Read Papantla Totonac 2 Kronikanan 17 Bible Online

2 Kronikanan 17 - Papantla Totonac bible

2 Kronikanan 17

¹E ora ei su yu homber Josafat a bira rei na su luga, i a sigura su posishon riba Israel.

²El a pone trupanan den tur e statnan fortifika di Juda, i a pone guarnishon den tera di Juda i den e statnan di Efrain ku su tata Asa a kaptura.

³I SENOR tabata ku Josafat, pasobra el a sigui e ehempel di e dianan di prome aya di su tata David, i no a buska e Baalnan,

⁴ma a buska e Dios di su tata, a sigui Su mandamentunan i no a hasi manera Israel a hasi.

⁵Asina SENOR a stablese e reino bou di su kontrol den su man; i henter Juda a trese tributo pa Josafat, i e tabatin gran rikesa i onor.

⁶I su kurason tabata yen di entusiasmo den e kamindanan di SENOR; i el a bolbe kita e luganan haltu i e imagennan di Asera for di Juda.

⁷Anto den e di tres ana di su reinado el a manda su ofisialnan: Ben-hail, Abdias, Zakarias, Natanael i Mikaias, pa sina hende den e statnan di Juda;

⁸i huntu ku nan e levitanan: Semaias, Netanias, Zebadias, Asael, Semiramot, Jonatan, Adonias, Tobias i Tobadonias, e levitanan; i huntu ku nan e saserdotenan Elisama i Joram.

⁹I nan tabata sina hende na Juda, dor ku nan tabatin e buki di lei di SENOR huntu ku nan; i nan a pasa den tur e statnan di Juda i a sina e pueblo.

¹⁰Awor e teror di SENOR tabata riba tur e reinonan di e teranan ku tabatin ront di Juda, asina ku nan no a hasi guera kontra Josafat.

¹¹I algun di e filisteonan a trese regalo i plata komo tributo pa Josafat; e arabirnan tambe a trese tounan di bestia chikitu p'e: shete mil shete shen karne chubatu i shete mil shete shen kabritu chubatu.

¹²Asina Josafat a bira mas i mas poderoso, i el a traha fortinan i statnan di deposito na Juda.

¹³I e tabatin hopi provishon den e statnan di Juda, i guereronan, hombernan balente, na Jerusalem.

¹⁴I esaki tabata nan kantidat segun e kasnan di nan tatanan: di Juda, komandantenan di milnan, Adnas tabata e komandante, ku tres shen mil guerero balente;

¹⁵i banda di dje, Johanan, e komandante, ku dos shent'i ochenta mil;

¹⁶i banda di dje, Amasias, yu homber di Zikri, kende a ofrese su mes boluntariamente na SENOR, ku dos shen mil guerero balente;

¹⁷i di Benjamin, Eliada, un guerero balente, ku dos shen mil homber arma ku bog i eskudo;

¹⁸i banda di dje, Jozabad, ku shent'i ochenta mil homber ekipa pa guera.

¹⁹Esakinan ta esnan ku tabata sirbi rei, sin konta esnan ku rei a pone den e statnan fortifika na henter Juda.