Read Papantla Totonac 2 Kronikanan 13 Bible Online

2 Kronikanan 13 - Papantla Totonac bible

2 Kronikanan 13

¹Den e di diesocho ana di rei Jeroboam, Abias a bira rei di Juda.

²El a reina tres ana na Jerusalem; i nomber di su mama tabata Mikaias, yu muhe di Uriel di Gabaa. I tabatin guera entre Abias i Jeroboam.

³I Abias a kuminsa e bataya ku un ehersito di guereronan balente, kuater shen mil homber skohi, mientras ku Jeroboam a bai para den ordu di bataya kontra dje ku ocho shen mil homber skohi, ku tabata guereronan balente.

⁴E ora ei Abias a bai para riba Seru Zemaraim, ku ta keda den e serunan di Efrain, i a bisa: "Skuchami, Jeroboam i henter Israel:

⁵boso no sa ku SENOR Dios di Israel a duna e gobernashon riba Israel pa semper na David i su yu hombernan, pa medio di un aliansa di salu?

⁶Ma Jeroboam, yu homber di Nabat, sirbido di Salomon, yu homber di David, a lanta i a rebeldia kontra su shon;

⁷i hombernan perverso a uni kune, bandidonan ku a resulta muchu fuerte pa Roboam, yu homber di Salomon, tempu ku e tabata hoben i timido i no por a defende su mes kontra nan.

⁸"Asina awor boso tin intenshon di resisti e reino di SENOR pa medio di e yu hombernan di David, pasobra boso ta un multitut grandi, i pasobra boso tin huntu ku boso e bishenan di oro ku Jeroboam a traha komo diosnan pa boso.

⁹Boso no a kore ku e saserdotenan di SENOR, e yu hombernan di Aaron i e levitanan, i a nombra saserdotenan pa boso mes manera e pueblonan di otro teranan? Ken ku bin pa konsagra su mes ku un bishe machu i shete karne chubatu, asta e por bira saserdote di loke no ta diosnan.

¹⁰"Ma pa loke ta nos, SENOR ta nos Dios, i nos no a bandon'E; e yu hombernan di Aaron ta sirbi SENOR komo saserdote, i e levitanan ta hasi nan trabou.

¹¹I tur mainta i atardi nan ta kima ofrendanan kima i sensia aromatiko na SENOR, i e pan di proposishon ta wordu poni riba e mesa limpi, i e kandela di oro ku su lampinan ta kla pa sende tur atardi; pasobra nos ta kumpli ku e enkargo di SENOR nos Dios, ma boso a bandon'E.

¹²Awor mira, Dios ta ku nos na kabes, i Su saserdotenan ku trompet di bataya pa zona alarma kontra boso. O yunan di Israel, no bringa kontra SENOR Dios di boso tatanan, pasobra boso lo no tin eksito."

¹³Ma Jeroboam a skonde pa ataka di patras, asina ku Israel tabata dilanti di Juda i e trampa tabata nan tras.

¹⁴Ora Juda a bira wak, ata, nan a wordu ataka di padilanti i di patras; i nan a sklama na SENOR, i e saserdotenan a supla e trompetnan.

¹⁵E ora ei e hombernan di Juda a dal un gritu di guera, i ora ku e hombernan di Juda a dal e gritu di guera, a sosode ku Dios a derota Jeroboam i henter Israel dilanti di Abias i Juda.

¹⁶I ora ku e yunan di Israel a hui dilanti di Juda, Dios a entrega nan den nan man.

¹⁷I Abias i su hendenan a derota nan ku un matansa grandi; i asina sinku shen mil homber skohi di Israel a muri.

¹⁸Asina e yunan di Israel a wordu someti den e tempu ei, i e yunan di Juda a vense, pasobra nan a konfia den SENOR, e Dios di nan tatanan.

¹⁹I Abias a persigui Jeroboam, i a kaptura diferente stat for di dje: Bet-el ku su pueblitonan, Jesana ku su pueblitonan, i Efrain ku su pueblitonan.

²⁰I Jeroboam no a rekobra forsa mas den e dianan di Abias; i SENOR a afligie i el a muri.

²¹Ma Abias a bira poderoso, i a tuma dieskuater esposa pa su mes; i a bira tata di bint'i dos yu homber i dieseis yu muhe.

²²Awor e demas echonan di Abias, su kamindanan i su palabranan, ta para skirbi den e relatonan di profeta Ido.