Read Papantla Totonac 2 Reinan 3 Bible Online

2 Reinan 3 - Papantla Totonac bible

2 Reinan 3

¹Awor Joram, yu homber di Akab, a bira rei di Israel na Samaria den e di diesocho ana di Josafat, rei di Juda, i a reina diesdos ana.

²I el a hasi malu den bista di SENOR, ounke no manera su tata i su mama; pasobra el a kita e pilar sagrado di Baal ku su tata a traha.

³Sinembargo, el a persist! den e pikanan di Jeroboam, yu homber di Nabat, ku kualnan el a hasi Israel peka; e no a bandona nan.

⁴Awor Mesa, rei di Moab, tabata un kriado di karne, i e tabatin kustumber di paga rei di Israel ku shen mil lamchi i lana di shen mil karne chubatu.

⁵Ma a sosode ku ora Akab a muri, rei di Moab a rebeldia kontra rei di Israel.

⁶I e tempu ei rei Joram a sali for di Samaria i a reuni henter Israel.

⁷E ora ei el a bai i a manda rospondi pa Josafat, rei di Juda, bisando: "Rei di Moab a rebeldia kontra mi. Bo kier ban ku mi pa bringa kontra Moab?" I el a bisa: "Lo mi bai. Ami ta manera abo ta, mi pueblo ta manera bo pueblo, mi kabainan manera bo kabainan."

⁸I el a bisa: "Pa kual kaminda nos mester subi?" I el a kontesta: "Pa e kaminda den desierto di Edom."

⁹Asina rei di Israel a bai huntu ku rei di Juda i rei di Edom; i nan a hasi un buelta di un biahe di shete dia, i no tabatin awa pa e ehersito ni pa e bestianan di kria ku tabata sigui nan.

¹⁰Anto rei di Israel a bisa: "Ai! Pasobra SENOR a yama e tres reinan aki pa entrega nan den man di Moab."

¹¹Ma Josafat a bisa: "No tin profeta di SENOR akinan, pa medio di ken nos por konsulta ku SENOR?" I un di e sirbidonan di rei di Israel a kontesta i a bisa: "Eliseo, yu homber di Safat, t'akinan, kende antes tabata basha awa riba e mannan di Elias."

¹²I Josafat a bisa: "E palabra di SENOR ta kune." Asina rei di Israel i Josafat i rei di Edom a baha bai serka dje.

¹³Awor Eliseo a bisa rei di Israel: "Ki mi tin di hasi ku bo? Bai serka e profetanan di bo tata i serka e profetanan di bo mama." I rei di Israel a bis'e: "No, pasobra SENOR a yama e tres reinan aki huntu pa entrega nan den man di Moab."

¹⁴I Eliseo a bisa: "Manera e SENOR di ehersitonan ta biba, dilanti di Kende mi ta para, si no tabata pa respet pa e presensia di Josafat, rei di Juda, lo mi no a wak bo, ni hasi kaso di bo.

¹⁵Ma trese un tokado di lirio pa mi awor." I a sosode ku ora e tokado di lirio tabata toka, e man di SENOR a baha riba dje.

¹⁶I el a bisa: "Asina SENOR ta bisa: 'Yena e vaye aki ku roi.'

¹⁷Pasobra asina SENOR ta bisa: 'Boso lo no mira bientu, ni boso lo no mira awaseru; tog e vaye ei lo yena ku awa, asina ku boso lo bebe, tantu boso komo boso bestianan di kria i boso otro bestianan.

¹⁸I esaki ta un kos chikitu asina den bista di SENOR; E lo entrega e moabitanan tambe den boso man.

¹⁹Anto boso mester destrui tur stat fortifika i tur stat skohi, i kap tur bon palu i dempel tur fuente di awa, i dana tur pida bon tera ku piedra.'"

²⁰I a sosode ku part'i mainta, na ora di ofrese sakrifisio, mira, a bin awa for di direkshon di Edom, i e tera a yena ku awa.

²¹Awor e moabitanan tur a tende ku e reinan a bin pa bringa kontra nan. I nan a manda yama tur esnan ku por a bisti armadura i tambe esnan mas bieu; i nan a bai para na frontera.

²²I nan a lanta mainta tempran, i solo tabata briya riba e awa, i e moabitanan a mira e awa nan dilanti kora manera sanger.

²³E ora ei nan a bisa: "Esaki ta sanger; sigur e reinan a bringa ku otro, i nan a mata otro. Awor anto, Moab, ban kohe botin!"

²⁴Ma ora nan a yega na e kampamentu di Israel, e israelitanan a lanta i a mata e moabitanan, asina ku nan a hui nan dilanti; i nan a sigui bai te den e tera, matando e moabitanan.

²⁵Asina nan a destrui e statnan; i kada un a tira un piedra riba kada pida bon tera te ora ku el a yena. Asina nan a dempel tur e fuentenan di awa i a kap tur bon palu, te ora na Kir-hareset nan a laga solamente su piedranan; sinembargo, esnan ku tabata tira piedra ku slenger a pasa ront di dje i a destruie.

²⁶Ora rei di Moab a mira ku e bataya tabata muchu fuerte p'e, el a hiba shete shen homber ku tabata saka spada huntu kune, pa pasa yega na rei di Edom, ma nan no tabata por.

²⁷E ora ei el a kohe su yu homber mayo ku mester a reina na su luga, i a ofres'e komo un ofrenda kima riba e muraya. I un furia grandi a lanta kontra Israel, i nan a bai lagu'e i a bolbe nan mes tera.