Read Papantla Totonac 2 Reinan 6 Bible Online

2 Reinan 6 - Papantla Totonac bible

2 Reinan 6

¹Awor e yu hombernan di e profetanan a bisa Eliseo: "Mira, e luga bo dilanti kaminda nos ta biba ta muchu perta pa nos.

²Pa fabor, laga nos bai Jordan, i kada un di nos kohe un balki for di ayanan; i laga nos traha ayanan un luga pa nos mes, kaminda nos por biba." I el a bisa: "Bai numa."

³Anto un a bisa: "Sea asina bon di bai ku bo sirbidonan." I el a kontesta: "Mi ta bai."

⁴Asina el a bai ku nan; i ora nan a yega Jordan, nan a kap palu.

⁵Ma ora ku un di nan tabata korta un balki, kabes di e hacha a kai den awa; i el a dal un gritu i a bisa: "Ai, mi shon! Anto ta fia e ta!"

⁶E ora ei e homber di Dios a bisa: "Unda el a kai?" I ora ku el a mustr'e e luga, el a korta pida palu, i a tir'e ayanan, i el a hasi e heru drif.

⁷I el a bisa: "Koh'e." Asina el a saka su man i a koh'e.

⁸Awor rei di Siria tabata hasi guera kontra Israel; i el a konsulta ku su sirbidonan, bisando: "Na tal i tal luga mi kampamentu lo ta."

⁹I e homber di Dios a manda rospondi pa rei di Israel, bisando: "Tene kuidou pa bo no pasa e luga aki, pasobra e sirionan ta baha bai ayanan."

¹⁰I rei di Israel a manda hende na e luga di kual e homber di Dios a kont'e; asina el a avis'e, di manera ku el a proteha su mes ayanan mas ku un of dos biaha.

¹¹Awor kurason di rei di Siria tabata furioso tokante di e kos aki; i el a yama su sirbidonan i a bisa nan: "Boso por bisami ken di nos ta na fabor di rei di Israel?"

¹²I un di su sirbidonan a bisa: "No, senor mi rei; ma Eliseo, e profeta ku ta na Israel, ta konta rei di Israel e palabranan ku bo ta papia den bo kamber di drumi."

¹³Pesei el a bisa: "Bai i wak unda e ta, pa mi manda koh'e prezo." I nan a bis'e: "Mira, e ta na Dotan."

¹⁴I el a manda kabai, garoshi i un ehersito grandi ayanan, i nan a yega anochi i a rondona e stat.

¹⁵Awor ora ku e sirbido di e homber di Dios a lanta mainta tempran i a sali bai pafo, mira, un ehersito ku kabai i garoshi tabata rondona e stat. I su sirbido a bis'e: "Ai, mi shon! Kiko nos lo hasi?"

¹⁶Asina el a kontesta: "No tene miedu, pasobra esnan ku ta ku nos ta mas ku esnan ku ta ku nan."

¹⁷E ora ei Eliseo a hasi orashon i a bisa: "O SENOR, mi ta pidiBo, habri su wowo pa e mira." I SENOR a habri wowo di e sirbido i el a mira, i at'e seru tabata yen di kabai i garoshi di kandela tur ront di Eliseo.

¹⁸I ora ku e sirionan a baha bin serka dje, Eliseo a hasi orashon na SENOR i a bisa: "Dal e hendenan aki ku sieguedat, mi ta pidiBo." Asina El a dal nan ku sieguedat konforme e palabra di Eliseo.

¹⁹E ora ei Eliseo a bisa nan: "Esaki no ta e kaminda, ni esaki no ta e stat; siguimi i lo mi hiba boso serka e homber ku boso ta buska." I el a hiba nan Samaria.

²⁰I a sosode ku ora nan a yega Samaria, Eliseo a bisa: "O SENOR, habri wowo di e hombernan aki, pa nan mira." Asina SENOR a habri nan wowo, i nan a mira; i ata nan tabata meimei di Samaria.

²¹Anto ora rei di Israel a mira nan, el a bisa Eliseo: "Mi tata, mi mester mata nan? Mi mester mata nan?"

²²I el a kontesta: "No mata nan. Bo kier mata esnan ku bo a kohe komo katibu ku bo spada i ku bo bog? Pone pan i awa nan dilanti, pa nan kome i bebe i bolbe serka nan shon."

²³Asina el a prepara un fiesta grandi pa nan; i despues ku nan a kome i bebe, el a manda nan bai, i nan a bai serka nan shon. I e trupanan di bandido di Siria no a bin tera di Israel mas.

²⁴Awor a sosode ku despues di esaki Ben-adad, rei di Siria, a reuni henter su ehersito i a bai rondona Samaria.

²⁵I tabatin un hamber pisa na Samaria; i mira, nan a rondon'e te ora ku un kabes di buriku tabata wordu bendi pa ochenta siklo di plata, i un kuartu pinchi di mest di palomba pa sinku siklo di plata.

²⁶I ora rei di Israel tabata pasa riba e muraya, un muhe a sklama na dje, bisando: "Yudami, O senor, mi rei!"

²⁷I el a bisa: "Si SENOR no yudabo, for di unda ami por buska yudansa pa bo? For di e plenchi-di-bati-mainshi of for di e baki-di-pers-wendruif?"

²⁸I rei a bis'e: "Ta kiko ta pasa ku bo?" I e muhe a kontesta: "E muhe aki a bisami: 'Duna bo yu homber pa nos kom'e awe, i manan nos lo kome mi yu homber.'

²⁹Asina nos a herebe mi yu homber i a kom'e; i su manise mi a bis'e: 'Duna bo yu homber pa nos kom'e'; ma el a skonde su yu."

³⁰I a sosode ku ora rei a tende e palabranan di e muhe, el a sker su pananan--awor e tabata pasa riba e muraya--i e pueblo a wak, i mira, bou di su pana na su kurpa, e tabatin pana-di-saku bisti.

³¹Anto el a bisa: "Ku Dios hasi asina ku mi i pio ainda, si kabes di Eliseo, yu homber di Safat, keda na su kurpa awe."

³²Awor Eliseo tabata sinta den su kas, i e ansianonan tabata sinta serka dje. I rei a manda un homber bai su dilanti; ma prome ku e mensahero a yega serka dje, Eliseo a bisa e ansianonan: "Boso ta mira kon e yu di un matado aki a manda un hende pa kita mi kabes afo? Mira, ora ku e mensahero yega, sera e porta i wanta e porta duru p'e no drenta. Zonidu di pia di su shon no ta su tras?"

³³I mientras ku e tabata papia ku nan ainda, at'e mensahero a baha bin serka dje; i Eliseo a bisa: "Mira, e kalamidat aki ta bin di SENOR; pakiko mi mester spera mas tempu ariba SENOR?"