Read Papantla Totonac 1 Kronikanan 18 Bible Online

1 Kronikanan 18 - Papantla Totonac bible

1 Kronikanan 18

¹Awor despues di esaki a sosode ku David a derota e filisteonan, a hasi nan somete i a kohe Gat i su statnan for di man di e filisteonan.

²I el a derota Moab, i e moabitanan a bira sirbido di David, i tabata paga tributo.

³Tambe David a derota Hadadezer, rei di Soba, te na Hamat, ora ku el a bai pa stablese su poder na Riu Eufrates.

⁴I David a kita for di dje mil garoshi, shete mil koredo di kabai i binti mil solda-na-pia; i David a korta kabuya-di-pia di tur e kabainan di garoshi, ma a reserva sufisiente di nan pa shen garoshi.

⁵Ora ku e sirionan di Damasko a bin yuda Hadadezer, rei di Soba, David a mata bint'i dos mil homber di e sirionan.

⁶E ora ei David a pone guarnishonnan na Siria di Damasko; i e sirionan a bira sirbido di David, i tabata paga tributo. I SENOR tabata yuda David unda ku e tabata bai.

⁷I David a kohe e eskudonan di oro ku e sirbidonan di Hadadezer tabata karga, i a hiba nan Jerusalem.

⁸Tambe for di Tibhat i for di Kun, statnan di Hadadezer, David a kohe un kantidat masha grandi di brons, ku kual Salomon a traha e laman di brons, e pilarnan i e artikulonan-di-uzo di brons.

⁹Awor ora Tou, rei di Hamat, a tende ku David a derota henter e ehersito di Hadadezer, rei di Soba,

¹⁰el a manda su yu homber Hadoram serka rei David, pa salud'e i pa bendishon'e, pasobra el a bringa kontra Hadadezer i a derot'e; pasobra Hadadezer tabata na guera ku Tou. I Hadoram a trese tur sorto di artikulo di oro, di plata i di brons.

¹¹Esakinan tambe rei David a dedika na SENOR, huntu ku e plata i e oro ku el a kohe bai kune for di tur e nashonnan: for di Edom, Moab, e yu hombernan di Amon, e filisteonan i Amalek.

¹²Ademas Abisai, yu homber di Sarvia, a derota diesocho mil edomita den e Vaye di Salu.

¹³I el a pone guarnishonnan na Edom, i tur e edomitanan a bira sirbido di David. I SENOR tabata yuda David unda ku e tabata bai.

¹⁴Asina David tabata reina riba henter Israel; i e tabata atministra huisio i hustisia pa henter su pueblo.

¹⁵I Joab, yu homber di Sarvia, tabatin enkargo di e ehersito i Josafat, yu homber di Ahilud, tabata registrado;

¹⁶i Sadok, yu homber di Ahitob, i Abimelek, yu homber di Abiatar, tabata saserdote, i Savsa tabata sekretario.

¹⁷I Benaia, yu homber di Joiada, tabatin enkargo di e kereteonan i e peleteonan; i e yu hombernan di David tabata hefe na rei su lado.