Read Papantla Totonac 2 Reinan 17 Bible Online

2 Reinan 17 - Papantla Totonac bible

2 Reinan 17

¹Den e di diesdos ana di Akaz, rei di Juda, Oseas, yu homber di Ela, a bira rei riba Israel na Samaria; i el a reina nuebe ana.

²I el a hasi malu den bista di SENOR, ma no manera e reinan di Israel ku tabata prome kune.

³Salmanasar, rei di Asiria, a bin kontra dje, i Oseas a bira su sirbido i a pagu'e tributo.

⁴Ma rei di Asiria a deskubri ku Oseas a konspira kontra dje, pasobra el a manda mensaheronan serka So, rei di Egipto, i no a paga rei di Asiria tributo, manera el a hasi ana tras ana; pesei rei di Asiria a ser'e i a mar'e den prizon.

⁵E ora ei rei di Asiria a invadi henter e tera, a bai Samaria i a rondon'e pa tres ana.

⁶Den e di nuebe ana di Oseas, rei di Asiria a kaptura Samaria i a hiba Israel den eksilio na Asiria, i a pone nan biba na Hala i Habor, banda di Riu Gozan i den e statnan di e medonan.

⁷Awor esaki a sosode, pasobra e yunan di Israel a peka kontra SENOR nan Dios, Kende a saka nan for di tera di Egipto, for di man di Farao, rei di Egipto; i nan a teme otro diosnan

⁸i a kana segun e kustumbernan di e nashonnan ku SENOR a kore ku nan for di dilanti di e yunan di Israel, i segun e kustumbernan ku e reinan di Israel a introdusi.

⁹I na sekreto e yunan di Israel a hasi kosnan ku no tabata korekto kontra SENOR nan Dios. Ademas, nan a traha luganan haltu pa nan mes den tur nan statnan, for di e toren di vigilansia te na e stat fortifika.

¹⁰I nan a lanta pa nan mes pilarnan sagrado i imagennan di Asera riba tur seru haltu i bou di tur palu berde,

¹¹i aya nan a kima sensia riba tur e luganan haltu, manera e nashonnan ku SENOR a hiba den eksilio nan dilanti tabata hasi; i nan a hasi kosnan malu, probokando SENOR.

¹²I nan a sirbi idolonan, di kualnan SENOR a bisa nan: "No hasi e kos aki."

¹³Tog SENOR a spierta Israel i Juda pa medio di tur Su profetanan i tur mirado, bisando: "Bira for di boso mal kamindanan i warda Mi mandamentunan, Mi statutonan, konforme henter e lei ku Mi a ordena boso tatanan, i ku Mi a manda pa boso pa medio di Mi sirbidonan, e profetanan."

¹⁴Sinembargo, nan no a skucha, ma a hasi nan nek steif manera nan tatanan, kendenan no tabata kere den SENOR nan Dios.

¹⁵I nan a rechasa Su statutonan i Su aliansa ku El a sera ku nan tatanan, i Su spiertamentunan ku kualnan El a spierta nan. I nan a sigui tras di banidat i a bira bano, i a bai tras di e nashonnan ku tabatin ront di nan, tokante di kualnan SENOR a ordena nan pa no hasi manera nan.

¹⁶I nan a bandona tur e mandamentunan di SENOR nan Dios i a traha pa nan mes imagennan basha i dos bishe, i a traha un imagen di Asera, i a adora henter e ehersito di shelu i a sirbi Baal.

¹⁷Ademas, nan a hasi nan yu hombernan i nan yu muhenan pasa dor di kandela, i a praktika miramentu di destino i bruheria, i a bende nan mes pa hasi malu den bista di SENOR, pa probok'E.

¹⁸Asina SENOR tabata masha rabia ku Israel i a kita nan for di Su bista; no a keda ni un, sino solamente e tribu di Juda.

¹⁹Juda tampoko no a warda e mandamentunan di SENOR nan Dios, ma a kana den e kustumbernan ku Israel a introdusi.

²⁰I SENOR a rechasa tur e desendientenan di Israel, a afligi nan i a entrega nan den man di sakeado, te ora ku El a tira nan for di Su bista.

