Read Papantla Totonac 2 Reinan 7 Bible Online

2 Reinan 7 - Papantla Totonac bible

2 Reinan 7

¹E ora ei Eliseo a bisa: "Skucha e palabra di SENOR; asina SENOR ta bisa: 'Manan na e ora aki un midi di harina fini lo wordu bendi pa un siklo, i dos midi di puspas pa un siklo, na e porta di Samaria.'"

²I e ofisial di rei, riba kende su man rei tabata len, a kontesta e homber di Dios i a bisa: "Mira, maske SENOR traha bentana den shelu, un kos asina por sosode?" Anto Eliseo a bisa: "Mira, lo bo wak esaki ku bo mes wowo, ma abo lo no kome di dje."

³Awor tabatin kuater homber leproso na entrada di e porta di stat; i nan a bisa otro: "Pakiko nos ta sinta aki te ora nos muri?

⁴Si nos bisa: 'Nos ta bai den stat,' anto ayanan den stat tin hamber i ayanan nos lo muri; i si nos keda sinta aki, tambe nos lo muri. Pesei anto ban, laga nos pasa ofer pa e kampamentu di e sirionan. Si nan spar nos bida, nos lo biba; i si nan mata nos, nos lo muri numa."

⁵I ora tabata bira skur, nan a lanta pa bai na e kampamentu di e sirionan; ora nan a yega banda di e kampamentu di e sirionan, mira, no tabatin ningun hende einan.

⁶Pasobra SENOR a hasi e ehersito di e sirionan tende un zonidu di garoshi i un zonidu di kabai--e zonidu di un ehersito grandi, asina ku nan tabata bisa otro: "Mira, rei di Israel a kontrata e reinan di e heteonan i e reinan di e egipsionan pa bin riba nos."

⁷Pesei ora tabata bira skur nan a lanta i a hui, i a bandona nan tentnan, nan kabainan i nan burikunan; asta e kampamentu nan a bandona lagu'e manera ku e tabata, i a hui pa skapa nan bida.

⁸Ora ku e leprosonan aki a yega banda di e kampamentu, nan a drenta un tent i a kome i bebe, i a hiba for di einan plata, oro i pana i a bai skonde nan; i nan a bolbe i a drenta un otro tent, i a hiba algun kos for di einan tambe i a bai skonde nan.

⁹Anto nan a bisa otro: "Nos no ta hasi bon. E dia aki ta un dia di bon nobo, ma nos ta keda ketu; si nos warda te ora di dia habri, kastigu lo bin riba nos. Pesei anto, ban, laga nos bai konta e hendenan di kas di rei."

¹⁰Asina nan a bin i a yama e wardadonan-di-porta di e stat, i nan a konta nan, bisando: "Nos a yega na e kampamentu di e sirionan, i mira, no tabatin ningun hende einan, ni bos di hende, solamente e kabainan mara i e burikunan mara, i e tentnan laga meskos ku nan tabata."

¹¹I e wardadonan-di-porta a yama i a konta esaki na e hendenan di kas di rei.

¹²E ora ei rei a lanta den anochi i a bisa su sirbidonan: "Awor mi ta bai konta boso kiko e sirionan a hasi ku nos. Nan sa ku nos tin hamber; pesei nan a sali for di e kampamentu pa bai skonde den kunuku, bisando: 'Ora nan sali for di stat, nos lo kaptura nan bibu i drenta den e stat.'"

¹³I un di su sirbidonan a kontesta i a bisa: "Pa fabor, laga algun homber kohe sinku di e kabainan ku a resta, ku a keda den e stat ainda. Mira, di tur manera nan lo ta meskos ku henter e multitut di Israel ku a keda den dje; mira, di tur manera nan lo ta meskos ku henter e multitut di Israel ku a perese kaba. Asina anto, laga nos manda hende pa bai wak."

¹⁴Pesei nan a kohe dos garoshi ku kabai, i rei a manda nan tras di e ehersito di e sirionan, bisando: "Bai wak."

¹⁵I nan a bai nan tras te na Jordan, i ata, henter e kaminda tabata yen di pana i ekipo ku e sirionan a benta afo den nan pura. E ora ei e mensaheronan a bin bek i a konta rei.

¹⁶Asina e pueblo a sali i a plunder e kampamentu di e sirionan. Anto un midi di harina fini a wordu bendi pa un siklo i dos midi di puspas pa un siklo, konforme e palabra di SENOR.

¹⁷Awor rei a apunta e ofisial real, riba kende su man e tabata len, pa tin enkargo di e porta di stat; ma e pueblo a trap'e na e porta di stat, i el a muri manera e homber di Dios a bisa rei, ora ku el a bin serka dje.

¹⁸I a sosode meskos ku e homber di Dios a papia ku rei, bisando: "Manan na e ora aki dos midi di puspas lo wordu bendi pa un siklo i un midi di harina fini pa un siklo, na e porta di Samaria."

¹⁹E ora ei e ofisial real a kontesta e homber di Dios i a bisa: "Awor mira, maske SENOR traha bentana den shelu, un kos asina por sosode?" I el a bisa: "Mira, lo bo wak esaki ku bo mes wowo, ma abo lo no kome di dje."

²⁰I asina a sosode kune, pasobra e pueblo a trap'e na e porta di stat, i el a muri.