Read Papantla Totonac 2 Reinan 8 Bible Online

2 Reinan 8 - Papantla Totonac bible

2 Reinan 8

¹Awor Eliseo a papia ku e muhe, kende su yu homber el a hasi biba atrobe, bisando: "Lanta i bai ku e hendenan di bo kas, i keda biba pa un tempu kaminda bo por, pasobra SENOR a ordena un hamber, i esaki lo bin riba e tera pa shete ana."

²Asina e muhe a lanta i a hasi konforme e palabra di e homber di Dios, i el a bai ku e hendenan di su kas i a keda biba na e tera di e filisteonan pa shete ana.

³I a sosode ku na fin di shete ana, e muhe a bolbe for di e tera di e filisteonan; i el a bai apela na rei pa su kas i pa su kunuku.

⁴Awor rei tabata papia ku Gehazi, sirbido di e homber di Dios, bisando: "Pa fabor, kontami tur e kosnan grandi ku Eliseo a hasi."

⁵I a sosode ku ora e tabata konta rei kon Eliseo a hasi esun ku tabata morto biba atrobe, ku at'e muhe kende su yu homber el a hasi biba atrobe, a bin apela na rei pa su kas i pa su kunuku. I Gehazi a bisa: "O senor mi rei, esaki ta e muhe i esaki ta su yu homber ku Eliseo a hasi biba atrobe."

⁶Ora rei a puntra e muhe, el a kont'e. Asina rei a apunta un ofisial p'e, bisando: "Debolbe tur loke tabata di dje i henter e kosecha di e kunuku for di dia ku el a bai for di e tera te awor."

⁷Anto Eliseo a yega Damasko. Awor Ben-adad, rei di Siria, tabata malu i nan a kont'e, bisando: "E homber di Dios a bin akinan."

⁸I rei a bisa Hazael: "Hiba un regalo den bo man i bai kontra ku e homber di Dios, i konsulta ku SENOR pa medio di dje, bisando: 'Lo mi rekupera di e malesa aki?'"

⁹Asina Hazael a bai kontra kune i a hiba un regalo den su man, di tur sorto di kos bon di Damasko, kuarenta kamel karga; i el a bin i a para su dilanti i a bisa: "Bo yu Ben-adad, rei di Siria, a mandami serka bo, bisando: 'Lo mi rekupera di e malesa aki?'"

¹⁰E ora ei Eliseo a bis'e: "Bai bis'e: 'Lo bo rekupera sigur,' ma SENOR a mustrami ku e lo muri sigur."

¹¹I el a fiha su bista riba dje te ora ku Hazael a hana berguensa; i e homber di Dios a kuminsa yora.

¹²I Hazael a bisa: "Pakiko mi senor ta yora?" Anto el a kontesta: "Pasobra mi sa di e maldat ku bo ta bai hasi na e yunan di Israel: nan luganan fortifika lo bo pega na kandela, i nan hobennan lo bo mata ku spada, i nan yu chikitunan lo bo spat for di otro na pida-pida, i nan muhenan na estado lo bo habri for di otro."

¹³E ora ei Hazael a bisa: "Ma ta kiko bo sirbido ta, kende no ta mas ku un kacho, ku e lo a hasi e kos grandi aki?" I Eliseo a kontesta: "SENOR a mustrami ku abo lo ta rei di Siria."

¹⁴Asina Hazael a laga Eliseo i a bolbe serka su shon, kende a bis'e: "Kiko Eliseo a bisabo?" I el a kontesta: "El a bisami ku lo bo rekupera sigur."

¹⁵I a sosode ku su manise el a kohe e klechi, a hink'e den awa i habrie riba kara di Ben-adad, asina ku el a muri. I Hazael a bira rei na su luga.

¹⁶Awor den e di sinku ana di Joram, yu homber di Akab, rei di Israel--den e tempu ei Josafat tabata rei di Juda--Joram, yu homber di Josafat, rei di Juda, a bira rei.

¹⁷E tabatin trint'i dos ana dia ku el a bira rei, i el a reina ocho ana na Jerusalem.

¹⁸I el a kana den e kaminda di e reinan di Israel, meskos ku e kas di Akab a hasi, pasobra yu muhe di Akab a bira su esposa; i el a hasi malu den bista di SENOR.

¹⁹Sinembargo, SENOR no tabata kier a destrui Juda, pa kousa di Su sirbido David, komo ku El a primintie di dun'e un lampi pa semper pa medio di su yu hombernan.

²⁰Den su dianan Edom a rebeldia kontra e outoridat di Juda, i a skohe un rei pa nan mes.

²¹E ora ei Joram a krusa bai Zair i tur su garoshinan huntu kune. I a sosode ku el a lanta anochi i a mata e edomitanan ku a rondon'e i e kapitannan di e garoshinan; ma su ehersito a hui bai na nan tentnan.

²²Asina Edom tabata den rebeldia kontra Juda te dia djawe. I Libna a rebeldia na e mesun tempu ei.

²³I e demas echonan di Joram i tur loke ku el a hasi, nan no ta para skirbi den e Buki di Kronikanan di e reinan di Juda?

²⁴Asina Joram a bai sosega serka su tatanan i a wordu dera serka su tatanan den e stat di David; i su yu homber Okozias a bira rei na su luga.

²⁵Den e di diesdos ana di Joram, yu homber di Akab, rei di Israel, Okozias, yu homber di Joram, rei di Juda, a kuminsa reina.

²⁶Okozias tabatin bint'i dos ana dia ku el a bira rei, i el a reina un ana na Jerusalem. I nomber di su mama tabata Atalia, nieta di Omri, rei di Israel.

²⁷I el a kana den e kaminda di e kas di Akab, i a hasi malu den bista di SENOR, manera e kas di Akab a hasi, pasobra e tabata yerno di e kas di Akab.

²⁸E ora ei el a bai ku Joram, yu homber di Akab, pa hasi guera kontra Hazael, rei di Siria, na Ramot-galaad; i e sirionan a herida Joram.

²⁹Asina rei Joram a bin bek na Jezreel, pa kura di e heridanan ku e sirionan a kous'e na Ramot, ora ku el a bringa kontra Hazael, rei di Siria. Anto Okozias, yu homber di Joram, rei di Juda, a bai Jezreel pa bishita Joram, yu homber di Akab, pasobra e tabata malu.