Read Papantla Totonac 2 Reinan 22 Bible Online

2 Reinan 22 - Papantla Totonac bible

2 Reinan 22

¹Josias tabatin ocho ana dia ku el a bira rei, i el a reina trint'i un ana na Jerusalem; i nomber di su mama tabata Jedida, yu muhe di Adaia, di Bozkat.

²I el a hasi bon den bista di SENOR i a kana den henter e kaminda di su tata David; tampoko e no a desvia ni na man drechi ni na man robes.

³Awor a sosode den e di diesocho ana di rei Josias, ku rei a manda Safan, yu homber di Azalia, yu homber di Mesulam, e eskriba, na e kas di SENOR, bisando:

⁴"Bai serka sumosaserdote Hilkias pa konta e plaka ku a wordu tresi den e kas di SENOR, ku e wardadonan-di-porta a rekohe for di e pueblo.

⁵I laga nan entrega esaki den man di e trahadonan ku tin enkargo di e kas di SENOR, i laga nan duna esaki na e trahadonan ku ta den e kas di SENOR pa drecha e danonan di e kas:

⁶na e karpintenan, e trahadonan den konstrukshon i e meslanan, i pa kumpra palu i piedra gekap pa drecha e kas.

⁷Solamente, no mester pidi nan pa duna kuenta di e plaka entrega den nan man, pasobra nan ta hende onesto."

⁸E ora ei sumosaserdote Hilkias a bisa Safan, e eskriba: "Mi a hana e buki di lei den e kas di SENOR." I Hilkias a duna Safan e buki, i el a les'e.

⁹I Safan, e eskriba, a bin serka rei i a trese rospondi bek pa rei i a bisa: "Bo sirbidonan a saka tur e plaka ku a wordu hana den e kas, i a entregu'e den man di e trahadonan ku tin enkargo di e kas di SENOR."

¹⁰Ademas, Safan, e eskriba, a konta rei, bisando: "Saserdote Hilkias a dunami un buki." I Safan a les'e den presensia di rei.

¹¹I a sosode ku ora rei a tende e palabranan di e buki di lei, el a sker su pananan.

¹²E ora ei rei a ordena saserdote Hilkias, Ahikam, yu homber di Safan, Akbor, yu homber di Mikaias, Safan, e eskriba, i Asaia, sirbido di rei, bisando:

¹³"Bai konsulta ku SENOR pa mi, pa e pueblo i pa henter Juda, tokante di e palabranan di e buki aki ku a wordu hana; pasobra grandi ta e furia di SENOR ku ta kima kontra nos, pasobra nos tatanan no a skucha e palabranan di e buki aki, pa hasi konforme tur loke ta para skirbi tokante di nos."

¹⁴Asina saserdote Hilkias, Ahikam, Akbor, Safan i Asaia a bai serka Hulda, e profeta muhe, esposa di Salum, yu homber di Tikva, yu homber di Harhas, wardado di e kashi-di-warda-pana (awor Hulda tabata biba na Jerusalem den e Di Dos Bario); i nan a papia kune.

¹⁵I el a bisa nan: "Asina SENOR Dios di Israel ta bisa: 'Bisa e homber ku a manda boso serka mi,

¹⁶asina SENOR ta bisa: "Mira, Mi ta trese kalamidat riba e luga aki i riba su habitantenan--tur e palabranan di e buki ku rei di Juda a lesa--

¹⁷pasobra nan a bandonaMi i a kima sensia pa otro diosnan, pa nan probokaMi na rabia ku henter e obra di nan man, pesei Mi furia ta kima kontra e luga aki i lo no wordu paga."'

¹⁸Ma na rei di Juda, kende a manda boso pa konsulta ku SENOR, asina boso mester bis'e: 'Asina SENOR Dios di Israel ta bisa: "Tokante di e palabranan ku bo a tende--

¹⁹pasobra bo kurason tabata suave i bo a umiya bo mes dilanti di SENOR ora bo a tende kiko Mi a papia kontra e luga aki i kontra su habitantenan, ku nan lo bira un desolashon i un maldishon, i pasobra bo a sker bo pananan i a yora Mi dilanti, di berdat, Mi a tendebo," SENOR ta deklara.

²⁰"Pesei, mira, lo Mi reunibo ku bo tatanan, i lo bo wordu poni den bo graf na pas; i bo wowo lo no mira tur e kalamidat ku lo Mi trese riba e luga aki.