Read Papantla Totonac 2 Reinan 25 Bible Online

2 Reinan 25 - Papantla Totonac bible

2 Reinan 25

¹Awor a sosode ku den e di nuebe ana di su reinado, riba e di dies dia di e di dies luna, Nabukodonosor, rei di Babilonia, a bin, e ku henter su ehersito, kontra Jerusalem, i el a kampa kontra dje i a traha un muraya di atake tur ront di dje.

²Asina e stat a keda rondona te na e di diesun ana di rei Zedekias.

³Riba e di nuebe dia di e di kuater luna e hamber a bira asina pisa den e stat, ku no tabatin kuminda pa e hendenan di e tera.

⁴E ora ei nan a kibra drenta e stat, i tur e hombernan di guera a hui anochi pa e kaminda di e entrada meimei di e dos murayanan banda di e hofi di rei, ounke ku e kaldeonan tabata tur ront di e stat. I nan a bai pa e kaminda di Araba.

⁵Ma e ehersito di e kaldeonan a persigui rei i a alkans'e den e sabananan di Jeriko i henter su ehersito a plama bai for di dje.

⁶Anto nan a kaptura rei i a hib'e serka rei di Babilonia na Ribla, i el a dikta sentensia kontra dje.

⁷I nan a mata e yu hombernan di Zedekias dilanti di su bista; despues nan a saka Zedekias su wowonan, a mar'e ku kadena di brons i a hib'e Babilonia.

⁸Awor riba e di shete dia di e di sinku luna, kual tabata e di diesnuebe ana di rei Nabukodonosor, rei di Babilonia, Nabuzaradan, e kapitan di guardia, un sirbido di rei di Babilonia, a yega Jerusalem.

⁹I el a kima e kas di SENOR, e kas di rei i tur e kasnan na Jerusalem; tur kas importante el a kima ku kandela.

¹⁰Asina henter e ehersito di e kaldeonan, ku tabata huntu ku e kapitan di guardia, a basha e murayanan ront di Jerusalem abou.

¹¹Anto e restu di e hendenan ku a keda den e stat i e desertornan ku a pasa ofer pa rei di Babilonia i e restu di e multitut, Nabuzaradan, e kapitan di guardia, a hiba den eksilio.

¹²Ma e kapitan di guardia a laga algun di esnan di mas pober di e tera pa ta kuidado di e kunukunan di wendruif i pa ta plugdo di e tera.

¹³Awor e pilarnan di brons ku tabatin den e kas di SENOR i e basenan i e laman di brons, ku tabatin den e kas di SENOR, e kaldeonan a kibra na pida-pida, i a hiba e brons na Babilonia.

¹⁴I nan a hiba e weanan, e skopnan, e kosnan-pa-paga-lampi, e kucharanan i tur e artikulonan-di-uzo di brons, ku nan tabata uza den sirbishi di tempel.

¹⁵Tambe e kapitan di guardia a kohe e weanan-pa-kandela i e komchinan, e kosnan ku tabata traha di oro fini i di plata fini, bai kune.

¹⁶E dos pilarnan, e laman, i e basenan ku Salomon a traha pa e kas di SENOR--no tabata posibel pa pisa tur e artikulonan-di-uzo aki.

¹⁷E haltura di esun pilar tabata diesocho kodo, i tabatin un kapitel di brons riba dje; e haltura di e kapitel tabata tres kodo, ku un knopwerk i granatapelnan tur ront riba e kapitel, tur di brons. I e di dos pilar tabata manera esakinan, ku knopwerk.

¹⁸Despues e kapitan di guardia a tuma Seraias, e saserdote prinsipal, i Sofonias, e di dos saserdote, huntu ku e tres wardadonan-di-porta di e tempel.

¹⁹I for di e stat el a tuma un ofisial ku tabatin enkargo di e hombernan di guera, i sinku di rei su konseheronan ku a wordu hana den e stat, e eskriba di e kapitan di ehersito, kende tabata reuni e hendenan di e tera, i sesenta homber di e hendenan di e tera ku a wordu hana den e stat.

²⁰I Nabuzaradan, e kapitan di guardia, a kohe nan hiba serka rei di Babilonia na Ribla.

²¹Anto rei di Babilonia a dal nan mata na Ribla na tera di Hamat. Asina Juda a wordu hiba den eksilio for di su tera.

²²Awor pa loke ta e hendenan ku a ked'atras na tera di Juda, ku Nabukodonosor, rei di Babilonia, a laga atras, el a nombra Gedalias, yu homber di Ahikam, yu homber di Safan, riba nan.

²³Ora tur e kapitannan di e ehersitonan, nan ku nan hombernan, a tende ku rei di Babilonia a nombra Gedalias komo gobernado, nan a bin serka Gedalias na Mizpa, esta, Ismael, yu homber di Netanias, Johanan, yu homber di Karea, Seraias, yu homber di Tanhumet e netofatita, i Jaazanias, yu homber di e maakatita, eseinan huntu ku nan hombernan.

²⁴I Gedalias a hura na nan i na nan hombernan i a bisa nan: "No tene miedu di e sirbidonan di e kaldeonan; biba na e tera i sirbi rei di Babilonia, i lo bai bon ku boso."

²⁵Ma a sosode ku den e di shete luna Ismael, yu homber di Netanias, yu homber di Elisama, di e famia real, a bin ku dies homber i a dal Gedalias mata, i tambe e hudiunan i e kaldeonan ku tabata huntu kune na Mizpa.

²⁶E ora ei henter e pueblo, tantu chikitu komo grandi, i e kapitannan di e ehersitonan a lanta bai Egipto, pasobra nan tabatin miedu di e kaldeonan.

²⁷Awor a sosode ku den e di trint'i shete ana di eksilio di Joakin, rei di Juda, den e di diesdos luna, riba e di bint'i shete dia di luna, Evil-merodak, rei di Babilonia, den e ana ku el a bira rei, a libra Joakin, rei di Juda, for di prizon;

²⁸i el a papia karinosamente kune i a pone su trono mas haltu ku trono di e reinan ku tabata huntu kune na Babilonia.

²⁹I Joakin no a bisti pana di prizon mas, i tabata kome regularmente den presensia di rei tur e dianan di su