Read Papantla Totonac 2 Reinan 18 Bible Online

2 Reinan 18 - Papantla Totonac bible

2 Reinan 18

¹Awor a sosode ku den e di tres ana di Oseas, yu homber di Ela, rei di Israel, Ezekias, yu homber di Akaz, rei di Juda, a bira rei.

²E tabatin bint'i sinku ana dia ku el a bira rei, i el a reina bint'i nuebe ana na Jerusalem; i nomber di su mama tabata Abi, yu muhe di Zakarias.

³I el a hasi bon den bista di SENOR, konforme tur loke su tata David a hasi.

⁴El a kita e luganan haltu, a kibra e pilarnan sagrado i a kap e imagen di Asera bash'abou. Tambe el a kibra e kolebra di brons ku Moises a traha na pida-pida, pasobra te na e dianan ei e yunan di Israel tabata kima sensia p'e; i nan tabata yam'e Nehustan.

⁵E tabata konfia den SENOR, e Dios di Israel, asina ku despues di dje no tabatin ni un manera e den tur e reinan di Juda, ni den esnan ku tabata prome kune.

⁶Pasobra el a tene duru na SENOR; e no a laga di siguié, ma a warda Su mandamentunan, ku SENOR a ordena Moises.

⁷I SENOR tabata kune; unda ku el a bai, el a prospera. I el a rebeldia kontra rei di Asiria i no a sirbie.

⁸El a derota e filisteonan te na Gaza i su teritorio, for di e toren di vigilansia te na e stat fortifika.

⁹Awor a sosode den e di kuater ana di rei Ezekias, kual tabata e di shete ana di Oseas, yu homber di Ela, rei di Israel, ku Salmanasar, rei di Asiria, a bin kontra Samaria i a rondon'e.

¹⁰I na fin di tres ana nan a kaptur'e; den e di seis ana di Ezekias, i kual tabata e di nuebe ana di Oseas, rei di Israel, Samaria a wordu kaptura.

¹¹E ora ei rei di Asiria a hiba Israel den eksilio na Asiria, i a hiba nan Hala i banda di Habor, e riu di Gozan, i den e statnan di e medonan,

¹²pasobra nan no a obedese e bos di SENOR nan Dios, ma a kibra Su aliansa, asta tur loke Moises, e sirbido di SENOR, a ordena, nan no kier a skucha, ni hasi.

¹³Awor den e di dieskuater ana di rei Ezekias, Senakerib, rei di Asiria, a bin kontra tur e statnan fortifika di Juda i a kaptura nan.

¹⁴E ora ei Ezekias, rei di Juda, a manda rospondi pa rei di Asiria na Lakis, bisando: "Mi a hasi malu. Bai for di mi; kiko ku bo impone riba mi, lo mi karga." Asina rei di Asiria a eksigi di Ezekias, rei di Juda, tres shen talento di plata i trinta talento di oro.

¹⁵I Ezekias a dun'e tur e plata ku a wordu hana den e kas di SENOR, i den e luganan-di-warda-tesoro di e kas di rei.

¹⁶Den e tempu ei Ezekias a kita e oro for di e portanan di e tempel di SENOR, i for di e koseinnan-di-porta ku Ezekias, rei di Juda, a fura ku oro, i a duna rei di Asiria esaki.

¹⁷E ora ei rei di Asiria a manda Tartan, Rabsaris i Rabsakes for di Lakis ku un ehersito grandi serka rei Ezekias na Jerusalem. Asina nan a bai i a yega Jerusalem. I ora nan a bai, nan a yega i a bai para banda di e akuadukto di e tanki ariba, ku ta keda na e kaminda grandi di e Felt di Labado.

¹⁸Ora nan a yama rei, Eliakim, yu homber di Hilkias, kende tabata mayordomo di e kas, Sebna, e eskriba, i Joa, yu homber di Asaf, e registrado, a sali bin serka nan.

