Read Papantla Totonac 2 Kronikanan 16 Bible Online

2 Kronikanan 16 - Papantla Totonac bible

2 Kronikanan 16

¹Den e di trint'i seis ana di Asa su reinado, Baasa, rei di Israel, a lanta kontra Juda i a fortifika Rama, pa no laga ningun hende sali ni drenta serka Asa, rei di Juda.

²E ora ei Asa a saka plata i oro for di e luganan-di-warda-tesoro di e kas di SENOR i e kas di rei i a manda nan pa Ben-adad, rei di Siria, kende tabata biba na Damasko, bisando:

³"Laga tin un aliansa entre abo i ami, manera tin entre mi tata i bo tata. Mira, mi a manda plata i oro pa bo; bai, kibra bo aliansa ku Baasa, rei di Israel, pa e retira for di mi."

⁴Asina Ben-adad a skucha rei Asa i a manda e komandantenan di su ehersitonan kontra e statnan di Israel, i nan a konkista Ijon, Dan, Abel-maim i tur e statnan di deposito di Neftali.

⁵I a sosode ku ora Baasa a tende di esaki, el a stop di fortifika Rama i a para su trabou.

⁶Anto rei Asa a trese henter Juda, i nan a kohe e piedranan di Rama i su palunan ku kualnan Baasa tabata trahando, bai kune; i ku esakinan el a fortifika Geba i Mizpa.

⁷Na e tempu ei Hanani e mirado a bin serka Asa, rei di Juda, i a bis'e: "Pasobra bo a depende riba rei di Siria i bo no a depende riba SENOR bo Dios, pesei e ehersito di rei di Siria a skapa for di bo man.

⁸No t'asina ku e etiopenan i e libionan tabata un ehersito inmenso ku masha hopi garoshi i koredo di kabai? Sinembargo, pasobra bo a konfia den SENOR, El a entrega nan den bo man.

⁹Pasobra wowo di SENOR ta move bai bin dor di henter tera, pa E por sostene fuertemente esnan ku nan kurason ta kompletamente di djé. Bo a aktua ku bobedat den esaki. Di berdat, for di awor padilanti siguramente lo bo tin guera."

¹⁰E ora ei Asa a rabia ku e mirado i a ser'e den prizon, pasobra e tabata furioso riba dje pa e motibu aki. I Asa a oprimi algun hende di e pueblo na e mesun tempu.

¹¹I awor, e echonan di Asa, for di prome te delaster, ata, nan ta para skirbi den e Buki di reinan di Juda i Israel.

¹²I den e di trint'i nuebe ana di su reinado, Asa a bira malu na su pianan. Su malesa tabata masha grave mes, ma asta den su malesa e no a buska SENOR, sino dokternan.

¹³Asina Asa a bai sosega serka su tatanan i el a muri den e di kuarent'i un ana di su reinado.

¹⁴I nan a der'e den su mes tumba ku el a laga kap pa su mes den e stat di David, i nan a pon'e den e luga di sosiegu ku el a yena ku diferente sorto di speserei, meskla segun e arte di e trahadonan di perfume; i nan a sende un kandela masha grandi p'e.