Read Papantla Totonac 2 Reinan 5 Bible Online

2 Reinan 5 - Papantla Totonac bible

2 Reinan 5

¹Awor Naaman, kapitan di e ehersito di rei di Siria, tabata un gran homber den bista di su shon i masha respeta, pasobra pa medio di dje SENOR a duna viktoria na Siria. Tambe e homber tabata un guerero balente, ma e tabata un leproso.

²Awor e sirionan a sali den trupanan, i a kohe un mucha muhe chikitu di tera di Israel komo katibu; i e tabata sirbi Naaman su esposa.

³I e mucha muhe a bisa Naaman su esposa: "Mara mi shon Naaman tabata serka e profeta ku ta na Samaria! E ora ei e lo a kur'e di su lepra."

⁴I Naaman a bai serka su shon i a kont'e, bisando: "Tal i tal kos e mucha muhe ku ta di tera di Israel a bisa."

⁵E ora ei rei di Siria a bisa: "Bai anto, i lo mi manda un karta pa rei di Israel." I el a bai i a hiba kune dies talento di plata i seis mil siklo di oro i dies set di pana pa kambia.

⁶I el a hiba e karta pa rei di Israel, bisando: "I awor, ora ku e karta aki yega serka bo, mira, mi a manda mi sirbido Naaman serka bo, pa bo kur'e di su lepra."

⁷I a sosode ku ora rei di Israel a lesa e karta, el a sker su pananan i a bisa: "Ta ami ta Dios anto, pa mata i hasi biba atrobe, ku e homber aki ta manda rospondi pa mi pa kura un homber di su lepra? Ma paga tino awor, i mira kon e ta buska un pleitu ku mi."

⁸I a sosode ku ora Eliseo, e homber di Dios, a tende ku rei di Israel a sker su pananan, el a manda rospondi pa rei, bisando: "Pakiko bo a sker bo pananan? Lagu'e bin serka mi, i e lo sa ku tin un profeta na Israel."

⁹Asina Naaman a yega ku su kabainan i su garoshinan, i a para na porta di e kas di Eliseo.

¹⁰I Eliseo a manda un mensahero serka dje, bisando: "Bai i bana shete biaha den Jordan, i bo kueru lo wordu kura i lo bo ta limpi."

¹¹Ma Naaman a bira furioso i a bai i a bisa: "Mira, mi a pensa: 'Siguramente lo e sali bin serka mi, i para invoka e nomber di SENOR su Dios, pasa su man ofer di e luga, i kura e lepra.'

¹²Abana i Farfar, e riunan di Damasko, no ta miho ku tur e awanan di Israel? Mi no por a bana den nan i bira limpi?" Asina el a bira bai masha rabia mes.

¹³E ora ei su sirbidonan a hala serka i a bis'e: "Mi tata, si e profeta a bisabo hasi un kos grandi, lo bo no a hasie? Kuantu mas anto ora e bisabo: 'Bana, i bira limpi'?"

¹⁴Asina el a baha bai i a sambuya shete biaha den Jordan, konforme e palabra di e homber di Dios; i su kueru a wordu kura i a bira manera di un mucha chikitu, i el a bira limpi.

¹⁵Anto el a bai bek serka e homber di Dios, e ku tur esnan ku tabata huntu kune; i el a bin para su dilanti, i a bisa: "Mira, mi sa ku no tin ningun Dios den henter mundu, sino solamente na Israel; pesei, pa fabor, asepta un regalo di bo sirbido awor."

¹⁶Ma el a bisa: "Manera SENOR ta biba, dilanti di Kende mi ta para, lo mi no tuma nada." I Naaman a insist! pa e tum'e, ma Eliseo a nenga.

¹⁷I Naaman a bisa: "Si no, pa fabor, laga nan duna bo sirbido a lo menos un karga di tera di e kantidat ku dos mula por karga; pasobra bo sirbido lo no ofrese ofrenda kima mas, ni e lo no ofrese sakrifisio na otro diosnan, sino solamente na SENOR.

¹⁸Ku SENOR pordona bo sirbido den e asunto aki: ora mi shon ta bai den kas di Rimon pa adora ayanan, i e ta len riba mi man i ami ta buig den kas di Rimon, ora mi ta buig den kas di Rimon, ku SENOR pordona bo sirbido den e asunto aki."

¹⁹I el a bis'e: "Bai na pas." Asina el a bai un distansia for di dje.

²⁰Ma Gehazi, sirbido di Eliseo, e homber di Dios, a pensa: "Mira, mi shon a spar e sirio Naaman aki dor di no asepta for di su man loke ku el a trese. Manera SENOR ta biba, lo mi kore bai su tras i tuma algu for di dje."

²¹Asina Gehazi a kore bai tras di Naaman. Ora Naaman a mira un hende ta kore bin su tras, el a baha for di e garoshi pa bin kontr'e i a puntra: "Tur kos ta bon?"

²²I Gehazi a bisa: "Tur kos ta bon. Mi shon a mandami, bisando: 'Mira, dos hoben di e yu hombernan di e profetanan a kaba di yega serka mi for di e serunan di Efrain. Pa fabor, duna nan un talento di plata i dos set di pana pa kambia.'"

²³I Naaman a bisa: "Sea asina bon di tuma dos talento." I el a insist!, i a mara dos talento di plata den dos saku ku dos set di pana pa kambia, i a duna nan na dos di su sirbidonan; i nan a karga nan Gehazi su dilanti.

²⁴Ora Gehazi a yega na e seru, el a tuma nan for di nan man i a pone nan den kas, i el a manda e hombernan bai, i nan a bai.

²⁵E ora ei el a drenta paden i a bai para dilanti di su shon. I Eliseo a bis'e: "Unda bo tabata, Gehazi?" I el a bisa: "Bo sirbido no a bai ningun kaminda."

²⁶E ora ei Eliseo a bis'e: "No t'asina ku mi kurason a bai ku bo ora ku e homber a baha for di su garoshi bira bin kontrabo? Ta tempu awor pa risibi plaka i pa risibi pana i kunuku di oleifi, kunuku di wendruif, karne, buey i sirbidonan homber i muhe?

²⁷Pesei, e lepra di Naaman lo pega na bo i na bo desendientenan pa semper." Asina el a sali for di su presensia, un leproso, blanku manera sneu.