¹⁹E ora ei Rabsakes a bisa nan: "Awor bisa Ezekias: 'Asina e gran rei, rei di Asiria, ta bisa: "Riba kiko bo ta basa e konfiansa aki ku bo tin?

²⁰Bo ta bisa (ma esakinan ta solamente palabranan bashi): 'Mi tin konseho i forsa pa guera.' Awor ta den ken bo ta konfia, ku bo a rebeldia kontra mi?

²¹Awor mira, bo ta konfia den e bara di richi machika aki, esta, den Egipto, ku si un hende len riba dje, e ta drenta den su man i ta traspas'e. Asina Farao, rei di Egipto, ta pa tur esnan ku ta konfia den dje.

²²Ma si bo bisami: 'Nos ta konfia den SENOR nos Dios,' no ta E ta Esun, Kende Su luganan haltu i Kende Su altarnan Ezekias a kita, i a bisa Juda i Jerusalem: 'Boso mester adora dilanti di e altar aki na Jerusalem'?

²³"Pesei anto, bin hasi un kombenio ku mi shon, rei di Asiria, i lo mi dunabo dos mil kabai, si abo, di bo banda, por pone koredo riba nan.

²⁴Kon anto bo por resist! un solo ofisial, un di esnan di mas menos di e sirbidonan di mi shon, i konfia den Egipto pa garoshi i pa koredo di kabai?

²⁵Akaso sin e aprobashon di SENOR mi a bin awor kontra e luga aki pa destruie? SENOR a bisami: 'Lanta kontra e tera aki i destruie.

²⁶E ora ei Eliakim, yu homber di Hilkias, Sebna i Joa a bisa Rabsakes: "Papia awor ku bo sirbidonan na arameo, pasobra nos ta komprende esei, i no papia ku nos na lenga hebreo, pa e pueblo ku ta riba muraya no komprende."

²⁷Ma Rabsakes a bisa nan: "Akaso ta serka bo shon i serka abo so mi shon a mandami pa papia e palabranan aki, i no serka e hombernan ku ta sinta riba muraya, kondena pa kome nan mes sushi i bebe nan mes urina huntu ku boso?"

²⁸E ora ei Rabsakes a para grita na bos haltu na lenga hebreo, bisando: "Tende e palabra di e gran rei, rei di Asiria.

²⁹Asina rei ta bisa: 'No laga Ezekias gana boso, pasobra e lo no por libra boso for di mi man;

³⁰ni laga Ezekias hasi boso konfia den SENOR, bisando: "SENOR lo libra nos sigur, i e stat aki lo no wordu entrega den man di rei di Asiria."

³¹'No skucha na Ezekias, pasobra asina rei di Asiria ta bisa: "Hasi pas ku mi i sali bin serka mi, i kada un kome di su mata di wendruif i kada un kome di su palu di figo, i kada un bebe di e awa di su mes rembak,

³²te ora mi bin i hiba boso na un tera manera boso mes tera, un tera di mainshi i bina nobo, un tera di pan i di kunukunan di wendruif, un tera di palunan di oleifi i miel, pa boso biba i no muri." 'Ma no skucha na Ezekias, ora ku e ta gana boso, bisando: "SENOR lo libra nos."

³³Akaso un di e diosnan di e nashonnan a yega di libra su tera for di man di rei di Asiria?

³⁴Unda e diosnan di Hamat i Arfad ta? Unda e diosnan di Sefarvaim, Hena i Iva ta? Nan a libra Samaria for di mi man?

³⁵Ken entre tur e diosnan di e teranan a yega di libra nan tera for di mi man, ku SENOR lo por libra Jerusalem for di mi man?'"

³⁶Ma e pueblo a keda ketu i no a kontest'e ni un palabra, pasobra e ordu di rei tabata: "No kontest'e."

³⁷E ora ei Eliakim, yu homber di Hilkias, kende tabata mayordomo di e kas, i Sebna, e eskriba, i Joa, yu homber di Asaf, e registrado, a sker nan pananan i a bin serka Ezekias, i a kont'e e palabranan di Rabsakes.