Read Papantla Totonac 1 Kronikanan 22 Bible Online

1 Kronikanan 22 - Papantla Totonac bible

1 Kronikanan 22

¹Anto David a bisa: "Esaki ta e kas di SENOR Dios i esaki ta e altar di ofrenda kima pa Israel."

²Asina David a duna ordu pa reuni e stranheronan ku tabata na tera di Israel, i el a nombra kapdonan di piedra pa kap piedra pa traha e kas di Dios.

³I David a prepara kantidatnan grandi di heru pa traha e klabunan pa e portanan di e entradanan i pa e skarnirnan, i mas brons ku nan por a pisa,

⁴i palu di seda ku no por a wordu konta, pasobra e sidonionan i tirionan tabata trese kantidatnan grandi di palu di seda pa David.

⁵I David a bisa: "Mi yu Salomon ta hoben i sin eksperensia, i e kas ku mester wordu traha pa SENOR lo ta sumamente magnifiko, famoso i glorioso den bista di tur e nashonnan. Pesei mi kier hasi preparashon p'e." Asina David a hasi preparashonnan amplio prome ku su morto.

⁶E ora ei el a manda yama su yu homber Salomon i a dun'e enkargo pa traha un kas pa e SENOR Dios di Israel.

⁷I David a bisa Salomon: "Mi yu, mi tabatin intenshon di traha un kas na e nomber di SENOR mi Dios.

⁸Ma e palabra di SENOR a yega na mi, bisando: 'Bo a drama hopi sanger, i a hasi gueranan grandi; abo lo no traha un kas na Mi nomber, pasobra bo a drama asina hopi sanger riba tera Mi dilanti.

⁹Mira, lo nase pa bo un yu ku lo ta un homber di sosiegu; i lo Mi dun'e sosiegu for di tur su enemigunan tur ront di dje, pasobra su nomber lo ta Salomon, i lo Mi duna pas i trankilidat na Israel den su dianan.

¹⁰E lo traha un kas pa Mi nomber, i e lo ta Mi yu, i Ami lo ta su tata; i lo Mi stablese e trono di su reino riba Israel pa semper.'

¹¹"Awor, mi yu, SENOR sea ku bo pa bo prospera i traha e kas di SENOR bo Dios, meskos ku El a papia tokante di bo.

¹²Di berdat, ku SENOR dunabo prudensia i komprendementu i dunabo enkargo di Israel, pa bo kumpli ku e lei di SENOR bo Dios.

¹³E ora ei lo bo prospera, si bo perkura di kumpli ku e statutonan i ordenansanan ku SENOR a ordena Moises tokante di Israel. Sea fuerte i tene kurashi; no tene miedu ni desmaya.

¹⁴"At'awor, ku hopi esfuerso mi a prepara pa e kas di SENOR shen mil talento di oro i un miyon talento di plata, i brons i heru ku no por wordu pisa, pasobra nan ta na kantidat grandi; tambe mi a prepara palu i piedra, i abo mag anadi na nan.

¹⁵Ademas, tin hopi trahado serka bo: kapdo di piedra, mesla i karpinte, i hombernan eksperto den tur ramo di trabou.

¹⁶Na oro, plata, brons i heru no tin limite. Lant'ariba i traha, i ku SENOR sea ku bo."

¹⁷Tambe David a ordena tur e lidernan di Israel pa yuda su yu homber Salomon, bisando:

¹⁸"SENOR boso Dios no ta ku boso? I E no a duna boso sosiegu na tur banda? Pasobra El a entrega e habitantenan di e tera den mi man, i e tera ta keda someti dilanti di SENOR i dilanti di Su pueblo.

¹⁹Awor, pone boso kurason i boso alma pa buska SENOR boso Dios; lanta anto, i traha e santuario di SENOR Dios, pa boso por trese e arka di e aliansa di SENOR i e artikulonan-di-uzo santu di Dios den e kas ku lo wordu traha pa e nomber di SENOR."