Read Papantla Totonac 1 Kronikanan 29 Bible Online

1 Kronikanan 29 - Papantla Totonac bible

1 Kronikanan 29

¹E ora ei rei David a bisa henter e asamblea: "Mi yu Salomon, e uniko ku Dios a skohe, ta hoben ainda i sin eksperensia i e trabou ta grandi; pasobra e tempel no ta pa hende, sino pa SENOR Dios.

²Awor ku tur mi abilidat mi a provee pa e kas di mi Dios: oro pa e kosnan di oro, plata pa e kosnan di plata i brons pa e kosnan di brons, heru pa e kosnan di heru, palu pa e kosnan di palu, piedra di oneks i piedra presioso pa dorna, piedra pretu i piedra di varios kolo, i tur sorto di piedra presioso i alabaster na abundansia.

³I ademas, pa motibu di e delisia ku mi tin den e kas di mi Dios, mi ta duna e kas di mi Dios e tesoro ku mi tin na oro i plata, fuera di tur loke mi a provee kaba pa e tempel santu:

⁴tres mil talento di oro, di e oro di Ofir, i shete mil talento di plata refina, pa fura e murayanan di e edifisionan;

⁵oro pa e kosnan di oro, i plata pa e kosnan di plata, esta, pa tur e trabou ku e artesanonan a hasi. Ken anto ta boluntario pa konsagra su mes na SENOR awe?"

⁶E ora ei e lidernan di e kasnan di e tatanan, e prensnan di e tribunan di Israel, e komandantenan di milnan i di shennan, huntu ku e atministradonan di e trabou di rei, a duna ofrenda boluntariamente;

⁷i pa e sirbishi di e kas di Dios nan a duna sinku mil talento, dies mil drakma di oro, dies mil talento di plata, diesocho mil talento di brons i shen mil talento di heru.

⁸I esnan ku tabatin piedra presioso a duna esakinan pa e luga-di-warda-tesoro di e kas di SENOR, bou di kuido di Jehiel e gersonita.

⁹E ora ei e pueblo a regosiha, pasobra nan a duna ofrenda boluntariamente, pasobra di henter nan kurason nan a duna SENOR nan ofrenda, i rei David tambe a regosiha masha.

¹⁰Asina David a bendishona SENOR dilanti di henter e asamblea, i David a bisa: "Bo ta bendishona, O SENOR, Dios di Israel nos tata, pa semper i semper.

¹¹Di Bo, O SENOR, ta e grandesa, e poder, e gloria, e viktoria i e mahestat, di berdat, tur loke ta den shelu i riba tera; e dominio ta di Bo, O SENOR, i Abo ta halsa Bo mes komo kabes riba tur kos.

¹²Tantu rikesa komo onor ta bin for di Bo, i Bo ta reina riba tur kos, i den Bo man tin poder i forsa; i ta den Bo man pa engrandese i pa fortalese kada un.

¹³Pesei anto, nos Dios, nos ta gradisiBo i ta alaba Bo nomber glorioso.

¹⁴"Ma ta ken mi ta, i ta ken mi pueblo ta, ku nos lo por a duna un ofrenda generoso manera esun aki? Pasobra tur kos ta bin for di Bo i ta for di Bo man nos a dunaBo.

¹⁵Pasobra nos ta stranhero i peregrino dilanti di Bo, manera tur nos tatanan tabata; nos dianan riba tera ta manera un sombra i no tin speransa.

¹⁶O SENOR nos Dios, tur e abundansia aki ku nos a provee pa traha un kas pa Bo nomber santu ta bin for di Bo man, i tur kos ta di Bo.

¹⁷Komo mi sa, O mi Dios, ku Bo ta skudrina kurason i ku Bo tin delisia den rektitut, ami, den e integridat di mi kurason, a ofrese tur e kosnan aki boluntariamente. I awor ku goso mi a mira Bo pueblo, ku ta aki presente, duna nan ofrendanan boluntariamente na Bo.

¹⁸O SENOR, e Dios di Abraham, Isaak i Israel, nos tatanan, preserva esaki pa semper den e intenshonnan di kurason di Bo pueblo, i dirigi nan kurason na Bo.

¹⁹I duna mi yu homber Salomon un kurason perfekto pa warda Bo mandamentunan, Bo testimonionan i Bo statutonan, i pa kumpli ku nan tur, i pa traha e tempel, pa kual mi a hasi provishon."

²⁰E ora ei David a bisa henter e asamblea: "Awor, bendishona SENOR boso Dios." I henter e asamblea a bendishona SENOR, e Dios di nan tatanan, i a buig te na suela i a duna reverensia na SENOR i na rei.

²¹I su manise nan a ofrese sakrifisionan na SENOR i a ofrese ofrendanan kima na SENOR: mil bishe machu, mil karne chubatu i mil lamchi, huntu ku nan ofrendanan di bibida i sakrifisionan na abundansia pa henter Israel.

²²Asina nan a kome i bebe e dia ei dilanti di SENOR ku gran alegria. I nan a hasi Salomon, yu homber di David, rei pa di dos biaha, i nan a ungie komo gobernante pa SENOR i Sadok komo saserdote.

²³E ora ei Salomon a sinta riba e trono di SENOR komo rei na luga di su tata David; i e tabata prospera, i henter Israel tabata obedes'e.

²⁴I tur e ofisialnan, e hombernan poderoso, i tambe tur e yu hombernan di rei David, a hura fieldat na rei Salomon.

²⁵I SENOR a halsa Salomon masha haltu mes den bista di henter Israel, i a dun'e tal mahestat real ku ningun rei prome kune no tabatin na Israel.

²⁶Asina David, yu homber di Isai, a reina riba henter Israel.

²⁷I e temporada ku el a reina riba Israel tabata kuarenta ana; el a reina shete ana na Hebron i trint'i tres ana na Jerusalem.

²⁸E ora ei el a muri na un edat hopi avansa, yen di dia, rikesa i onor; i su yu homber Salomon a reina na su luga.

²⁹Awor e echonan di rei David, for di prome te na ultimo, ta para skirbi den e kronikanan di Samuel, e mirado, den e kronikanan di Natan, e profeta, i den e kronikanan di Gad, e mirado,

³⁰huntu ku henter su reinado, su poder i e sirkumstansianan ku a bin riba dje, riba Israel i riba tur e reinonan di e teranan.