Read Papantla Totonac 1 Kronikanan 5 Bible Online

1 Kronikanan 5 - Papantla Totonac bible

1 Kronikanan 5

¹Awor e yu hombernan di Ruben, e primogenito di Israel (pasobra e tabata e primogenito, ma pasobra el a desonra kama di su tata, su derecho di primogenitura a wordu duna na e yu hombernan di Jose, yu homber di Israel, asina ku e no ta registra den e genealogia, konforme e primogenitura.

²Ounke Juda a prevalese riba su ruman hombernan, i for di dje a sali e lider, tog e derecho di primogenitura tabata pertenese na Jose),

³e yu hombernan di Ruben, e primogenito di Israel tabata Hanok, Palu, Hezron i Karmi.

⁴E yu hombernan di Joel tabata: su yu homber Semaias; Semaias su yu homber, Gog; Gog su yu homber, Simei;

⁵Simei su yu homber, Mikaia; Mikaia su yu homber, Reaia; Reaia su yu homber, Baal;

⁶Baal su yu homber, Beera, kende Tiglat-pileser, rei di Asiria, a hiba den eksilio; e tabata lider di e rubenitanan.

⁷I su ruman hombernan segun nan famianan, den e genealogia di nan generashonnan, tabata: hefe Jeiel, despues Zakarias

⁸i Bela, yu homber di Azaz, yu homber di Sema, yu homber di Joel, kende tabata biba na Aroer, te na Nebo i Baal-meon.

⁹I parti pariba e tabata biba na rant di e desierto, for di Riu Eufrates, pasobra nan bestianan di kria a oumenta na tera di Galaad.

¹⁰I den e dianan di Saul nan a hasi guera ku e hagarenonan, kendenan a muri na nan man, asina ku nan a bai biba den e tentnan di e hagarenonan, na henter e tera pariba di Galaad.

¹¹Awor e yu hombernan di Gad tabata biba enfrente di nan, na tera di Basan, te na Salka.

¹²Joel tabata e hefe, i Safan e di dos, despues Jaanai i Safat na Basan.

¹³I nan ruman hombernan di e kasnan di nan tatanan tabata Mikael, Mesulam, Seba, Jorai, Jakan, Zia i Heber, shete na tur.

¹⁴Esakinan tabata e yu hombernan di Abihail, yu homber di Huri, yu homber di Jaroa, yu homber di Galaad, yu homber di Mikael, yu homber di Jesisai, yu homber di Jahdo, yu homber di Buz;

¹⁵Ahi, yu homber di Abdiel, yu homber di Guni, tabata e kabes di e kasnan di nan tatanan.

¹⁶I nan tabata biba na Galaad, na Basan i den su pueblitonan i na tur e luganan di yerba berde di Saron, te na nan fronteranan.

¹⁷Tur esakinan tabata inskribi den e genealogianan den e dianan di Jotam, rei di Juda, i den e dianan di Jeroboam, rei di Israel.

¹⁸E yu hombernan di Ruben i e gaditanan i e mitar tribu di Manases, hombernan balente, hombernan ku tabata karga eskudo i spada, ku tabata tira ku bog i ku tabata kapasita pa bringa den bataya, tabata kuarent'i kuater mil shete shent'i sesenta ku a bai guera.

¹⁹I nan a hasi guera kontra e hagarenonan, Jetur, Nafis i Nodab.

²⁰I nan a wordu yuda kontra nan, i e hagarenonan i tur ku tabata huntu ku nan a wordu entrega den nan man, pasobra nan a sklama na Dios den bataya, i El a skucha nan, pasobra nan a pone nan konfiansa den djé.

²¹I nan a bai ku nan bestianan di kria: sinkuenta mil kamel, dos shent'i sinkuenta mil karne, dos mil buriku, i shen mil hende.

²²I hopi a muri, pasobra e guera tabata di Dios. I nan a stablese nan mes na nan luga te na e eksilio.

²³Awor e yu hombernan di e mitar tribu di Manases tabata biba na e tera; nan tabata numeroso, for di Basan te na Baal-hermon, Senir i Seru Hermon.

²⁴I esakinan tabata e kabesnan di e kasnan di nan tatanan: Efer, Isi, Eliel, Azriel, Jeremias, Hodavias i Jahdiel, hombernan poderoso i balente, hombernan famoso, kabesnan di e kasnan di nan tatanan.

²⁵Ma nan a peka kontra e Dios di nan tatanan, i a prostitui nan mes dor di sigui e diosnan di e pueblonan di e tera, ku Dios a destrui nan dilanti.

²⁶Asina e Dios di Israel a anima e spiritu di Pul, rei di Asiria (esta, Tiglat-pileser, rei di Asiria), kende a hiba e rubenitanan, e gaditanan i e mitar tribu di Manases den eksilio. El a hiba nan na Hala, Habor, Hara, i na Riu Gozan, te dia djawe.