Read Papantla Totonac 1 Kronikanan 19 Bible Online

1 Kronikanan 19 - Papantla Totonac bible

1 Kronikanan 19

¹Awor a sosode ku despues di esaki, Nahas, rei di e yu hombernan di Amon, a muri, i su yu homber a bira rei na su luga.

²Anto David a bisa: "Lo mi mustra karino na Hanun, yu homber di Nahas, pasobra su tata a mustrami karino." Asina David a manda mensaheronan pa konsol'e pa motibu di morto di su tata. I David su sirbidonan a yega tera di e yu hombernan di Amon, serka Hanun, pa konsol'e.

³Ma e prensnan di e yu hombernan di Amon a bisa Hanun: "Bo ta kere ku ta onra David ta onra bo tata ku el a manda konsolado serka bo? Su sirbidonan no a bin serka bo pa ristra, pa derota i pa spiona e tera?"

⁴Asina Hanun a kohe David su sirbidonan, a feita nan i a korta nan pana na mitar kit'afo pareu ku nan hep, i a manda nan bai.

⁵E ora ei algun hende a bai konta David tokante di e hombernan. I el a manda hende bai topa ku nan, pasobra e hombernan a wordu umiya masha. I rei a bisa: "Keda na Jeriko te ora boso barba krese i e ora ei boso bolbe."

⁶Ora ku e yu hombernan di Amon a mira ku nan a hasi nan mes un abominashon pa David, Hanun i e yu hombernan di Amon a manda mil talento di plata pa hur garoshi i koredo di kabai pa nan mes for di Mesopotamia, for di Aram-maaka i for di Soba.

⁷Asina nan a hur pa nan mes trint'i dos mil garoshi, i tambe nan a hur e rei di Maaka i su hendenan, ku a bin kampa dilanti di Medeba. I e yu hombernan di Amon a reuni huntu for di nan statnan i a bin bataya.

⁸Ora David a tende esaki, el a manda Joab i henter e ehersito, e hombernan poderoso.

⁹I e yu hombernan di Amon a sali i a pone nan mes den ordu di bataya na entrada di e stat, i e reinan ku a bin a keda nan so den sabana.

¹⁰Awor ora Joab a mira ku e bataya tabata kontra dje dilanti i patras, el a skohe for di tur e hombernan skohi di Israel i a pone nan den ordu di bataya kontra e sirionan.

¹¹Ma e hendenan ku a resta el a pone den man di su ruman homber Abisai; i nan a pone nan mes den ordu di bataya kontra e yu hombernan di Amon.

¹²I Joab a bisa: " Si e sirionan ta muchu fuerte pa mi, e ora ei abo lo yudami; ma si e yu hombernan di Amon ta muchu fuerte pa bo, e ora ei ami lo yudabo.

¹³Sea fuerte, i laga nos mustra nos mes yen di kurashi pa kousa di nos pueblo i pa e statnan di nos Dios; i ku SENOR hasi loke ta bon den Su bista."

¹⁴Asina Joab i e pueblo ku tabata huntu kune a hala serka pa bringa kontra e sirionan, i nan a hui su dilanti.

¹⁵Ora ku e yu hombernan di Amon a mira ku e sirionan a hui, nan tambe a hui dilanti di su ruman homber Abisai i a drenta stat. Anto Joab a bin Jerusalem.

¹⁶Ora ku e sirionan a mira ku nan a wordu derota dor di Israel, nan a manda mensaheronan i a saka e sirionan ku tabata na e otro banda di Riu Eufrates, i Sofak, komandante di e ehersito di Hadadezer, tabata guia nan.

¹⁷Ora nan a konta David esaki, el a reuni henter Israel huntu, a krusa Jordan, a bin riba nan i a bai para den ordu di bataya kontra nan. I ora David a bai para den ordu di bataya kontra e sirionan, nan a bringa kontra dje.

¹⁸I e sirionan a hui dilanti di Israel, i di e sirionan David a mata shete mil koredo di garoshi i kuarenta mil solda-na-pia, i a mata Sofak, komandante di e ehersito.

¹⁹I ora ku e sirbidonan di Hadadezer a mira ku nan a wordu derota dor di Israel, nan a hasi pas ku David i a sirbie. Asina e sirionan no tabata kier a yuda e yu hombernan di Amon mas.