Read Papantla Totonac 1 Kronikanan 13 Bible Online

1 Kronikanan 13 - Papantla Totonac bible

1 Kronikanan 13

¹E ora ei David a konsulta ku e kapitannan di e milnan i shennan, ku tur lider.

²I David a bisa henter e asamblea di Israel: "Si ta parse boso bon, i si ta boluntat di SENOR nos Dios, laga nos manda rospondi tur parti pa nos famianan ku ta keda na henter e tera di Israel, tambe pa e saserdotenan i levitanan ku ta huntu ku nan den nan statnan ku luganan di yerba berde, pa nan reuni ku nos;

³i laga nos trese e arka di nos Dios bek serka nos, pasobra den e dianan di Saul nos no a hasi kaso di dje."

⁴E ora ei henter e asamblea a bisa ku nan lo hasi asina, pasobra e asunto tabata korekto den bista di henter e pueblo.

⁵Asina David a reuni henter Israel huntu, for di Sihor di Egipto te na e entrada di Hamat, pa trese e arka di Dios for di Kiriat-jearim.

⁶I David ku henter Israel a subi bai Baala, esta, Kiriat-jearim, ku ta pertenese na Juda, pa trese for di ayanan e arka di Dios, e SENOR ku ta sinta riba Su trono ariba di e kerubinnan, e arka riba kual Su nomber ta wordu invoka.

⁷I nan a hiba e arka di Dios riba un garoshi nobo for di e kas di Abinadab, i Uza ku Ahio tabata guia e garoshi.

⁸I David ku henter Israel tabata regosiha ku tur nan forsa dilanti di Dios, ku kantika i ku salterio, arpa, tamburein, simbal i trompet.

⁹Ora nan a yega na e plenchi-di-bati-mainshi di Kidon, Uza a saka su man pa wanta e arka, pasobra e bueynan a trompeka.

¹⁰I e rabia di SENOR a kima kontra Uza, i El a dal e mata pa motibu ku el a saka su man na e arka; i el a muri ayanan dilanti di Dios.

¹¹Anto David a rabia pasobra SENOR a dal Uza un sla asina pisa; i el a yama e luga ei Perez-uza te dia djawe.

¹²I David a hana miedu di Dios e dia ei, bisando: "Kon mi por trese e arka di Dios serka mi?"

¹³Asina David no a hiba e arka serka dje na e stat di David, ma el a hib'e na e kas di Obed-edom e geteo.

¹⁴Pesei e arka di Dios a keda tres luna serka e famia di Obed-edom, den su kas; i SENOR a bendishona e famia di Obed-edom i tur loke ku e tabatin.