Read Papantla Totonac 2 Reinan 9 Bible Online

2 Reinan 9 - Papantla Totonac bible

2 Reinan 9

¹Awor profeta Eliseo a yama un di e yu hombernan di e profetanan, i a bis'e: "Faha bo hep, kohe e butishi di zeta aki den bo man i bai Ramot-galaad.

²Ora bo yega ayanan, buska Jehu, yu homber di Josafat, yu homber di Nimsi, i drenta i pidie lanta for di meimei di su ruman hombernan, i hib'e den un kamber paden.

³Anto kohe e butishi di zeta i bash'e riba su kabes i bisa: 'Asina SENOR ta bisa: "Mi a ungibo komo rei di Israel."' Anto habri porta, hui bai sin warda."

⁴Asina e hoben, sirbido di e profeta, a bai Ramot-galaad.

⁵Ora ku el a yega, mira, e kapitannan di ehersito tabata sinta huntu, i el a bisa: "Mi tin un rospondi pa bo, O kapitan." I Jehu a bisa: "Pa kual di nos?" I el a bisa: "Pa bo, O kapitan."

⁶I el a lanta i a bai den e kas. I el a basha e zeta riba kabes di Jehu i a bis'e: "Asina SENOR, e Dios di Israel, ta bisa: 'Mi a ungibo komo rei riba e pueblo di SENOR, riba Israel.

⁷I bo mester dal e kas di bo shon Akab, pa Mi venga e sanger di Mi sirbidonan e profetanan, i e sanger di tur e sirbidonan di SENOR, kendenan a muri na man di Jezabel.

⁸Pasobra henter e kas di Akab lo perese, i lo Mi korta tur e hombernan kita for di Akab, tantu esklabu komo liber na Israel.

⁹I lo Mi hasi e kas di Akab manera e kas di Jeroboam, yu homber di Nabat, i manera e kas di Baasa, yu homber di Ahias.

¹⁰I e kachonan lo kome Jezabel den e teritorio di Jezreel i ningun hende lo no der'e.'" Anto el a habri porta i a hui bai.

¹¹Awor Jehu a bin serka e sirbidonan di su shon, i un di nan a bis'e: "Tur kos ta bon? Pakiko e homber loko aki a bin serka bo?" I el a bisa nan: "Boso konose e homber i su manera di papia masha bon."

¹²I nan a bisa: "Ta mentira! Konta nos awor." I el a bisa: "Tal i tal kos el a bisami: 'Asina SENOR ta bisa: "Mi a ungibo komo rei riba Israel.

¹³E ora ei nan a hasi lihe, i kada homber a kohe su mantel pone bou di Jehu riba e tretnan di e trapi, i a supla trompet, bisando: "Jehu ta rei!"

¹⁴Asina Jehu, yu homber di Josafat, yu homber di Nimsi, a konspira kontra Joram. Awor Joram ku henter Israel tabata defende Ramot-galaad kontra Hazael, rei di Siria,

¹⁵ma rei Joram a bai bek na Jezreel, pa kura di e heridanan ku e sirionan a kous'e dia ku el a bringa kontra Hazael, rei di Siria. Asina Jehu a bisa: "Si t'asina boso ta pensa, anto no laga ningun hende skapa ni sali for di stat pa bai konta esaki na Jezreel."

¹⁶E ora ei Jehu a kore den un garoshi i a bai Jezreel, pasobra Joram tabata sosega ayanan. I Okozias, rei di Juda, a baha bin pa mira Joram.

¹⁷Awor e guardia tabata para riba e toren na Jezreel, i el a mira e trupa di Jehu ta bin, i el a bisa: "Mi ta mira un trupa di hende." I Joram a bisa: "Laga un koredo di kabai bai pa kontra nan, i lagu'e bisa: 'Ta na pas bo ta bin?'"

¹⁸Asina un koredo di kabai a bai kontr'e i a bisa: "Asina rei ta bisa: 'Ta na pas bo ta bin?'" I Jehu a bisa: "Kiko bo tin di hasi ku pas? Bira bin mi tras." I e guardia a reporta: "E mensahero a yega serka nan, ma e no a bolbe."

