Read Papantla Totonac 2 Kronikanan 15 Bible Online

2 Kronikanan 15 - Papantla Totonac bible

2 Kronikanan 15

¹Awor e Spiritu di Dios a bin riba Azarias, yu homber di Oded,

²i el a sali bai pa kontra ku Asa i a bis'e: "Skuchami, Asa, i henter Juda i Benjamin: SENOR ta ku boso ora boso ta kuné. I si boso busk'E, E lo laga boso han'E; ma si boso bandon'E, E lo bandona boso.

³I pa hopi dia Israel tabata sin e Dios berdadero, i sin un saserdote pa sina nan i sin lei.

⁴Ma den nan angustia nan a bolbe serka e SENOR Dios di Israel, i nan a busk'E, i El a laga nan han'E.

⁵I den e tempunan ei no tabatin pas pa esun ku tabata sali, ni pa esun ku tabata drenta, pasobra tabatin hopi aflikshon riba tur e habitantenan di e teranan.

⁶I un nashon tabata aplasta otro nashon, i un stat otro stat, pasobra Dios tabata afligi nan ku tur sorto di aflikshon.

⁷Ma boso, sea fuerte i no perde kurashi, pasobra tin rekompensa pa boso trabou."

⁸Awor ora Asa a tende e palabranan aki i e profesia ku Azarias, yu homber di profeta Oded, a papia, el a tuma kurashi i a kita e ldolonan abominabel for di henter tera di Juda i Benjamin i for di e statnan ku el a kaptura den e serunan di Efrain. E ora ei el a restora e altar di SENOR ku tabata keda dilanti di e veranda di SENOR.

⁹I el a reuni henter Juda i Benjamin i esnan for di Efrain, Manases i Simeon, kendenan tabata biba serka nan, pasobra hopi hende di Israel a pasa ofer pa Asa su banda, ora nan a mira ku SENOR su Dios tabata kune.

¹⁰Asina nan a reuni na Jerusalem den e di tres luna di e di diesinku ana di e reinado di Asa.

¹¹I e dia ei nan a sakrifika na SENOR shete shen buey i shete mil karne for di e botin ku nan a trese.

¹²I nan a sera e aliansa pa buska e SENOR Dios di nan tatanan ku henter nan kurason i alma;

¹³i ken ku no kier a buska e SENOR Dios di Israel mester a wordu mata, sea chikitu of grandi, homber of muhe.

¹⁴Ademas, nan a hasi un huramentu na SENOR na bos haltu, ku gritamentu, ku trompet i ku kachu.

¹⁵I henter Juda a regosiha tokante di e huramentu, pasobra nan a hura ku henter nan kurason i a busk'E sinseramente, i El a laga nan han'E. Asina SENOR a duna nan sosiegu na tur banda.

¹⁶Tambe el a kita Maaka, mama di rei Asa, for di e puesto di reina mama, pasobra Maaka a traha un imagen horibel di Asera, i Asa a kap su imagen horibel bash'abou, a garn'e i a kim'e na Roi Kedron.

¹⁷Ma e luganan haltu no a wordu kita for di Israel; sinembargo, Asa su kurason tabata sin kulpa henter su bida.

¹⁸I el a trese den e kas di Dios e kosnan ku su tata a dedika i e kosnan ku e mes a dedika: plata, oro i artikulonan-di-uzo.

¹⁹I no tabatin mas guera te na e di trint'i sinku ana di Asa su reinado.