Read Papantla Totonac 2 Kronikanan 14 Bible Online

2 Kronikanan 14 - Papantla Totonac bible

2 Kronikanan 14

¹Asina Abias a bai sosega serka su tatanan, i nan a der'e den e stat di David, i su yu homber Asa a bira rei na su luga. Durante di su dianan e tera tabata trankil pa dies ana.

²I Asa a hasi loke ta bon i korekto den bista di SENOR su Dios,

³pasobra el a kita e altarnan stranhero i e luganan haltu, a basha e pilarnan sagrado abou, a kap e imagennan di Asera

⁴i a ordena Juda pa buska e SENOR Dios di nan tatanan i pa warda e lei i e mandamentu.

⁵Tambe el a kita e luganan haltu i e altarnan di sensia for di tur e statnan di Juda. I e reino a keda trankil bou di su dominio.

⁶I el a traha statnan fortifika na Juda, komo ku e tera tabata trankil, i no tabatin ningun hende na guera kune durante di e ananan ei, pasobra SENOR a dun'e sosiegu.

⁷Pasobra el a bisa Juda: "Laga nos traha e statnan aki i rondona nan ku muraya i toren, porta i bara. Ainda e tera ta di nos, pasobra nos a buska SENOR nos Dios; nos a busk'E, i El a duna nos sosiegu na tur banda." Asina nan a konstrui i a prospera.

⁸Awor Asa tabatin un ehersito di tres shen mil homber for di Juda ku tabata karga eskudo i lansa grandi, i dos shent'i ochenta mil homber for di Benjamin ku tabata karga eskudo i ku tabata span bog; nan tur tabata guerero balente.

⁹Awor Zera e etiope a sali kontra nan ku un ehersito di un miyon homber i tres shen garoshi, i el a bin Maresa.

¹⁰Asina Asa a sali pa kontr'e, i nan a pone nan mes den ordu di bataya den e vaye di Sefata na Maresa.

¹¹E ora ei Asa a sklama na SENOR su Dios i a bisa: "SENOR, no tin ni un fuera di Bo pa yuda den e bataya entre esun poderoso i esnan ku no tin forsa; asina, yuda nos, O SENOR nos Dios, pasobra ta den Bo nos ta konfia, i den Bo nomber nos a bin kontra e multitut aki. O SENOR, Abo ta nos Dios; no laga hende prevalese kontra Bo."

¹²Asina SENOR a derota e etiopenan dilanti di Asa i dilanti di Juda, i e etiopenan a hui.

¹³I Asa i e pueblo ku tabata huntu kune a persigui nan te na Gerar; i asina hopi etiope a kai ku nan no por a rekupera, pasobra nan a wordu destrui dilanti di SENOR i dilanti di Su ehersito. I nan a bai ku masha hopi botin.

¹⁴I nan a destrui tur e statnan ront di Gerar, pasobra e teror di SENOR a kai riba nan; i nan a plunder tur e statnan, pasobra tabatin hopi botin den nan.

¹⁵Tambe nan a mata esnan ku tabatin kria di bestia, i nan a bai ku kantidatnan grandi di karne i kamel. E ora ei nan a bolbe Jerusalem.