Read Papantla Totonac 2 Reinan 19 Bible Online

2 Reinan 19 - Papantla Totonac bible

2 Reinan 19

¹I ora rei Ezekias a tende esaki, el a sker su pananan, a bisti pana-di-saku i a bai den e kas di SENOR.

²Anto el a manda Eliakim, kende tabata mayordomo di e kas, huntu ku Sebna, e eskriba, i e ansianonan di e saserdotenan, bisti na pana-di-saku, serka profeta Isaias, yu homber di Amos.

³I nan a bis'e: "Asina Ezekias ta bisa: 'E dia aki ta un dia di angustia, reprendementu i despresio, pasobra yunan ta serka di nase i no tin forsa pa duna lus.

⁴Podise SENOR bo Dios lo tende tur e palabranan di Rabsakes, kende su shon, rei di Asiria, a manda pa reprocha e Dios bibu, i lo reprende e palabranan ku SENOR bo Dios a tende. Pesei, hasi orashon pa e restante ku a keda.'"

⁵Asina e sirbidonan di rei Ezekias a bin serka Isaias.

⁶I Isaias a bisa nan: "Asina boso mester bisa boso shon: 'Asina SENOR ta bisa: "No laga e palabranan ku bo a tende, ku kualnan e sirbidonan di rei di Asiria a blasfemaMi, spantabo.

⁷Mira, lo Mi pone un spiritu den dje, asina ku e lo tende un rumor i bolbe na su mes tera. I lo Mi hasi ku e lo muri pa medio di spada na su mes tera.

⁸E ora ei Rabsakes a bolbe i a hana rei di Asiria ta bringa kontra Libna, pasobra el a tende ku rei a bai for di Lakis.

⁹Ora ku el a tende nan bisa tokante di Tirhaka, rei di Etiopia: "At'el a sali pa bringa kontra bo," el a bolbe manda mensaheronan serka Ezekias, bisando:

¹⁰"Asina boso mester bisa Ezekias, rei di Juda: 'No laga bo Dios, den Kende bo ta konfia, ganabo, bisando: "Jerusalem lo no wordu entrega den man di rei di Asiria."

¹¹Mira, bo a tende kiko e reinan di Asiria a hasi ku tur e teranan, ku nan a destrui nan kompletamente. Anto abo lo skapa?

¹²Akaso e diosnan di e nashonnan ei, ku mi tatanan a destrui, a libra nan: Gozan, Haran, Resef i e yu hombernan di Eden, ku tabata na Telasar?

¹³Unda rei di Hamat, rei di Arfad, rei di e stat di Sefarvaim, di Hena i di Iva, ta?'"

¹⁴E ora ei Ezekias a tuma e karta for di man di e mensaheronan i a les'e, i el a bai na e kas di SENOR i a pone e karta habri dilanti di SENOR.

¹⁵I Ezekias a hasi orashon dilanti di SENOR i a bisa: "O SENOR, e Dios di Israel, Kende ta sinta riba trono ariba di e kerubinnan, Abo ta e Dios, Abo so, di tur e reinonan di tera. Abo a traha shelu i tera.

¹⁶Inklina Bo orea, O SENOR, i tende; habri Bo wowo, O SENOR, i mira; i skucha e palabranan di Senakerib, ku el a manda pa reprocha e Dios bibu.

¹⁷"Di berdat, O SENOR, e reinan di Asiria a destrui e nashonnan i nan teranan,

¹⁸i a tira nan diosnan den kandela, pasobra nan no tabata dios, sino e obra di man di hende, palu i piedra. Pesei nan a destrui nan.

¹⁹I awor, O SENOR nos Dios, mi ta pidi, libra nos for di su man pa tur reinonan di tera por sa ku Abo so, O SENOR, ta Dios."

²⁰E ora ei Isaias, yu homber di Amos, a manda bisa Ezekias: "Asina SENOR, e Dios di Israel, ta bisa: 'Pasobra bo a hasi orashon na Mi tokante di Senakerib, rei di Asiria, Mi a tendebo.'

²¹Esaki ta e palabra ku SENOR a papia kontra dje: 'El a despresiabo i a hasi bofon di bo, e yu muhe birgen di Sion; el a sakudi su kabes tras di bo lomba, e yu muhe di Jerusalem!

²²Ta ken bo a reprocha i a blasfema? I kontra ken bo a halsa bo bos i a hisa bo wowo wak ku arogansia? Kontra Esun Santu di Israel!

²³Pa medio di bo mensaheronan bo a reprocha Senor, i bo a bisa: "Ku mi hopi garoshinan mi a subi e halturanan di e serunan, te na e partinan di mas aleha den Libano; i mi a kap su palunan di seda di mas haltu i su palunan di sipres di mas miho. I mi a drenta den su luganan di biba di mas leu, den su mondi mas sera.

²⁴Mi a koba pos i a bebe awa na luga stranhero, i ku mi plant'i pia mi a seka tur e riunan di Egipto."

²⁵'Bo no a tende? Hopi tempu pasa Mi a hasi esaki; for di tempunan antiguo Mi a plania esaki. Awor Mi a lagu'e sosode, pa bo hasi statnan fortifika bira montonnan di ruina.

²⁶Pesei nan habitantenan tabata falta forsa; nan a keda desmaya i a wordu brongosa; nan tabata manera e vegetashon den kunuku i manera yerba berde, manera yerba riba dak di kas ta seka prome ku e kaba di krese.

²⁷'Ma Mi sa ora bo ta sinta, ora bo ta sali i ora bo ta drenta; i Mi sa di bo furia kontra Mi.

²⁸Pa motibu di bo furia kontra Mi, i pasobra bo arogansia a yega na Mi orea, pesei lo Mi pone Mi hak den bo nanishi, i Mi frena na bo boka, i lo Mi hasibo bolbe pa e mesun kaminda ku bo a bin.

²⁹'Anto esaki lo ta e senal pa bo: 'E ana aki boso lo kome loke ta nase di su mes, e di dos ana loke ta spreit for di esei; i e di tres ana boso lo sembra, kosecha, planta kunukunan di wendruif i kome nan fruta.

³⁰I e restante di e kas di Juda ku sobrebibi lo bolbe saka rais abou i duna fruta ariba.

³¹Pasobra for di Jerusalem lo sali un restante, i sobrebibientenan for di Seru Sion. E zelo di SENOR lo hasi esaki.

³²'Pesei, asina SENOR ta bisa tokante di rei di Asiria: "E lo no bin na e stat aki, ni tira flecha den dje; tampoko e lo no bin dilanti di dje ku eskudo, ni lanta un baluarte kontra dje.

³³Pa e mesun kaminda ku el a bin, e lo bolbe, i e lo no bin na e stat aki,"' SENOR ta deklara.

³⁴'Pasobra Ami lo defende e stat aki, pa salb'e pa Mi mes kousa i pa kousa di Mi sirbido David.'"

³⁵Anto a sosode ku e anochi ei e angel di SENOR a sali mata shent'i ochent'i sinku mil hende den e kampamentu di e asirionan; i ora ku e hendenan a lanta su manise, ata tur esakinan tabata morto.

³⁶Asina Senakerib, rei di Asiria, a sali i a bai kas i a keda biba na Ninive.

³⁷I a sosode ku mientras e tabata adora den e kas di su dios Nisrok, Adramelek i Sarezer a mat'e ku spada; i nan a hui bai na tera di Ararat. I su yu homber Esarhadon a bira rei na su luga.