Read Papantla Totonac 2 Reinan 24 Bible Online

2 Reinan 24 - Papantla Totonac bible

2 Reinan 24

¹Den su dianan Nabukodonosor, rei di Babilonia, a subi bin, i Joakim a bira su sirbido pa tres ana; despues el a bira i a rebeldia kontra dje.

²I SENOR a manda trupanan di kaldeonan, trupanan di sirionan, trupanan di moabitanan i trupanan di amonitanan kontra dje. Asina El a manda nan kontra Juda pa destruie, konforme e palabra di SENOR ku El a papia pa medio di Su sirbidonan, e profetanan.

³Siguramente, riba ordu di SENOR esaki a pasa ku Juda, pa kita nan for di Su bista pa motibu di e pikanan di Manases, konforme tur loke ku el a hasi,

⁴i tambe pa e sanger inosente ku el a drama, pasobra el a yena Jerusalem ku sanger inosente; i SENOR no kier a pordona.

⁵Awor e demas echonan di Joakim i tur loke ku el a hasi, nan no ta para skirbi den e Buki di Kronikanan di e reinan di Juda?

⁶Asina Joakim a bai sosega serka su tatanan, i su yu homber Joakin a bira rei na su luga.

⁷I rei di Egipto no a sali mas for di su tera, pasobra rei di Babilonia a kohe tur loke tabata pertenese na rei di Egipto, for di e roi di Egipto te na Riu Eufrates.

⁸Joakin tabatin diesocho ana dia ku el a bira rei, i el a reina tres luna na Jerusalem; i nomber di su mama tabata Nehusta, yu muhe di Elnatan di Jerusalem.

⁹I el a hasi malu den bista di SENOR, konforme tur loke su tata a hasi.

¹⁰E tempu ei e sirbidonan di Nabukodonosor, rei di Babilonia, a subi bai Jerusalem, i e stat a keda rondona.

¹¹I Nabukodonosor, rei di Babilonia, a yega na e stat, mientras ku su sirbidonan tabata rondon'e.

¹²I Joakin, rei di Juda, a sali bai serka rei di Babilonia, e ku su mama, su sirbidonan, su kapitannan i su ofisialnan. Asina rei di Babilonia a koh'e komo katibu den e di ocho ana di su reinado.

¹³I for di ayanan el a saka tur e tesoronan di e kas di SENOR, i e tesoronan di e kas di rei, i a korta na pida-pida tur e artikulonan-di-uzo di oro ku Salomon, rei di Israel, a traha den e tempel di SENOR, meskos ku SENOR a bisa.

¹⁴Despues el a hiba den eksilio henter Jerusalem huntu ku tur e kapitannan i tur e hombernan poderoso i balente, dies mil katibu i tur artesano i smet. No a keda ni un, sino solamente e hendenan di mas pober di e tera.

¹⁵Asina el a hiba Joakin den eksilio na Babilonia; tambe mama di rei i rei su esposanan, i su ofisialnan i e hombernan di outoridat di e tera, el a hiba den eksilio for di Jerusalem pa Babilonia.

¹⁶I tur e hombernan balente, shete mil, i e artesanonan i e smetnan, un mil, tur fuerte i prepara pa guera, esakinan rei di Babilonia a hiba den eksilio na Babilonia.

¹⁷E ora ei rei di Babilonia a hasi Matanias, tio di Joakin, rei na su luga, i a kambia su nomber pa Zedekias.

¹⁸Zedekias tabatin bint'i un ana dia ku el a bira rei, i el a reina diesun ana na Jerusalem; i nomber di su mama tabata Hamutal, yu muhe di Jeremias di Libna.

¹⁹I el a hasi malu den bista di SENOR, konforme tur loke Joakim a hasi.

²⁰Pasobra dor di e rabia di SENOR esaki a sosode na Jerusalem i Juda, te ora ku El a tira nan for di Su presensia. I Zedekias a rebeldia kontra rei di Babilonia.