Read Papantla Totonac 2 Kronikanan 10 Bible Online

2 Kronikanan 10 - Papantla Totonac bible

2 Kronikanan 10

¹E ora ei Roboam a bai Sikem, pasobra henter Israel a bin Sikem pa hasie rei.

²I a sosode ku ora Jeroboam, yu homber di Nabat, a tende di esaki (pasobra e tabata na Egipto kaminda el a hui bai for di presensia di rei Salomon), Jeroboam a bolbe for di Egipto.

³Asina nan a manda yam'e. Ora Jeroboam i henter Israel a bin, nan a papia ku Roboam, bisando:

⁴"Bo tata a hasi nos yugo pisa; pesei anto, hasi e trabou duru di bo tata i su yugo pisa ku el a pone riba nos mas lihe, i nos lo sirbibo."

⁵I el a bisa nan: "Bolbe serka mi despues di tres dia." Asina e pueblo a bai.

⁶E ora ei rei Roboam a konsulta ku e ansianonan ku a sirbi su tata Salomon tempu ku e tabata na bida ainda, bisando: "Kiko boso ta konsehami pa kontesta e pueblo aki?"

⁷I nan a papia kune, bisando: "Si bo kier ta karinoso ku e pueblo aki, si bo kier komplase nan i papia bon palabra ku nan, e ora ei nan lo ta bo sirbido pa semper."

⁸Ma el a rechasa e konseho ku e ansianonan a dun'e, i a konsulta ku e hobennan ku a lanta huntu kune i ku tabata sirbie.

⁹Asina el a bisa nan: "Ki konseho boso ta duna pa nos kontesta e pueblo aki ku a papia ku mi, bisando: 'Hasi e yugo ku bo tata a pone riba nos mas lihe'?"

¹⁰I e hobennan ku a lanta huntu kune a papia kune, bisando: "Asina bo mester bisa e pueblo ku a papia ku bo, bisando: 'Bo tata a hasi nos yugo pisa, ma abo hasie mas lihe pa nos.' Asina bo mester bisa nan: 'Mi dede chikitu ta mas diki ku mi tata su lomo!

¹¹Awor mientras ku mi tata a pone karga di un yugo pisa riba boso, ami ta bai anadi na boso yugo; mi tata a disiplina boso ku zwip, ma ami ta bai disiplina boso ku skorpion.'"

¹²Asina Jeroboam i henter e pueblo a bin serka Roboam riba e di tres dia, manera rei a papia, bisando: "Bolbe serka mi riba e di tres dia."

¹³I rei a kontesta nan brutu, i rei Roboam a rechasa konseho di e ansianonan.

¹⁴I el a papia ku nan konforme e konseho di e hobennan, bisando: "Mi tata a hasi boso yugo pisa, ma ami ta bai anadi na dje; mi tata a disiplina boso ku zwip, ma ami ta bai disiplina boso ku skorpion."

¹⁵Asina rei no a skucha e pueblo, pasobra Dios a destina esei, pa SENOR por a stablese Su palabra ku El a papia ku Jeroboam, yu homber di Nabat, pa medio di Ahias e silonita.

¹⁶I ora henter Israel a mira ku rei no a skucha nan, e pueblo a kontesta rei, bisando: "Ki parti nos tin ku David? Nos no tin erensia den e yu homber di Isai. Kada hende bai su tent, O Israel; awor perkura pa bo mes kas, David." Asina henter Israel a bai na nan tentnan.

¹⁷Ma Roboam tabata reina riba e yunan di Israel ku tabata biba den e statnan di Juda.

¹⁸E ora ei rei Roboam a manda Hadoram, kende tabatin enkargo di e trabou forsa, i e yunan di Israel a piedr'e mata. I rei Roboam a pura pa subi su garoshi pa hui bai Jerusalem.

¹⁹Asina Israel a rebeldia kontra e kas di David te dia dj awe.