Read Papantla Totonac 1 Kronikanan 10 Bible Online

1 Kronikanan 10 - Papantla Totonac bible

1 Kronikanan 10

¹Awor e filisteonan tabata bringa kontra Israel; i e hombernan di Israel a hui dilanti di e filisteonan i a wordu mata riba Seru Gilboa.

²I e filisteonan a persigui Saul i su yu hombernan di serka, i e filisteonan a mata Jonatan, Abinadab i Malkisua, e yu hombernan di Saul.

³I e bataya a bira pisa kontra Saul, i e tiradonan di flecha a alkans'e; i el a wordu herida dor di e tiradonan di flecha.

⁴E ora ei Saul a bisa su kargado di arma: "Saka bo spada i traspasami kune, pa e hendenan insirkumsida aki no bin hasi abuso di mi." Ma su kargado di arma no tabata kier, pasobra e tabatin masha miedu. Pesei Saul a kohe su spada i a tira su kurpa riba dje.

⁵I ora su kargado di arma a mira ku Saul tabata morto, e tambe a tira su kurpa riba su spada i a muri.

⁶Asina Saul a muri huntu ku su tres yu hombernan, i henter su kas a muri huntu.

⁷Ora tur e hombernan di Israel ku tabata den e vaye a mira ku nan a hui, i ku Saul i su yu hombernan tabata morto, nan a bandona nan statnan i a hui; i e filisteonan a bin biba den e statnan.

⁸I a sosode ku su manise, ora ku e filisteonan a bin pa plunder e mortonan, nan a hana Saul ku su yu hombernan benta abou riba Seru Gilboa.

⁹Asina nan a plunder Saul i a kohe su kabes i su armadura i a manda mensahero ront den e tera di e filisteonan, pa hiba e bon nobo pa nan ldolonan i pa e pueblo.

¹⁰I nan a pone su armadura den e tempel di nan diosnan i a pega su kabes den e tempel di Dagon.

¹¹Ora henter Jabes-galaad a tende di tur loke e filisteonan a hasi ku Saul,

¹²tur e hombernan balente a lanta i a kohe e kurpa di Saul i e kurpanan di su yu hombernan bai ku nan, i a trese nan na Jabes i a dera nan wesunan bou di e palu di eik na Jabes i a yuna shete dia.

¹³Asina Saul a muri pa su pika ku el a komete kontra SENOR, pa motibu di e palabra di SENOR ku e no a warda; i tambe pasobra el a buska konseho serka un montado i a konsulta kune,

¹⁴i no a konsulta ku SENOR. Pesei El a mat'e i a pasa e reino pa David, yu homber di Isai.