Read Papantla Totonac 2 Reinan 15 Bible Online

2 Reinan 15 - Papantla Totonac bible

2 Reinan 15

¹Den e di bint'i shete ana di Jeroboam, rei di Israel, Azarias, yu homber di Amasias, rei di Juda, a bira rei.

²E tabatin dieseis ana dia ku el a bira rei, i el a reina sinkuent'i dos ana na Jerusalem; i nomber di su mama tabata Jekolias di Jerusalem.

³I el a hasi bon den bista di SENOR, konforme tur loke su tata Amasias a hasi.

⁴Solamente e luganan haltu no a wordu kita; ainda e pueblo tabata ofrese sakrifisio i kima sensia riba e luganan haltu.

⁵I SENOR a dal rei, asina ku e tabata un leproso te dia di su morto. I e tabata biba den un kas separa, mientras ku Jotam, yu homber di rei, tabatin enkargo di e hendenan di e kas di rei i tabata huzga e hendenan di e tera.

⁶Awor e demas echonan di Azarias i tur loke ku el a hasi, nan no ta para skirbi den e Buki di Kronikanan di e reinan di Juda?

⁷I Azarias a bai sosega serka su tatanan i nan a der'e serka su tatanan den e stat di David, i su yu homber Jotam a bira rei na su luga.

⁸Den e di trint'i ocho ana di Azarias, rei di Juda, Zakarias, yu homber di Jeroboam, a bira rei di Israel na Samaria pa seis luna.

⁹El a hasi malu den bista di SENOR, manera su tatanan a hasi; e no a bandona e pikanan di Jeroboam, yu homber di Nabat, kualnan el a hasi Israel komete.

¹⁰E ora ei Salum, yu homber di Jabes, a konspira kontra dje, a dal e dilanti di e pueblo i a mat'e, i a reina na su luga.

¹¹Awor e demas echonan di Zakarias, mira, nan ta para skirbi den e Buki di Kronikanan di e reinan di Israel.

¹²Esaki ta e palabra di SENOR ku El a papia ku Jehu, bisando: "Bo yu hombernan te na e di kuater generashon lo sinta riba trono di Israel." I asina a sosode.

¹³Salum, yu homber di Jabes, a bira rei den e di trint'i nuebe ana di Uzias, rei di Juda, i el a reina un luna na Samaria.

¹⁴E ora ei Manahem, yu homber di Gadi, a bai for di Tirsa i a yega Samaria, i a dal Salum, yu homber di Jabes, na Samaria, i a mat'e i a bira rei na su luga.

¹⁵Awor e demas echonan di Salum i su komplot ku el a traha, mira, nan ta para skirbi den e Buki di Kronikanan di e reinan di Israel.

¹⁶I for di Tirsa, Manahem a ataka Tifsa i tur esnan ku tabata den dje, i tambe henter e teritorio ront di dje; pasobra nan no a habri porta p'e, pesei el a atak'e. I el a habri tur e muhenan, ku tabata na estado, for di otro.

¹⁷Den e di trint'i nuebe ana di Azarias, rei di Juda, Manahem, yu homber di Gadi, a bira rei di Israel i a reina dies ana na Samaria.

¹⁸I el a hasi malu den bista di SENOR; henter su bida e no a bandona e pikanan di Jeroboam, yu homber di Nabat, kualnan el a hasi Israel komete.

¹⁹Pul, rei di Asiria, a bin kontra e tera, i Manahem a duna Pul mil talento di plata, pa su man por tabata kune pa fortalese e reino bou di su gobernashon.

²⁰E ora ei Manahem a eksigi e plaka for di Israel, for di tur e hombernan poderoso i riku, for di kada homber sinkuenta siklo di plata pa paga rei di Asiria. Asina rei di Asiria a bolbe i no a keda ayanan na e tera.

²¹Awor e demas echonan di Manahem i tur loke ku el a hasi, nan no ta para skirbi den e Buki di Kronikanan di e reinan di Israel?

²²I Manahem a bai sosega serka su tatanan; i su yu homber Pekaia a bira rei na su luga.

²³Den e di sinkuenta ana di Azarias, rei di Juda, Pekaia, yu homber di Manahem, a bira rei di Israel na Samaria i a reina dos ana.

²⁴I el a hasi malu den bista di SENOR; e no a bandona e pikanan di Jeroboam, yu homber di Nabat, kualnan el a hasi Israel komete.

²⁵E ora ei su ofisial Peka, yu homber di Remalias, a konspira kontra dje i a dal e mata na Samaria, den e sitadel di e kas di rei, huntu ku Argob i Arie; i huntu kune tabatin sinkuenta homber di e galaaditanan. Asina Peka a mata Pekaia i a bira rei na su luga.

²⁶Awor e demas echonan di Pekaia i tur loke ku el a hasi, mira, nan ta para skirbi den e Buki di Kronikanan di e reinan di Israel.

²⁷Den e di sinkuent'i dos ana di Azarias, rei di Juda, Peka, yu homber di Remalias, a bira rei di Israel na Samaria, i a reina binti ana.

²⁸I el a hasi malu den bista di SENOR; e no a bandona e pikanan di Jeroboam, yu homber di Nabat, kualnan el a hasi Israel komete.

²⁹Den e dianan di Peka, rei di Israel, Tiglat-pileser, rei di Asiria, a bin kaptura Ijon, Abel-bet-maaka, Janoa, Kedes, Hazor, Galaad i Galilea, henter e tera di Neftali; i el a hiba nan komo katibu na Asiria.

³⁰I Oseas, yu homber di Ela, a traha komplot kontra Peka, yu homber di Remalias, a dal e mata i a bira rei na su luga, den e di binti ana di Jotam, yu homber di Uzias.

³¹Awor e demas echonan di Peka i tur loke ku el a hasi, mira, nan ta para skirbi den e Buki di Kronikanan di e reinan di Israel.

³²Den e di dos ana di Peka, yu homber di Remalias, rei di Israel, Jotam, yu homber di Uzias, rei di Juda, a bira rei.

³³E tabatin bint'i sinku ana dia ku el a bira rei, i el a reina dieseis ana na Jerusalem; i nomber di su mama tabata Jerusa, yu muhe di Zadok.

³⁴I el a hasi bon den bista di SENOR; el a hasi konforme tur loke su tata Uzias a hasi.

³⁵Solamente e luganan haltu no a wordu kita; ainda e pueblo tabata ofrese sakrifisio i kima sensia riba e luganan haltu. El a traha e porta ariba di e kas di SENOR.

³⁶Awor e demas echonan di Jotam i tur loke ku el a hasi, nan no ta para skirbi den e Buki di Kronikanan di e reinan di Juda?

³⁷Den e dianan ei SENOR a kuminsa manda Rezin, rei di Siria, i Peka, yu homber di Remalias, kontra Juda.

³⁸I Jotam a bai sosega serka su tatanan i el a wordu dera serka su tatanan den e stat di su tata David; i su yu homber Akaz a bira rei na su luga.