Read Papantla Totonac 2 Reinan 21 Bible Online

2 Reinan 21 - Papantla Totonac bible

2 Reinan 21

¹Manases tabatin diesdos ana dia ku el a bira rei, i el a reina sinkuent'i sinku ana na Jerusalem; i nomber di su mama tabata Hepsiba.

²I el a hasi malu den bista di SENOR, konforme e abominashonnan di e nashonnan ku SENOR a kita for di dilanti di e yunan di Israel.

³Pasobra el a rekonstrui e luganan haltu ku su tata Ezekias a destrui; i el a lanta altarnan pa Baal i a traha un imagen di Asera, manera Akab, rei di Israel, a hasi, i a adora henter e ehersito di shelu i a sirbi nan.

⁴I el a traha altarnan den e kas di SENOR, di kual SENOR a bisa: "Na Jerusalem lo Mi pone Mi nomber."

⁵Pasobra el a traha altarnan pa henter e ehersito di shelu riba e dos plenchinan di e kas di SENOR.

⁶I el a hasi su yu homber pasa dor di kandela, a hasi bruheria i a uza adivinashon, i a konsulta ku montado i spiritista. El a hasi hopi maldat den bista di SENOR i a probok'E na rabia.

⁷Anto el a pone e imagen graba di Asera ku el a traha den e kas di kual SENOR a bisa David i su yu homber Salomon: "Den e kas aki i na Jerusalem, ku Mi a skohe for di tur e tribunan di Israel, lo Mi pone Mi nomber pa semper.

⁸I lo Mi no hasi e pianan di Israel dwal mas for di e tera ku Mi a duna nan tatanan, kontal ku nan perkura di hasi konforme tur loke Mi a ordena nan, i konforme henter e lei ku Mi sirbido Moises a ordena nan."

⁹Ma nan no a skucha, i Manases a instiga nan pa hasi mas maldat ku e nashonnan ku SENOR a destrui dilanti di e yunan di Israel.

¹⁰Awor SENOR a papia pa medio di Su sirbidonan, e profetanan, bisando:

¹¹"Pasobra Manases, rei di Juda, a hasi e abominashonnan aki, i a hasi mas maldat ku tur e amoreonan ku tabata prome kune, i a hasi Juda tambe peka ku su idolonan,

¹²pesei, asina SENOR, e Dios di Israel, ta bisa: 'Mira, Mi ta trese kalamidat di tal forma riba Jerusalem i Juda, ku ken ku tende di dje, tur dos su oreanan lo fluit.

¹³I lo Mi ekstende riba Jerusalem e lina-di-midi di Samaria i e chumbu-di-midi di e kas di Akab, i lo Mi limpia Jerusalem manera ta limpia un tayo, limpi'e i bir'e bok'abou.

¹⁴I lo Mi bandona e restante di Mi erensia i entrega nan den man di nan enemigunan; i nan lo bira manera proi i botin pa tur nan enemigunan,

¹⁵pasobra nan a hasi malu den Mi bista i a probokaMi na rabia for di dia ku nan tatanan a bin for di Egipto te dia djawe.'"

¹⁶Ademas, Manases a drama masha hopi sanger inosente, te ora ku el a yena Jerusalem di punta pa punta, fuera di su pika ku kual el a hasi Juda peka, dor di hasi malu den bista di SENOR.

¹⁷Awor e demas echonan di Manases i tur loke ku el a hasi i su pika ku el a komete, nan no ta para skirbi den e Buki di Kronikanan di e reinan di Juda?

¹⁸I Manases a bai sosega serka su tatanan i a wordu dera den e hofi di su mes kas, den hofi di Uza; i su yu homber Amon a bira rei na su luga.

¹⁹Amon tabatin bint'i dos ana dia ku el a bira rei, i el a reina dos ana na Jerusalem; i nomber di su mama tabata Mesulemet, yu muhe di Haruz, di Jotba.

²⁰I el a hasi malu den bista di SENOR, manera su tata Manases a hasi.

²¹Pasobra el a kana den henter e kaminda ku su tata a kana, i a sirbi e idolonan ku su tata a sirbi, i a adora nan.

²²Asina el a bandona SENOR, e Dios di su tatanan, i no a kana den e kaminda di SENOR.

²³I e sirbidonan di Amon a konspira kontra dje i a mata rei den su mes kas.

²⁴E ora ei e hendenan di e tera a mata tur esnan ku a konspira kontra rei Amon; i e hendenan di e tera a hasi su yu homber Josias rei na su luga.

²⁵Awor e demas echonan di Amon ku el a hasi, nan no ta para skirbi den e Buki di Kronikanan di e reinan di Juda?

²⁶I el a wordu dera den su graf den e hofi di Uza, i su yu homber Josias a bira rei na su luga.