Read Papantla Totonac 1 Kronikanan 17 Bible Online

1 Kronikanan 17 - Papantla Totonac bible

1 Kronikanan 17

¹I a sosode ku ora David a bai biba den su kas, David a bisa profeta Natan: "Mira, ami ta biba den un kas di palu di seda, ma e arka di e aliansa di SENOR ta bou di kortina."

²E ora ei Natan a bisa David: "Hasi tur loke ta den bo kurason, pasobra Dios ta ku bo."

³I a sosode ku e mesun anochi ei e palabra di Dios a yega na Natan, bisando:

⁴"Bai bisa Mi sirbido David: 'Asina SENOR ta bisa: "Abo lo no traha un kas pa Mi biba aden;

⁵pasobra Mi no a biba den un kas for di dia ku Mi a trese Israel aki te dia djawe, ma Mi a bai di un tent pa otro i di un luga-di-biba pa otro.

⁶Na tur luga ku Mi a kana ku henter Israel, Mi a yega di papia un palabra ku un di e huesnan di Israel, ku Mi a ordena pa pastoria Mi pueblo, bisando: 'Pakiko boso no a traha un kas di palu di seda pa Mi?'"'

⁷"Pesei anto, asina bo mester bisa Mi sirbido David: 'Asina e SENOR di ehersitonan ta bisa: "Mi a sakabo for di den un luga di yerba berde, for di tras di e karnenan, pa bo ta lider riba Mi pueblo Israel.

⁸I Mi tabata ku bo unda ku bo a bai i a korta tur bo enemigunan kita for di bo dilanti; i lo Mi dunabo un nomber manera nomber di e grandinan ku tin riba tera.

⁹I lo Mi apunta un luga pa Mi pueblo Israel, i planta nan, pa nan biba den nan mes luga i no wordu movi mas; ni e malbadonan lo no afligi nan mas manera antes,

¹⁰manera tempu ku Mi a nombra huesnan riba Mi pueblo Israel. I lo Mi hasi tur bo enemigunan somete. "Ademas, Mi ta bisabo ku SENOR lo traha un kas pa bo.

¹¹I lo sosode ku ora bo dianan keda kumpli ku bo mester bai serka bo tatanan, lo Mi lanta un di bo desendientenan despues di bo ku lo ta un di bo yu hombernan; i lo Mi stablese su reino.

¹²E lo traha un kas pa Mi, i lo Mi stablese su trono pa semper.

¹³Ami lo ta su tata, i e lo ta Mi yu homber; i lo Mi no kita Mi miserikordia for di dje, manera Mi a kit'e for di esun ku tabata prome ku bo.

¹⁴Ma lo Mi stables'e den Mi kas i den Mi reino pa semper, i su trono lo ta stables! pa semper.

¹⁵Konforme tur e palabranan aki i konforme henter e vishon aki, asina Natan a papia ku David.

¹⁶E ora ei rei David a bai paden i a sinta dilanti di SENOR i a bisa: "Ta ken mi ta, O SENOR Dios, i ta kiko mi kas ta, ku Bo a tresemi te akinan?

¹⁷I esaki tabata un kos chikitu den Bo bista, O Dios; ma Bo a papia di e kas di Bo sirbido enkuanto un futuro lehano, i a konsiderami komo un homber di kategoria haltu, O SENOR Dios.

¹⁸"Kiko mas David por bisaBo tokante di e onor ku a wordu duna na Bo sirbido? Pasobra Bo konose Bo sirbido.

¹⁹O SENOR, pa motibu di Bo sirbido, i konforme Bo mes kurason, Bo a hasi tur e grandesa aki, pa hasi tur e kosnan grandi aki konosi.

²⁰"O SENOR, no tin ningun manera Bo, ni no tin ningun Dios fuera di Bo, konforme tur loke nos a tende ku nos orea.

²¹I kual nashon na tera ta manera Bo pueblo Israel, ku Dios a bai redimi pa Su mes komo un pueblo, pa hasi Bo mes un nomber dor di kosnan grandi i teribel, dor di kore ku nashonnan for di dilanti di Bo pueblo, ku Bo a redimi for di Egipto?

²²Pasobra Bo a hasi Bo pueblo Israel Bo mes pueblo pa semper, i Abo, O SENOR, a bira nan Dios.

²³"I awor, O SENOR, laga e palabra ku Bo a papia tokante di Bo sirbido i tokante di su kas keda stablesi pa semper, i hasi manera Bo a papia.

²⁴I laga Bo nomber keda stablesi i engrandesi pa semper, bisando: 'E SENOR di ehersitonan ta e Dios di Israel, si, un Dios pa Israel; i e kas di Bo sirbido David ta stablesi Bo dilanti.'

²⁵"Pasobra Abo, O mi Dios, a revela na Bo sirbido ku lo Bo traha un kas p'e; pesei Bo sirbido a hana kurashi pa hasi orashon Bo dilanti.

²⁶I awor, O SENOR, Abo ta Dios, i Bo a priminti Bo sirbido e kos bon aki.

²⁷I awor a agradaBo di bendishona e kas di Bo sirbido, pa e permanese pa semper Bo dilanti; pasobra Abo, O SENOR, a bendishona, i e lo ta bendishona pa semper."