Read Papantla Totonac 2 Reinan 16 Bible Online

2 Reinan 16 - Papantla Totonac bible

2 Reinan 16

¹Den e di dieshete ana di Peka, yu homber di Remalias, Akaz, yu homber di Jotam, rei di Juda, a bira rei.

²Akaz tabatin binti ana dia ku el a bira rei, i el a reina dieseis ana na Jerusalem; i e no a hasi bon den bista di SENOR su Dios, manera su tata David a hasi.

³Ma el a kana den e kaminda di e reinan di Israel, i asta a hasi su yu homber pasa dor di kandela, konforme e abominashonnan di e nashonnan ku SENOR a kore kune for di dilanti di e yunan di Israel.

⁴I el a ofrese sakrifisio i a kima sensia riba e luganan haltu i riba e serunan, i bou di tur palu berde.

⁵E ora ei Rezin, rei di Siria, i Peka, yu homber di Remalias, rei di Israel, a bin Jerusalem pa hasi guera; i nan a rondona Akaz, ma no por a vens'e.

⁶E tempu ei Rezin, rei di Siria, a bolbe konkista Elat pa Siria, i a saka e hudiunan kompletamente for di Elat; i e sirionan a bin Elat, i a biba ayanan te dia djawe.

⁷Asina Akaz a manda mensaheronan serka Tiglat-pileser, rei di Asiria, bisando: "Mi ta bo sirbido i bo yu homber; bin i librami for di man di rei di Siria, i for di man di rei di Israel, kendenan ta lanta kontra mi."

⁸I Akaz a kohe e plata i e oro ku a wordu hana den e kas di SENOR den e luganan-di-warda-tesoro di e kas di rei, i a manda un regalo pa rei di Asiria.

⁹Asina rei di Asiria a skuch'e; i rei di Asiria a bai kontra Damasko i a kaptur'e, i a hiba su hendenan na Kir den eksilio, i a mata Rezin.

¹⁰Awor rei Akaz a bai Damasko pa kontra ku Tiglat-pileser, rei di Asiria, i a mira e altar ku tabatin na Damasko; i rei Akaz a manda pa saserdote Urias e diseno di e altar ku su plannan detaya pa su konstrukshon.

¹¹Asina saserdote Urias a traha un altar; konforme tur loke rei Akaz a manda for di Damasko, asina saserdote Urias a trah'e, prome ku yegada di rei Akaz for di Damasko.

¹²I ora rei a yega for di Damasko, rei a mira e altar; e ora ei rei a aserka e altar i a subi bai na dje,

¹³i a kima su ofrenda kima i su ofrenda di mainshi, a basha su ofrenda di bibida i a sprengu e sanger di su ofrendanan di pas riba e altar.

¹⁴I e altar di brons ku tabata dilanti di SENOR el a trese for di parti dilanti di e kas, for di entre su altar i e kas di SENOR; i el a pon'e na e banda nort di su altar.

¹⁵E ora ei rei Akaz a ordena saserdote Urias, bisando: "Kima riba e altar grandi e ofrenda kima di mainta ku e ofrenda di mainshi di atardi, e ofrenda kima di rei i su ofrenda di mainshi, i e ofrenda kima di henter e pueblo di e tera ku nan ofrenda di mainshi i nan ofrendanan di bibida; i sprengu riba dje tur e sanger di e ofrenda kima i tur e sanger di e sakrifisio. Ma e altar di brons lo ta pa mi konsulta pa medio di dje."

¹⁶Asina saserdote Urias a hasi konforme tur loke rei Akaz a ordena.

¹⁷E ora ei rei Akaz a korta e rantnan di e basenan afo, i a kita e labamanonan for di nan; tambe el a baha e laman for di riba e bueynan di brons ku tabatin bou di dje, i a pon'e riba un flur di piedra.

¹⁸I e koredor ku nan a traha na e kas pa dia di sabat i e entrada di rei ku tabata mas pafo, el a kita for di e kas di SENOR pa motibu di rei di Asiria.

¹⁹Awor e demas echonan di Akaz ku el a hasi, nan no ta para skirbi den e Buki di Kronikanan di e reinan di Juda?

²⁰Asina Akaz a bai sosega serka su tatanan i el a wordu dera serka su tatanan den e stat di David; i su yu homber Ezekias a reina na su luga.