Read Papantla Totonac 1 Kronikanan 11 Bible Online

1 Kronikanan 11 - Papantla Totonac bible

1 Kronikanan 11

¹E ora ei henter Israel a reuni serka David na Hebron i a bisa: "Mira, nos ta bo wesu i bo karni.

²Den tempunan pasa, tempu ku Saul tabata rei, abo tabata esun ku tabata guia Israel pa sali i pa drenta; i SENOR bo Dios a bisabo: 'Abo lo pastoria Mi pueblo Israel, i abo lo ta prens riba Mi pueblo Israel.'"

³Asina tur e ansianonan di Israel a bin serka rei na Hebron, i David a sera un aliansa ku nan na Hebron dilanti di SENOR; i nan a ungi David komo rei riba Israel, konforme e palabra di SENOR pa medio di Samuel.

⁴E ora ei David i henter Israel a bai Jerusalem (esta, Jebus); i e jebuseonan, habitantenan di e tera, tabata ayanan.

⁵I e habitantenan di Jebus a bisa David: "Bo no ta drenta akinan." Sinembargo, David a kaptura e luga fortifika di Sion (esta, e stat di David).

⁶Awor David a bisa: "Esun ku mata un jebuseo prome ta bira hefe i komandante." I Joab, yu homber di Sarvia, a subi bai prome; asina el a bira hefe.

⁷I David tabata biba den e luga fortifika; pesei esaki tabata wordu yama stat di David.

⁸I el a fortifika e stat tur ront, for di e sitadel te na e besindario tur ront; i Joab a drecha restu di e stat.

⁹I David a bira mas i mas poderoso, pasobra e SENOR di ehersitonan tabata kune.

¹⁰Awor esakinan ta e kabesantenan di e hombernan poderoso ku David tabatin, kendenan tabata sosten'e fuertemente den su reino, huntu ku henter Israel, pa hasie rei, konforme e palabra di SENOR tokante di Israel.

¹¹I esaki ta e lista di e hombernan poderoso ku David tabatin: Jasobeam, yu homber di un hakmonita, hefe di e trintanan; el a hisa su lansa kontra tres shen ku el a mata den un solo biaha.

¹²I despues di dje a sigui Eleazar, yu homber di Dodo e ahohita, kende tabata un di e tres hombernan poderoso.

¹³E tabata huntu ku David na Pasdamim tempu ku e filisteonan a reuni ayanan pa bataya, i ayanan tabatin un pida tereno yen di puspas; i e pueblo a hui dilanti di e filisteonan.

¹⁴I nan a para firme meimei di e pida tereno, i a defende esaki i a mata e filisteonan; i SENOR a salba nan pa medio di un viktoria grandi.

¹⁵Awor tres di e trinta hefenan a baha bai na e baranka serka David, den e kueba di Adulam, mientras ku e ehersito di e filisteonan tabata kampa den e vaye di Refaim.

¹⁶I e tempu ei David tabata den e luga fortifika, mientras ku e guarnishon di e filisteonan e tempu ei tabata na Betlehem.

¹⁷I David a hana asina un deseo pa bebe awa i a bisa: "Mara un hende por a dunami awa pa bebe for di e pos di Betlehem, ku ta keda pega ku e porta di stat!"

¹⁸Asina e tresnan a kibra pasa dor di e kampamentu di e filisteonan i a saka awa for di e pos di Betlehem, ku tabata keda pega ku e porta di stat, i a koh'e hiba pa David; sinembargo, David no kier a beb'e, ma a dram'e pa SENOR;

¹⁹i el a bisa: "Leu sea di mi, O mi Dios, di hasi e kos aki. Lo mi bebe e sanger di e hombernan aki ku a riska nan bida pa bai? Pasobra nan a riska nan bida pa tres'e." Pesei e no kier a beb'e. E kosnan aki e tres hombernan poderoso a hasi.

²⁰I pa loke ta Abisai, ruman homber di Joab, e tabata hefe di e trintanan, i el a zwai su lansa kontra tres shen i a mata nan; i el a hana fama meskos ku e tresnan.

²¹Di e tresnan den e di dos rango e tabata esun mas onra, i a bira nan komandante; sinembargo, e no a iguala e prome tresnan.

²²Benaia, yu homber di Joiada, yu di un homber balente di Kabseel, poderoso den echonan, a mata e dos yu hombernan di Ariel di Moab. Tambe el a baha bai den un buraku riba un dia ku sneu tabata kai i a mata un leon.

²³I el a mata un egipsio, un homber di gran estatura, sinku kodo haltu. Awor e egipsio tabatin un lansa den su man manera balki di un wefdo-di-tela, ma el a baha bai riba dje ku un klop, i a ranka e lansa for di e egipsio su man i a mat'e ku su mes lansa.

²⁴E kosnan aki Benaia, yu homber di Joiada, a hasi, i el a hana fama meskos ku e tres hombernan poderoso.

²⁵Mira, el a wordu onra entre e trintanan, ma e no a iguala e tresnan; i David a nombr'e riba su guardia.

²⁶Awor e hombernan poderoso di e ehersitonan tabata: Asael, ruman homber di Joab, Elhanan, yu homber di Dodo di Betlehem,

²⁷Samot e harodita, Heles e pelonita,

²⁸Ira, yu homber di Ikes e tekoita, Abiezer e anatotita,

²⁹Sibekai e husatita, Ilai e ahohita,

³⁰Maharai e netofatita, Heled, yu homber di Baana e netofatita,

³¹Itai, yu homber di Ribai di Gabaa, ku ta pertenese na e yu hombernan di Benjamin, Benaia e piratonita,

³²Hurai di e roinan di Gaas, Abiel e arbatita,

³³Azmavet e baharumita, Eliaba e saalbonita,

³⁴e yu hombernan di Hasem e gizonita, Jonatan, yu homber di Sage e hararita,

³⁵Ahiam, yu homber di Sakar e hararita, Elifal, yu homber di Ur,

³⁶Hefer e mekeratita, Ahias e pelonita,

³⁷Hezro e karmelita, Naarai, yu homber di Ezbai,

³⁸Joel, ruman homber di Natan, Mibhar, yu homber di Hagrai,

³⁹Selek e amonita, Naharai e berotita, kargado di arma di Joab, yu homber di Sarvia,

⁴⁰Ira e itrita, Gareb e itrita,

⁴¹Urias e heteo, Zabad, yu homber di Ahlai,

⁴²Adina, yu homber di Siza e rubenita, un hefe di e rubenitanan, i trinta huntu kune,

⁴³Hanan, yu homber di Maaka i Josafat e mitnita,

⁴⁴Uzias e asteratita, Sama i Jehiel, yu hombernan di Hotam e aroerita,

⁴⁵Jediael, yu homber di Simri, i su ruman homber Joha e tizita,

⁴⁶Eliel e mahavita i Jerebai i Josavia, yu hombernan di Elnaam, i Itma e moabita,

⁴⁷Eliel, Obed i Jaasiel e mesobaita.