Read Papantla Totonac 1 Kronikanan 23 Bible Online

1 Kronikanan 23 - Papantla Totonac bible

1 Kronikanan 23

¹Awor ora David a bira bieu, el a hasi su yu homber Salomon rei riba Israel.

²I el a reuni tur e lidernan di Israel huntu ku e saserdotenan i e levitanan.

³I e levitanan a wordu konta for di trinta ana p'ariba, i nan kantidat, segun senso, tabata trint'i ocho mil homber.

⁴Di esakinan bint'i kuater mil mester a dirigi e trabou di e kas di SENOR; i seis mil tabata ofisial i hues,

⁵i kuater mil tabata wardado-di-porta, i kuater mil tabata alaba SENOR ku e instrumentnan ku David a laga traha pa duna alabansa.

⁶I David a parti nan den grupo, segun e yu hombernan di Levi: Gerson, Koat i Merari.

⁷Di e gersonitanan tabatin Laadan i Simei.

⁸E yu hombernan di Laadan tabata: Jehiel, e prome, Zetam i Joel, tres.

⁹E yu hombernan di Simei tabata: Selomit, Haziel i Haran, tres. Esakinan tabata e kabesnan di e kasnan di e tatanan di Laadan.

¹⁰I e yu hombernan di Simei tabata: Jahat, Zina, Jeus i Beria. E kuaternan aki tabata e yu hombernan di Simei.

¹¹I Jahat tabata e prome, Ziza e di dos; ma Jeus i Beria no tabatin hopi yu homber, asina nan a bira un famia, un grupo.

¹²E yu hombernan di Koat tabata kuater: Amram, Izhar, Hebron i Uziel.

¹³E yu hombernan di Amram tabata Aaron i Moises. I Aaron a wordu aparta pa e wordu santifika komo masha santu mes, e ku su yu hombernan pa semper, pa kima sensia dilanti di SENOR, pa sirbié i pa bendishona den Su nomber pa semper.

¹⁴Ma pa loke ta Moises, e homber di Dios, su yu hombernan a wordu konta den e tribu di Levi.

¹⁵E yu hombernan di Moises tabata Gerson i Eliezer.

¹⁶E yu homber di Gerson tabata Sebuel, e hefe.

¹⁷I e yu homber di Eliezer tabata Rehabias, e hefe; i Eliezer no tabatin mas yu homber, ma e yu hombernan di Rehabias tabata masha hopi mes.

¹⁸E yu homber di Izhar tabata Selomit, e hefe.

¹⁹E yu hombernan di Hebron tabata Jerias, e prome; Amarias, e di dos; Jahaziel, e di tres; i Jekaman, e di kuater.

²⁰E yu hombernan di Uziel tabata Mikaia, e prome i Isias, e di dos.

²¹E yu hombernan di Merari tabata Mahli i Musi. E yu hombernan di Mahli tabata Eleazar i Kis.

²²Anto Eleazar a muri i no tabatin yu homber, sino solamente yu muhe; asina nan rumannan, e yu hombernan di Kis, a tuma nan komo esposa.

²³E yu hombernan di Musi tabata tres: Mahli, Edar i Jeremot.

²⁴Esakinan tabata e yu hombernan di Levi segun e kasnan di nan tatanan, e kabesnan di e kasnan di e tatanan di esnan di nan ku a wordu konta konforme e kantidat di nomber segun nan senso, ku tabata hasi e trabou pa sirbishi di e kas di SENOR, for di binti ana p'ariba.

²⁵Pasobra David a bisa: "SENOR Dios di Israel a duna Su pueblo sosiegu, i E ta biba na Jerusalem pa semper.

²⁶I tambe, e levitanan no tin mester di karga e tabernakel mas i tur e artikulonan-di-uzo pa su sirbishi."

²⁷Pasobra segun e ultimo palabranan di David e yu hombernan di Levi a wordu konta, for di binti ana p'ariba.

²⁸Pasobra nan tarea ta pa asisti e yu hombernan di Aaron den e sirbishi di e kas di SENOR, den e plenchinan, den e kambernan i den e purifikashon di tur e kosnan santu, e trabou di sirbishi den e kas di Dios,

²⁹i ku e pan di proposishon, e harina fini pa un ofrenda di mainshi, e oblea sin zurdeg, of loke ta wordu prepara riba kasuela, of loke ta bon meskla, i tur midi di kantidat i tamano.

³⁰I nan mester para tur mainta pa gradisi i pa alaba SENOR, i meskos atardi;

³¹i pa ofrese tur ofrenda kima na SENOR, riba e dianan di sabat, e lunanan nobo i e fiestanan stipula, segun e kantidat i konforme e ordenansa duna tokante di nan, kontinuamente dilanti di SENOR.

³²Asina nan mester atende e tent di reunion, atende e luga santu i atende e yu hombernan di Aaron, nan rumannan, pa e sirbishi di e kas di SENOR.