Read Papantla Totonac 2 Reinan 2 Bible Online

2 Reinan 2 - Papantla Totonac bible

2 Reinan 2

¹I a sosode ku ora SENOR tabata pa hiba Elias shelu den un warwaru, Elias a bai ku Eliseo for di Gilgal.

²I Elias a bisa Eliseo: "Pa fabor, keda akinan, pasobra SENOR a mandami te na Bet-el." Ma Eliseo a bisa: "Manera SENOR ta biba i manera abo mes ta biba, lo mi no lagabo." Asina nan a baha bai Bet-el.

³E ora ei e yu hombernan di e profetanan ku tabata na Bet-el a sali bai serka Eliseo i a bis'e: "Bo sa ku awe SENOR ta bai kita bo maestro for di bo?" I el a bisa: "Si, mi sa; keda ketu."

⁴I Elias a bis'e: "Eliseo, pa fabor, keda akinan, pasobra SENOR a mandami Jeriko." Ma el a bisa: "Manera SENOR ta biba, i manera abo mes ta biba, lo mi no lagabo." Asina nan a yega Jeriko.

⁵I e yu hombernan di e profetanan ku tabata na Jeriko a aserka Eliseo i a bis'e: "Bo sa ku awe SENOR ta bai kita bo maestro for di bo?" I el a kontesta: "Si, mi sa; keda ketu."

⁶Anto Elias a bis'e: "Pa fabor, keda akinan, pasobra SENOR a mandami Jordan." I el a bisa: "Manera SENOR ta biba, i manera abo mes ta biba, lo mi no lagabo." Asina nan dos a sigui bai.

⁷Awor sinkuenta homber di e yu hombernan di e profetanan a bai i a para na un distansia enfrente di nan, mientras ku nan dos tabata para banda di Jordan.

⁸I Elias a kohe su mantel i a dobl'e i a dal riba e awanan; i esakinan a parti, un parti p'aki i un parti p'aya, asina ku nan dos a krusa riba tera seku.

⁹Awor a sosode ku ora nan a krusa, Elias a bisa Eliseo: "Pidi loke bo kier pa mi hasi pa bo prome ku mi wordu kita for di bo." I Eliseo a bisa: "Pa fabor, laga un dobel porshon di bo spiritu ta riba mi."

¹⁰I Elias a bisa: "Bo a pidi un kos difisil. Sinembargo, si bo mirami ora mi wordu kita for di bo, lo t'asina pa bo; ma si no, lo no t'asina."

¹¹Anto a sosode ku mientras nan tabata kana ta papia, mira, a parese un garoshi di kandela i kabainan di kandela ku a separa nan dos. I Elias a subi bai shelu den un warwaru.

¹²I Eliseo a mira esaki i a sklama: "Mi tata, mi tata, e garoshinan di Israel i su koredonan di kabai!" I e no a mir'e mas. E ora ei el a kohe su mes pananan tene i a sker nan na dos pida.

¹³Tambe el a kohe e mantel di Elias ku a kai for di dje, i a bolbe i a bai para kantu di Jordan.

¹⁴I el a kohe e mantel di Elias ku a kai for di dje, i a dal riba e awanan i a bisa: "Unda SENOR, e Dios di Elias, ta?" I ora ku e tambe a dal riba e awanan, esakinan a parti, un parti p'aki i un parti p'aya; i Eliseo a krusa.

¹⁵Awor ora ku e yu hombernan di e profetanan ku tabata na Jeriko enfrente di dje a mir'e, nan a bisa: "E spiritu di Elias ta riba Eliseo." I nan a bin kontr'e i a buig te na suela su dilanti.

¹⁶I nan a bis'e: "Ata awor, tin sinkuenta homber fuerte huntu ku bo sirbidonan. Pa fabor, laga nan bai buska bo shon; podise e Spiritu di SENOR a his'e i a tir'e riba kualke seru of den kualke vaye." I el a bisa: "No manda nan."

¹⁷Ma ora nan a insist! te ku el a sinti asina un berguensa ku e no por a nenga, el a bisa: "Manda nan." Pesei nan a manda sinkuenta homber; i nan a buska tres dia largu ma nan no a han'e.

¹⁸I nan a bolbe serka Eliseo mientras ku e tabata keda na Jeriko; i el a bisa nan: "Mi no a bisa boso: 'No bai'?"

¹⁹E ora ei e hombernan di e stat a bisa Eliseo: "Mir'aki, e luga na unda e stat aki ta situa ta agradabel, manera mi senor ta mira; ma e awa ta malu, i e tera ta infertil."

²⁰I el a bisa: "Trese un tinashi nobo pa mi, i pone salu den dje." Asina nan a tres'e p'e.

²¹I el a sali bai na e fuente di awa, i a tira salu den dje i a bisa: "Asina SENOR ta bisa: 'Mi a kura e awanan aki; for di dje lo no tin ni morto ni infertilidat mas.'"

²²Asina e awanan a keda kura te dia djawe, konforme e palabra di Eliseo, ku el a papia.

²³Anto for di ayanan el a subi bai Bet-el; i mientras ku e tabata bai riba e kaminda, algun mucha homber a sali for di e stat i a hasi bofon di dje i a bis'e: "Subi, kabes pelon; subi, kabes pelon!"

²⁴Ora ku el a bira wak i a mira nan, el a maldishona nan den e nomber di SENOR. E ora ei dos ber muhe a sali for di e mondinan i a habraka kuarent'i dos di e mucha hombernan.

²⁵I for di ayanan el a bai Seru Karmelo, i for di ayanan el a bolbe bai Samaria.