Read Papantla Totonac 1 Kronikanan 28 Bible Online

1 Kronikanan 28 - Papantla Totonac bible

1 Kronikanan 28

¹Awor David a reuni tur e ofisialnan di Israel na Jerusalem, e prensnan di e tribunan i e komandantenan di e divishonnan ku tabata sirbi rei, e komandantenan di milnan i e komandantenan di shennan, i e atministradonan di tur propiedat i bestia di kria ku tabata pertenese na rei i su yu hombernan, huntu ku e ofisialnan i e hombernan poderoso, tur e hombernan balente.

²E ora ei rei David a lanta para i a bisa: "Mi rumannan i mi pueblo, skuchami. Mi tabatin intenshon di traha un kas permanente pa e arka di e aliansa di SENOR i pa e banki-pa-pia di nos Dios. Asina mi a hasi preparashonnan pa trah'e.

³Ma Dios a bisami: 'Abo lo no traha un kas pa Mi nomber, pasobra bo ta un homber di guera i bo a drama sanger.'

⁴"Tog, SENOR, e Dios di Israel, a skohemi for di henter e kas di mi tata pa ta rei riba Israel pa semper. Pasobra El a skohe Juda pa ta lider, i for di e kas di Juda, mi tata su kas, i entre e yu hombernan di mi tata El a hiba gustu den mi pa hasimi rei di henter Israel.

⁵I di tur mi yu hombernan (pasobra SENOR a dunami hopi yu homber), El a skohe mi yu Salomon pa sinta riba trono di e reino di SENOR riba Israel.

⁶I El a bisami: 'Bo yu Salomon ta esun ku lo traha Mi kas i Mi plenchinan; pasobra Mi a skoh'e pa ta un yu pa Mi, i Ami lo ta un tata p'e.

⁷I lo Mi stablese su reino pa semper, si e persevera pa kumpli ku Mi mandamentunan i Mi ordenansanan, manera riba dia djawe.'

⁸"Asina anto, den bista di henter Israel, e asamblea di SENOR, i pa nos Dios tende, warda i skudrina tur e mandamentunan di SENOR bo Dios, pa bo por posee e bon tera i lagu'e komo erensia pa bo yu hombernan despues di bo pa semper.

⁹"Pa loke t'abo, mi yu Salomon, konose e Dios di bo tata, i sirbié ku henter bo kurason i ku un alma boluntario; pasobra SENOR ta skudrina tur kurason i ta komprende tur intenshon di e pensamentunan. Si bo busk'E, E lo lagabo han'E; ma si bo bandon'E, E lo rechasabo pa semper.

¹⁰Pensa bon awor, pasobra SENOR a skohebo pa traha un kas pa e santuario; tene kurashi i aktua."

¹¹E ora ei David a duna su yu homber Salomon e plan di e veranda di e tempel, su edifisionan, su depositonan, su kambernan ariba, su kambernan paden i e luga pa e propisiatorio;

¹²i e plan di tur loke e tabatin pensa pa e plenchinan di e kas di SENOR, i pa tur e kambernan tur ront, pa e depositonan di e kas di Dios, i pa e depositonan di e kosnan dedika;

¹³tambe pa e divishonnan di e saserdotenan i e levitanan i pa henter e trabou di sirbishi di e kas di SENOR i pa tur e artikulonan-di-uzo di sirbishi den e kas di SENOR;

¹⁴pa e artikulonan-di-uzo di oro, e peso di oro pa tur artikulo-di-uzo pa tur sorto di sirbishi; pa e artikulonan-di-uzo di plata, e peso di plata pa tur artikulo-di-uzo pa tur sorto di sirbishi;

¹⁵i e peso di oro pa e kandelanan di oro i nan lampinan di oro, ku e peso di kada kandela i su lampinan, i e peso di plata pa e kandelanan di plata, ku e peso di kada kandela i su lampinan konforme e uzo di kada kandela;

¹⁶i e oro na peso pa e mesanan di e pan di proposishon, pa kada mesa; i plata pa e mesanan di plata;

¹⁷i e forkinan, e komchinan i e kanikanan di oro puru, i pa e komchinan di oro, segun e peso di kada komchi; i pa e komchinan di plata, segun e peso di kada komchi;

¹⁸i pa e altar di sensia, oro refina segun peso; i oro pa e konstrukshon di e garoshi, esta, e kerubinnan, ku tabatin nan halanan habri, i ku tabata kubri e arka di e aliansa di SENOR.

¹⁹"Tur esaki," David a bisa, "Senor a hasimi komprende por eskrito, dor di Su man ku tabata riba mi, tur e detayenan di e plan aki."

²⁰E ora ei David a bisa su yu Salomon: "Sea fuerte, tene kurashi i aktua; no tene miedu ni desmaya, pasobra SENOR Dios, mi Dios, ta ku bo. E lo no fayabo, ni bandonabo te ora tur e trabou pa e sirbishi di e kas di SENOR keda kla.

²¹At'awor, tin e divishonnan di e saserdotenan i e levitanan pa henter e sirbishi di e kas di Dios, i kada homber boluntario i kapasita lo ta ku bo den tur e trabou pa tur sorto di sirbishi. Tambe e ofisialnan i henter e pueblo lo ta kompletamente na bo ordu."