Read Papantla Totonac 1 Kronikanan 21 Bible Online

1 Kronikanan 21 - Papantla Totonac bible

1 Kronikanan 21

¹E ora ei Satanas a lanta kontra Israel i a instiga David pa konta Israel.

²Asina David a bisa Joab i e prensnan di e pueblo: "Bai konta Israel for di Beerseba te na Dan, i trese informashon pa mi por sa kuantu nan ta."

³I Joab a bisa: "Ku SENOR anadi na Su pueblo shen biaha mas tantu di loke nan ta! Ma senor mi rei, nan tur no ta sirbido di mi senor? Pakiko mi senor ta buska e kos aki? Pakiko e mester ta un kousa di kulpa pa Israel?"

⁴Sinembargo, rei su palabra a prevalese kontra Joab. Pesei Joab a sali bai, a bai dor di henter Israel i a bolbe Jerusalem.

⁵I Joab a duna David e total di e senso di henter e pueblo. I na henter Israel tabatin un miyon shen mil homber ku tabata saka spada. I na Juda tabatin kuater shent'i setenta mil homber ku tabata saka spada.

⁶Ma e no a konta ni Levi ni Benjamin den nan, pasobra Joab tabata aborese e ordu di rei.

⁷I Dios a keda malkontentu ku e kos aki, asina ku El a dal Israel.

⁸I David a bisa Dios: "Mi a peka gravemente dor di hasi e kos aki. Ma awor, pa fabor, kita e inikidat di Bo sirbido, pasobra mi a aktua masha bobo mes."

⁹I SENOR a papia ku Gad, David su mirado, bisando:

¹⁰"Bai papia ku David, bisando: 'Asina SENOR ta bisa: "Tres kos Mi ta ofresebo; abo skohe un di nan, pa Mi laga esei sosode ku bo.

¹¹Asina Gad a bin serka David i a bis'e: "Asina SENOR ta bisa: 'Skohe pa bo mes

¹²sea tres ana di hamber, of tres luna di hui dilanti di bo enemigunan, mientras ku spada di bo enemigunan ta alkansabo, of tres dia di spada di SENOR, esta, pestilensia den e tera, i e angel di SENOR tresiendo destrukshon den henter e teritorio di Israel.' Pesei anto, pensa bon ki kontesta mi mester hiba pa Esun ku a mandami."

¹³I David a bisa Gad: "Mi ta den gran angustia; pa fabor, lagami kai den man di SENOR, pasobra Su miserikordianan ta masha grandi mes. Ma no lagami kai den man di hende."

¹⁴Asina SENOR a manda un pestilensia riba Israel; i setenta mil homber di Israel a muri.

¹⁵I Dios a manda un angel na Jerusalem pa destruie; ma ora ku e tabata kla pa destruie, SENOR a mira, i e kalamidat a duel E, i El a bisa e angel destruido: "Ta basta; baha bo man awor." I e angel di SENOR tabata para banda di e plenchi-di-bati-mainshi di Oman e jebuseo.

¹⁶E ora ei David a hisa kara wak i a mira e angel di SENOR para meimei di shelu i tera, ku su spada saka for di balina den su man, ekstendi riba Jerusalem. E ora ei David i e ansianonan, bisti na pana-di-saku, a tira nan kurpa abou ku nan kara te na suela.

¹⁷I David a bisa Dios: "No ta ami a duna ordu pa konta e pueblo? Di berdat, ta ami ta esun ku a peka i ku a hasi masha malu mes, ma e karnenan aki, ta kiko nan a hasi? O SENOR mi Dios, pa fabor, laga Bo man ta kontra mi i kontra e hendenan di e kas di mi tata, ma no kontra Bo pueblo, pa plaga no bin riba nan."

¹⁸E ora ei e angel di SENOR a ordena Gad pa bisa David ku David mester bai traha un altar na SENOR riba e plenchi-di-bati-mainshi di Oman e jebuseo.

¹⁹Asina David a subi bai konforme e palabra di Gad, ku el a papia den e nomber di SENOR.

²⁰Awor Oman a bira i a mira e angel, i su kuater yu hombernan ku tabata huntu kune a bai skonde. Anto Oman tabata bati mainshi.

²¹I ora David a bin serka Oman, Oman a hisa kara i a mira David; i el a sali for di e plenchi-di-bati-mainshi i a tira su kurpa abou ku su kara te na suela dilanti di David.

²²E ora ei David a bisa Oman: "Dunami e luga di e plenchi-di-bati-mainshi aki, pa mi traha un altar na SENOR riba dje. Dunamie pa su preis kompleto, pa e plaga wordu kita for di e pueblo."

²³I Oman a bisa David: "Tum'e pa bo, i laga senor mi rei hasi loke ta bon den su bista. Mira, lo mi duna e bueynan pa ofrendanan kima, e hermentnan-pa-bati-mainshi komo palu, i e mainshi pa e ofrenda di mainshi. Mi ta duna tur esaki."

²⁴Ma rei David a bisa Oman: "No, ma siguramente mi kier kumpr'e pa e preis kompleto, pasobra mi no kier tuma pa SENOR loke ta di bo, ni ofrese un ofrenda kima ku no ta kostami nada."

²⁵Asina David a duna Oman e peso di seis shen siklo di oro pa e luga.

²⁶E ora ei David a traha un altar na SENOR ayanan, i a ofrese ofrendanan kima i ofrendanan di pas. I el a invoka SENOR; i El a kontest'e ku kandela for di shelu riba e altar di ofrenda kima.

²⁷I SENOR a ordena e angel, i el a hinka su spada bek den su balina.

²⁸Na e momento ei, ora David a mira ku SENOR a kontest'e riba e plenchi-di-bati-mainshi di Oman e jebuseo, el a ofrese sakrifisio ayanan.

²⁹Pasobra e tabernakel di SENOR, ku Moises a traha den desierto, i e altar di ofrenda kima tabata na e luga haltu na Gabaon e tempu ei.

³⁰Ma David no por a bai dilanti di esaki pa konsulta ku Dios, pasobra e tabatin hopi temor pa e spada di e angel di SENOR.