Read Papantla Totonac 1 Kronikanan 15 Bible Online

1 Kronikanan 15 - Papantla Totonac bible

1 Kronikanan 15

¹Awor David a traha kasnan pa su mes den e stat di David; i el a prepara un luga pa e arka di Dios, i a lanta un tent p'e.

²E ora ei David a bisa: "Ningun hende no mag karga e arka di Dios, sino e levitanan so; pasobra SENOR a skohe nan pa karga e arka di Dios i pa sirbié pa semper."

³I David a reuni henter Israel na Jerusalem, pa trese e arka di SENOR na su luga ku el a prepara p'e.

⁴I David a reuni e yu hombernan di Aaron i e levitanan;

⁵di e yu hombernan di Koat, hefe Uriel i 120 di su rumannan;

⁶di e yu hombernan di Merari, hefe Asaias i 220 di su rumannan;

⁷di e yu hombernan di Gerson, hefe Joel i 130 di su rumannan;

⁸di e yu hombernan di Elizafan, hefe Semaias, i 200 di su rumannan;

⁹di e yu hombernan di Hebron, hefe Eliel i 80 di su rumannan;

¹⁰di e yu hombernan di Uziel, hefe Aminadab i 112 di su rumannan.

¹¹E ora ei David a manda yama e saserdotenan Sadok i Abiatar, i e levitanan, i Uriel, Asaias, Joel, Semaias, Eliel i Aminadab,

¹²i a bisa nan: "Boso ta e kabesnan di e kasnan di e tatanan di e levitanan; konsagra boso mes, tantu boso komo boso rumannan, pa boso trese e arka di e SENOR Dios di Israel na e luga ku mi a prepara p'e.

¹³Pa motibu ku boso no a kargu'e na prinsipio, e rabia di SENOR nos Dios a lanta kontra nos, pasobra nos no a busk'E konforme e ordenansa."

¹⁴Asina e saserdotenan i e levitanan a konsagra nan mes pa hiba e arka di e SENOR Dios di Israel.

¹⁵I e yu hombernan di e levitanan a karga e arka di Dios riba nan skouder, ku e baranan na dje, manera Moises a ordena, konforme e palabra di SENOR.

¹⁶E ora ei David a papia ku e hefenan di e levitanan pa nombra nan rumannan, e kantadonan, ku instrument di muzik, arpa, salterio, simbal ku ta zona duru, pa laga tende zonidunan di goso.

¹⁷Asina e levitanan a nombra Heman, yu homber di Joel, i di su rumannan: Asaf, yu homber di Berekias; i di e yu hombernan di Merari, nan rumannan: Etan, yu homber di Kusaias,

¹⁸i huntu ku nan nan rumannan di e di dos rango: Zakarias, Ben, Jaaziel, Semiramot, Jehiel, Uni, Eliab, Benaia, Maaseias, Matitias, Elifelehu, Miknias, Obed-edom i Jeiel, e wardadonan-di-porta.

¹⁹Asina e kantadonan Heman, Asaf i Etan a keda nombra pa toka duru riba simbal di brons;

²⁰i Zakarias, Aziel, Semiramot, Jehiel, Uni, Eliab, Maaseias i Benaia, ku arpa gestem na tono haltu;

²¹i Matitias, Elifelehu, Miknias, Obed-edom, Jeiel i Azazias, pa guia ku salterio gestem na tono abou.

²²I Kenanias, hefe di e levitanan, tabatin enkargo di e kantamentu; e tabata duna instrukshon den kantamentu, pasobra e tabatin abilidat.

²³Anto Berekias i Elkana tabata wardado-di-porta pa e arka.

²⁴I e saserdotenan Sebanias, Josafat, Natanael, Amasai, Zakarias, Benaia i Eliezer tabata supla trompet dilanti di e arka di Dios. Obed-edom i Jehias tambe tabata wardado-di-porta pa e arka.

²⁵Asina David, huntu ku e ansianonan di Israel i e kapitannan riba milnan, a bai pa trese e arka di e aliansa di SENOR for di e kas di Obed-edom, ku goso.

²⁶I a sosode ku, pasobra Dios tabata yuda e levitanan ku tabata karga e arka di e aliansa di SENOR, nan a sakrifika shete bishe machu i shete karne chubatu.

²⁷Awor David tabatin un mantel di lino fini bisti, meskos ku tur e levitanan ku tabata karga e arka, i e kantadonan i Kenanias, e lider di kantamentu, huntu ku e kantadonan. David tambe tabatin un efod di lino bisti.

²⁸Asina henter Israel a trese e arka di e aliansa di SENOR ku gritu i ku zonidu di kachu, ku trompet, ku zonidu duru di simbal, ku arpa i salterio.

²⁹I a sosode ku ora ku e arka di e aliansa di SENOR a yega den e stat di David, Mikal, yu muhe di Saul, tabata wak for di bentana i a mira rei David ta bula i ta hasi kontentu, i el a despresi'e den su kurason.