¹⁹E ora ei el a manda un di dos koredo di kabai ku a yega serka nan i a bisa: "Asina rei ta bisa: 'Ta na pas bo ta bin?'" I Jehu a kontesta: "Kiko bo tin di hasi ku pas? Bira bin mi tras."

²⁰I e guardia a reporta: "El a yega te serka nan, i e no a bolbe; i e manera di kore ta manera Jehu, yu homber di Nimsi, ta kore, pasobra e ta kore manera hende loko."

²¹E ora ei Joram a bisa: "Prepara e garoshi!" I nan a prepara su garoshi. I Joram, rei di Israel, i Okozias, rei di Juda, a sali, kada un den su garoshi, i nan a sali pa kontra ku Jehu i a han'e den e propiedat di Nabot e jezreelita.

²²I a sosode ku ora Joram a mira Jehu, el a bisa: "Ta na pas bo ta bin, Jehu?" I Jehu a kontesta: "Kon por tin pas, tanten ku e fornikashonnan di bo mama Jezabel i su bruherianan ta asina hopi?"

²³Asina Joram a bira bai bek i a hui, i a bisa Okozias: "Tin traishon, O Okozias!"

²⁴I Jehu a span su bog ku tur su forsa i a tira Joram meimei di su skoudernan; i e flecha a pasa dor di su kurason, i el a sak den otro den su garoshi.

²⁵E ora ei Jehu a bisa su ofisial Bidkar: "His'e benta den e kunuku ku ta propiedat di Nabot e jezreelita, pasobra mi ta korda dia ku abo i ami tabata kore huntu tras di su tata Akab, ku SENOR a proklama e sentensia aki kontra dje:

²⁶'Siguramente Mi a mira e sanger di Nabot i e sanger di su yu hombernan ayera,' SENOR ta bisa, 'i lo Mi pagabo bek den e propiedat aki,' SENOR ta bisa. Awor anto, his'e benta den e propiedat, konforme e palabra di SENOR."

²⁷Ora ku Okozias, rei di Juda, a mira esaki, el a hui bai pa e kaminda di Bet-hagan. I Jehu a persiguie i a bisa: "Tira riba dje tambe den e garoshi." Asina nan a tira riba dje na e subida di Gur, ku ta keda na Ibleam. Ma el a hui bai Meguido i a muri ayanan.

²⁸E ora ei su sirbidonan a hib'e Jerusalem den un garoshi, i a der'e den su graf serka su tatanan den e stat di David.

²⁹Awor den e di diesun ana di Joram, yu homber di Akab, Okozias a bira rei di Juda.

³⁰Ora Jehu a yega Jezreel, Jezabel a tende di esaki; i el a pinta su wowonan i a dorna su kabes, i a wak for di bentana.

³¹I ora Jehu a drenta e porta di stat, Jezabel a bisa: "Tur kos ta bon, Zimri, matado di bo shon?"

³²E ora ei Jehu a hisa su kara wak na e bentana i a bisa: "Ken ta na mi banda? Ken?" I dos of tres ofisial a mira abou wak e.

³³I el a bisa: "Bent'e abou." Asina nan a bent'e abou, i poko di su sanger a spat na muraya i riba e kabainan; i el a pasa riba dje ku kabai.

³⁴Ora Jehu a drenta, el a kome i bebe; i el a bisa: "Perkura awor pa e muhe maldishona aki i der'e, pasobra ta yu muhe di un rei e ta."

³⁵I nan a bai pa der'e, ma nan no a hana nada mas di dje sino solamente su kalpachi, su pianan i su plant'i mannan.

³⁶Pesei nan a bin bek i a konta Jehu. I el a bisa: "Esaki ta e palabra di SENOR ku El a papia pa medio di Su sirbido Elias e tisbita, bisando: 'Den e propiedat di Jezreel kacho lo kome e karni di Jezabel;

³⁷i e kadaver di Jezabel lo ta manera mest riba suela den e propiedat di Jezreel, asina ku nan no por bisa: "Esaki ta Jezabel.