²¹Ora ku El a sker Israel kita for di e kas di David, nan a hasi Jeroboam, yu homber di Nabat, rei. E ora ei Jeroboam a hala Israel for di SENOR pa no siguié i a hasi nan komete un pika grandi.

²²I e yunan di Israel a kana den tur e pikanan di Jeroboam ku el a hasi; nan no a bandona nan,

²³te ora SENOR a kita Israel for di Su bista, manera El a papia pa medio di tur Su sirbidonan, e profetanan. Asina Israel a wordu hiba for di nan mes tera pa bai den eksilio na Asiria, te dia djawe.

²⁴I rei di Asiria a trese hende for di Babilonia i for di Kuta, Ava, Hamat i Sefarvaim, i a hasi nan biba den e statnan di Samaria na luga di e yunan di Israel. Asina nan a podera di Samaria i a biba den su statnan.

²⁵I a sosode ku ora nan a kuminsa biba ayanan, nan no tabatin temor pa SENOR; pesei SENOR a manda leon meimei di nan, ku a mata algun di nan.

²⁶Asina nan a papia ku rei di Asiria, bisando: "E nashonnan ku bo a hiba den eksilio na e statnan di Samaria no konose e kustumber di e dios di e tera; pesei El a manda leon meimei di nan, i mira, nan ta mata nan, pasobra nan no konose e kustumber di e dios di e tera."

²⁷E ora ei rei di Asiria a ordena, bisando: "Laga un di e saserdotenan, ku boso a hiba den eksilio, bai biba ayanan atrobe; i lagu'e sina nan e kustumber di e Dios di e tera."

²⁸Asina un di e saserdotenan, ku nan a hiba den eksilio for di Samaria, a bin biba na Bet-el i a sina nan kon nan mester tin temor pa SENOR.

²⁹Ma ainda kada nashon tabata traha diosnan pa su mes i tabata pone nan den e kasnan di e luganan haltu ku e pueblo di Samaria a traha, kada nashon den nan statnan ku nan tabata biba aden.

³⁰I e hombernan di Babilonia a traha Sukot-benot, e hombernan di Kut a traha Nergal, e hombernan di Hamat a traha Asima,

³¹i e aveonan a traha Nibhaz i Tartak; i e sefarvitanan tabata kima nan yunan den kandela pa Adramelek i Anamelek, e diosnan di Sefarvaim.

³²Nan tabatin temor pa SENOR tambe i nan a nombra for di meimei di nan mes saserdotenan pa e luganan haltu, kendenan tabata ofrese sakrifisio pa nan den e kasnan di e luganan haltu.

³³Nan tabatin temor pa SENOR, ma a keda sirbi nan mes diosnan konforme e kustumber di e nashonnan for di meimei di kual nan a wordu hiba den eksilio.

³⁴Te dia djawe nan ta hasi konforme e kustumbernan di antes: nan no tin temor pa SENOR, ni nan no ta sigui nan statutonan ni nan ordenansanan, ni e lei ni e mandamentunan ku SENOR a ordena e yu hombernan di Jakob, kendenan El a yama Israel,

³⁵ku kendenan SENOR a sera un aliansa i a ordena nan, bisando: "Boso no mester tin temor pa otro diosnan, ni buig pa nan, ni sirbi nan, ni ofrese sakrifisio na nan.

³⁶Ma SENOR, Kende a saka boso for di tera di Egipto ku gran poder i ku un brasa ekstendi, pa E boso mester tin temor, i pa E boso mester buig, i na djé boso mester ofrese sakrifisio.

³⁷I e statutonan, e ordenansanan, e lei i e mandamentu, ku El a skirbi pa boso, boso mester perkura pa kumpli ku nan pa semper; i boso no mester tin temor pa otro diosnan.

³⁸I e aliansa ku Mi a sera ku boso, boso no mester lubida, ni boso no mester tin temor pa otro diosnan.

³⁹Ma pa SENOR boso Dios boso mester tin temor; i E lo libra boso for di man di tur boso enemigunan."

⁴⁰Sinembargo, nan no a skucha, ma nan a hasi segun nan kustumber di antes.

⁴¹Asina, mientras ku e nashonnan aki tabata tin temor pa SENOR, nan tabata sirbi nan idolonan tambe; meskos nan yunan i nan nietunan; manera nan tatanan tabata hasi, asina nan ta hasi te dia djawe.