Read Papantla Totonac 2 Reinan 4 Bible Online

2 Reinan 4 - Papantla Totonac bible

2 Reinan 4

¹Awor un muhe di e esposanan di e yu hombernan di e profetanan a sklama na Eliseo: "Bo sirbido, mi esposo, a muri, i bo sa ku bo sirbido tabata teme SENOR; i e hende ku mi debe a bin pa kohe mi dos yu hombernan pa ta su esklabu."

²I Eliseo a bis'e: "Kiko mi por hasi pa bo? Bisami, kiko bo tin den kas?" I e muhe a bisa: "Bo sirbiente no tin nada den kas sino solamente un butishi di zeta."

³E ora ei el a bisa: "Bai, fia butishi na kantidat pa bo mes serka tur bo bisinanan, butishi bashi; no buska djis un par so.

⁴I bo mester drenta paden i sera porta bo tras i tras di bo yu hombernan, i yena tur e butishinan aki; i bo mester pone loke ta yen un banda."

⁵Asina el a bai laga Eliseo i a sera porta su tras i tras di su yu hombernan; nan tabata trese e butishinan p'e i e tabata yena nan.

⁶I a sosode ku ora e butishinan tabata yen, el a bisa su yu homber: "Trese un butishi mas pa mi." I el a bis'e: "No tin ni un butishi mas." I e zeta a stop di basha.

⁷E ora ei el a bai konta e homber di Dios. I el a bisa: "Bai, bende e zeta i paga bo debe, i abo i bo yu hombernan por biba di e sobra."

⁸Awor riba un bon dia Eliseo a bai Sunem, kaminda tabatin un muhe masha konosi, i e muhe a insisti pa e keda kome. I tabata asina ku ki ora ku e pasa e tabata bai ayanan pa kome.

⁹I el a bisa su esposo: "Mir'aki, mi ta ripara ku e homber aki, ku ta pasa tur ora serka nos, ta un homber santu di Dios.

¹⁰Pa fabor, laga nos traha un kamber chikitu ariba; i pone den dje un kama, un mesa, un stul i un kandela p'e, pa ora ku e bin serka nos, e por keda eiden."

¹¹Un dia el a bin einan i a keda den e kamber ariba i a bai sosega.

¹²E ora ei el a bisa su sirbido Gehazi: "Yama e sunamita aki." I ora ku el a yam'e, el a bin para su dilanti.

¹³I Eliseo a bisa Gehazi: "Bis'e awor: 'Mira, bo a perkura asina bon pa nos; kiko mi por hasi pa bo? Bo kier pa mi papia ku rei of ku e kapitan di ehersito pa bo?'" I el a kontesta: "Mi ta biba meimei di mi mes hendenan."

¹⁴Anto Eliseo a bisa: "Kiko anto por wordu hasi p'e?" I Gehazi a kontesta: "Di berdat, e no tin ningun yu homber, i su esposo ta bieu."

¹⁵I Eliseo a bisa: "Yam'e." Ora ku el a yam'e, el a bin para den porta.

¹⁶E ora ei el a bisa: "Otro ana na e temporada aki lo bo brasa un yu homber." I el a bisa: "No, mi senor, O homber di Dios, no gana bo sirbiente."

¹⁷I e muhe a konsebi i a duna lus na un yu homber e siguiente ana na e temporada ei, manera Eliseo a bis'e.

¹⁸Ora ku e mucha a bira grandi, el a bai riba un dia serka su tata, serka e kosechadonan.

¹⁹I el a bisa su tata: "Mi kabes, mi kabes!" I e tata a bisa su sirbido: "Kargu'e hiba pa su mama."

²⁰Ora ku el a his'e i a hib'e pa su mama, el a keda sinta den skochi di su mama te merdia, i e ora ei el a muri.

²¹E ora ei e mama a bai ariba i a pon'e riba kama di e homber di Dios, a sera e porta su tras, i a sali bai pafo.

²²Despues el a yama su esposo i a bisa: "Pa fabor, manda un di e sirbidonan pa mi i un di e burikunan, pa mi kore bai serka e homber di Dios, i bin bek."

²³I su esposo a bisa: "Pakiko bo kier bai serka dje awe? No ta ni luna nobo ni sabat." I e muhe a bisa: "Tur kos ta bon."

