den bataya, i a yam'e Jokteel te dia djawe.

⁸Anto Amasias a manda mensaheronan serka Joas, yu homber di Joakaz, yu homber di Jehu, rei di Israel, bisando: "Bin, laga nos enfrenta otro."

⁹I Joas, rei di Israel, a manda rospondi pa Amasias, rei di Juda, bisando: "E mata di sumpina ku tabata na Libano a manda rospondi pa e palu di seda ku tabata na Libano, bisando: 'Duna bo yu muhe na mi yu homber komo esposa.' Ma a pasa un bestia di mondi ku tabata na Libano, i esaki a trapa e mata di sumpina.

¹⁰Di berdat bo a derota Edom, i bo kurason a bira orguyoso. Gosa di bo gloria i keda kas; pasobra pakiko lo bo buska problema, asina ku abo lo kai i Juda huntu ku bo?"

¹¹Ma Amasias no kier a tende. Asina Joas, rei di Israel, a bai; i e ku Amasias, rei di Juda, a enfrenta otro na Bet-semes, ku ta pertenese na Juda.

¹²I Juda a wordu derota dor di Israel, i nan a hui bai, kada un pa su tent.

¹³E ora ei Joas, rei di Israel, a kaptura Amasias, rei di Juda, yu homber di Joas, yu homber di Okozias, na Bet-semes, i a bin Jerusalem i a basha e muraya di Jerusalem abou, for di e Porta di Efrain te na e Porta di Skina, kuater shen kodo.

¹⁴I el a kohe tur e oro i plata, i tur e artikulonan-di-uzo ku a wordu hana den e kas di SENOR, i den e luganan-di-warda-tesoro di e kas di rei, i tambe e rehennan, i a bolbe Samaria.

¹⁵Awor e demas echonan di Joas ku el a hasi--su poder i kon el a bringa kontra Amasias, rei di Juda--nan no ta para skirbi den e Buki di Kronikanan di e reinan di Israel?

¹⁶Asina Joas a bai sosega serka su tatanan i a wordu dera na Samaria serka e reinan di Israel; i su yu homber Jeroboam a bira rei na su luga.

¹⁷I Amasias, yu homber di Joas, rei di Juda, a biba diesinku ana despues di morto di Joas, yu homber di Joakaz, rei di Israel.

¹⁸Awor e demas echonan di Amasias, nan no ta para skirbi den e Buki di Kronikanan di e reinan di Juda?

¹⁹I nan a konspira kontra dje na Jerusalem i el a hui bai Lakis; ma nan a laga persiguie te na Lakis i a mat'e ayanan.

²⁰E ora ei nan a tres'e riba kabainan i el a wordu dera na Jerusalem serka su tatanan den e stat di David.

²¹I henter e pueblo di Juda a tuma Azarias, kende tabatin dieseis ana, i a hasie rei na luga di su tata Amasias.

²²El a konstrui Elat i a debolbe esaki na Juda, despues ku rei a bai sosega serka su tatanan.

²³Den e di diesinku ana di Amasias, yu homber di Joas, rei di Juda, Jeroboam, yu homber di Joas, rei di Israel, a bira rei na Samaria i a reina kuarent'i un ana.

²⁴I el a hasi malu den bista di SENOR; e no a bandona tur e pikanan di Jeroboam, yu homber di Nabat, kualnan el a hasi Israel komete.

²⁵El a restora e frontera di Israel for di e entrada di Hamat te na Laman di Araba, konforme e palabra di SENOR, e Dios di Israel, kual El a papia pa medio di Su sirbido Jonas, yu homber di profeta Amitai, kende tabata di Gat-hefer.

²⁶Pasobra SENOR a mira ku e aflikshon di Israel, tabata masha amargo; pasobra no tabatin ni esklabu ni hende liber, i no tabatin ningun yudado pa Israel.

²⁷I SENOR no a bisa ku E lo a kita nomber di Israel for di bou di shelu, ma El a salba nan pa medio di e man di Jeroboam, yu homber di Joas.

²⁸Awor e demas echonan di Jeroboam i tur loke ku el a hasi--su poder, kon el a bringa i kon el a rekobra Damasko i Hamat pa Israel, kualnan tabata pertenese na Juda--nan no ta para skirbi den e Buki di Kronikanan di e reinan di Israel?

²⁹I Jeroboam a bai sosega serka su tatanan, e reinan di Israel, i su yu homber Zakarias a bira rei na su luga.