Read Papantla Totonac 1 Kronikanan 12 Bible Online

1 Kronikanan 12 - Papantla Totonac bible

1 Kronikanan 12

¹Awor esakinan ta esnan ku a bin serka David na Ziklag, mientras ku ainda su moveshonnan tabata limita pa motibu di Saul, yu homber di Kis; i nan tabata entre e hombernan poderoso ku a yud'e den guera.

²Nan tabata arma ku bog i tabata uza tantu man drechi komo man robes pa tira piedra ku slenger i pa tira flecha ku bog; nan tabata famia di Saul for di Benjamin.

³E hefe tabata Ahiezer, despues Joas, yu hombernan di Sema e gabaatita; i Jeziel ku Pelet, yu hombernan di Azmavet, i Beraka ku Jehu e anatotita,

⁴i Ismaias e gabaonita, un homber poderoso entre e trintanan i riba e trintanan. Despues Jeremias, Jahaziel, Johanan, Jozabad e gederatita,

⁵Eluzai, Jerimot, Bealias, Semarias, Sefatias e harufita,

⁶Elkana, Isias, Azareel, Joezer, Jasobeam, e koreitanan,

⁷i Joela ku Zebadias, yu hombernan di Jeroham di Gedor.

⁸I for di e gaditanan a bin serka David na su luga fortifika den desierto, hombernan poderoso i balente, hombernan entrena pa guera, ku por a maneha eskudo i lansa, i kende nan kara tabata manera kara di leon, i nan tabata lihe manera gasel riba e serunan.

⁹Ezer tabata esun prome, Obadias, e di dos, Eliab, e di tres,

¹⁰Mismana, e di kuater, Jeremias, e di sinku,

¹¹Atai, e di seis, Eliel, e di shete,

¹²Johanan, e di ocho, Elzabad, e di nuebe,

¹³Jeremias, e di dies, Makbanai, e di diesun.

¹⁴Di e yu hombernan di Gad esakinan tabata kapitan di ehersito; esun di mas chikitu tabata igual na shen i esun di mas grandi na mil.

¹⁵Esakinan ta esnan ku a krusa Jordan den e prome luna, tempu ku esaki tabata subi pasa tur su oriyanan; i nan a pone tur esnan den e vayenan hui bai den direkshon pariba i den direkshon pabou.

¹⁶E ora ei algun di e yu hombernan di Benjamin i Juda a bin serka David na e luga fortifika.

¹⁷I David a sali bai kontra ku nan i a kontesta nan bisando: "Si boso ta bin na pas serka mi pa yudami, mi kurason lo ta uni ku boso; ma si ta pa traishonami serka mi atversarionan, siendo ku no tin inikidat den mi mannan, ku e Dios di nos tatanan mira i disidi."

¹⁸E ora ei e Spiritu a bin riba Amasai, kende tabata hefe di e trintanan, i el a bisa: "Nos ta di bo, O David, i ku bo, O yu homber di Isai! Pas, pas sea ku bo, i pas sea ku esun ku ta yudabo; Di berdat, bo Dios ta yudabo!" E ora ei David a risibi nan i a hasi nan kapitan di e trupa.

¹⁹For di Manases tambe algun a pasa ofer pa David, ora ku e tabata bai bataya huntu ku e filisteonan kontra Saul. Ma nan no a yuda e filisteonan, pasobra e prensnan di e filisteonan, despues di a konsulta ku otro, a manda David bai, bisando: "E ta kapas di pasa ofer pa su shon Saul i pone nos kabes na peliger."

²⁰Ora David a bai Ziklag, esakinan ta e hombernan di Manases ku a pasa ofer p'e: Adnas, Jozabad, Jediael, Mikael, Jozabad, Eliu i Ziletai, kapitannan riba milnan ku tabata pertenese na Manases.

²¹I nan a yuda David kontra e trupa di sakeado, pasobra nan tur tabata hombernan poderoso i balente i tabata kapitannan den e ehersito.

²²Pasobra dia tras dia tabata bin hombernan serka David pa yud'e, te ora tabatin un ehersito grandi, manera e ehersito di Dios.

²³Awor esakinan ta e kantidatnan di e divishonnan, ekipa pa bai guera, ku a bin serka David na Hebron, pa pasa e reino di Saul p'e, konforme e palabra di SENOR.

²⁴E yu hombernan di Juda, ku tabata karga eskudo i lansa, tabata 6.800, ekipa pa guera.

²⁵Di e yu hombernan di Simeon, hombernan poderoso i balente pa bai guera, 7.100.

²⁶Di e yu hombernan di Levi, 4.600.

²⁷Awor Joiada tabata lider di e kas di Aaron, i huntu kune tabatin 3.700,

²⁸tambe Sadok, un homber hoben, poderoso i balente, ku 22 kapitan di e kas di su tata.

²⁹I di e yu hombernan di Benjamin, famia di Saul, 3.000; pasobra te awor mayoria parti di nan a keda fiel na e kas di Saul.

³⁰I di e yu hombernan di Efrain 20.800 homber poderoso i balente, hombernan famoso den e kasnan di nan tatanan.

³¹I di e mitar tribu di Manases, 18.000, ku a keda nombra pa bin hasi David rei.

³²I di e yu hombernan di Isakar, hombernan ku tabatin komprendementu di e tempunan, ku konosementu di loke Israel mester hasi, nan hefenan tabata 200; i henter nan famia tabata bou di nan mando.

³³Di Zabulon tabatin 50.000 ku a sali bai den ehersito, ku por a pone nan mes den ordu di bataya, ku tur sorto di arma di guera; i nan a yuda David ku kurason dedika na dje so.

³⁴I di Neftali tabatin mil kapitan, i huntu ku nan 37.000 ku eskudo i lansa.

³⁵I di e danitanan, ku por a pone nan mes den ordu di bataya, tabatin 28.600.

³⁶I di Aser, esnan ku a sali bai den ehersito, ku por a pone nan mes den ordu di bataya, 40.000.

³⁷I for di e otro banda di Jordan, di e rubenitanan i e gaditanan i di e mitar tribu di Manases, tabatin 120.000 mil ku tur sorto di arma di guera pa bataya.

³⁸Tur esakinan, siendo hombernan di guera, ku por a pone nan mes den ordu di bataya, a bin Hebron ku kurason kompletamente dedika pa hasi David rei riba henter Israel; i tambe tur e restu di Israel tabatin e mesun pensamentu di hasi David rei.

³⁹I nan a keda tres dia ayanan serka David ta kome i bebe; pasobra nan famianan a prepara tur kos pa nan.

⁴⁰Ademas, esnan ku tabata biba serka di nan, te na Isakar, Zabulon i Neftali, tabata trese kuminda riba buriku, kamel, mula i buey, kantidatnan grandi di pan, klompi di figo, i klompi di rasenchi, bina, zeta, buey i karne. Di berdat tabatin goso den Israel.