²⁴E ora ei e muhe a siya un buriku i a bisa su sirbido: "Dal bai; no baha velosidat pa mi sin ku ami bisabo."

²⁵Asina el a bai i a yega serka e homber di Dios na Seru Karmelo. I a sosode ku ora e homber di Dios a mir'e djaleu, el a bisa su sirbido Gehazi: "At'e sunamita!

²⁶Pa fabor, kore bai kontr'e i bis'e: 'Tur kos ta bon ku bo? Tur kos ta bon ku bo esposo? Tur kos ta bon ku e mucha?'" I el a kontesta: "Tur kos ta bon."

²⁷Ora ku el a yega na e seru serka e homber di Dios, el a kohe su pia tene. I Gehazi a yega serka pa push'e un banda, ma e homber di Dios a bisa: "Lagu'e na pas, pasobra e tin angustia den su alma; i SENOR a tene esaki skondi pa mi i no a bisami."

²⁸E ora ei e muhe a bisa: "Ta ami a pidi mi senor un yu homber? Mi no a bisa: 'No ganami'?"

²⁹Anto Eliseo a bisa Gehazi: "Faha bo hep, kohe mi garoti den bo man, i kohe bo kaminda bai; si bo topa un hende, no salud'e, i si kualkier hende saludabo, no kontest'e; i pone mi garoti riba e mucha su kara."

³⁰I mama di e mucha a bisa: "Manera SENOR ta biba i manera bo mes ta biba, mi no ta bai sin bo." I Eliseo a lanta i a siguie.

³¹E ora ei Gehazi a bai nan dilanti i a pone e garoti riba e mucha su kara, ma no tabatin ni zonidu, ni senal di bida. Asina el a bai bek pa kontra ku Eliseo i a bis'e: "E mucha no a spierta."

³²Ora ku Eliseo a drenta e kas, mira, e mucha tabata drum! morto riba su kama.

³³Asina el a drenta i a sera e porta tras di nan dos, i a hasi orashon na SENOR.

³⁴I el a bai ariba i a drumi riba e mucha, i a pone su boka riba su boka, su wowonan riba su wowonan i su mannan riba su mannan, i el a rek su mes riba dje; i e mucha su kurpa a bira kayente.

³⁵Despues el a bolbe bai i a kana un biaha bai-bin den e kas, i a bai ariba i a rek su mes riba dje; i e mucha a nister shete biaha i a habri wowo.

³⁶I e homber di Dios a yama Gehazi i a bisa: "Yama e sunamita aki." Asina Gehazi a yama e sunamita. I ora ku el a yega serka dje, el a bisa: "Hisa bo yu."

³⁷E ora ei el a drenta i a tira su kurpa abou na pia di Eliseo i a buig te na suela; i el a hisa su yu homber i a sali bai.

³⁸Ora ku Eliseo a bolbe Gilgal, tabatin un hamber na e tera. Mientras ku e yu hombernan di e profetanan tabata sinta su dilanti, el a bisa su sirbido: "Pone e wea grandi na kandela i kushina stoba pa e yu hombernan di e profetanan."

³⁹E ora ei un hende a sali bai den kunuku pa kohe yerbanan; i el a hana un mata shimaron ku ta rama, i a yena su saya yen di kalbas shimaron, a bin i a korta nan pone den e wea di stoba, maske nan no tabata sa kiko nan tabata.

⁴⁰Asina nan a saka kuminda pa e hombernan kome. I a sosode ku ora nan tabata kome e stoba, nan a grita i a bisa: "Ai, homber di Dios, tin morto den e wea!" I nan no por a kome.

⁴¹Ma el a bisa: "Awor trese harina." I el a tira esei den e wea, i el a bisa: "Saka kuminda pa e hendenan kome." E ora ei no tabatin nada malu mas den e wea.

⁴²Awor a bin un homber for di Baal-salisa, i el a trese pan di e prome frutanan, binti pan di puspas i tapushi di mainshi fresku den su saku, pa e homber di Dios. I el a bisa: "Duna e hendenan pa nan kome."

⁴³I su sirbido a bisa: "Kiko? Mi mester parti esaki pa shen homber?" Ma el a bisa: "Duna e hendenan pa nan kome, pasobra asina SENOR ta bisa: 'Nan lo kome te sobra.'"

⁴⁴Asina el a pon'e nan dilanti; i nan a kome te sobra, konforme e palabra di SENOR.