Read Papantla Totonac 2 Kronikanan 18 Bible Online

2 Kronikanan 18 - Papantla Totonac bible

2 Kronikanan 18

¹Awor Josafat tabatin gran rikesa i onor; i el a emparenta ku Akab dor di matrimonio.

²I algun ana despues el a bai bishita Akab na Samaria. I Akab a mata hopi karne i buey p'e i e hendenan ku tabata huntu kune, i a persuadie pa bai kontra Ramot-galaad.

³I Akab, rei di Israel, a bisa Josafat, rei di Juda: "Bo kier ban ku mi kontra Ramot-galaad?" I el a bis'e: "Ami ta manera abo ta, i mi pueblo ta manera bo pueblo, i nos lo ta ku bo den bataya."

⁴Ademas, Josafat a bisa rei di Israel: "Pa fabor, konsulta ku e palabra di SENOR prome."

⁵E ora ei rei di Israel a reuni e profetanan, kuater shen homber, i a bisa nan: "Nos lo bai bringa kontra Ramot-galaad, of lo mi keda sin bai?" I nan a bisa: "Bai, pasobra Dios lo entregu'e den man di rei."

⁶Ma Josafat a bisa: "No tin profeta di SENOR mas akinan ku nos por konsulta kune?"

⁷I rei di Israel a bisa Josafat: "Tin un homber mas pa medio di ken nos por konsulta ku SENOR, ma mi ta odi'e, pasobra nunka e no ta profetisa nada bon di mi sino semper malu so. Ta Mikaias, yu homber di Imla." Ma Josafat a bisa: "Rei no mester papia asina."

⁸E ora ei rei di Israel a yama un ofisial i a bisa: "Hasi lihe trese Mikaias, yu homber di Imla."

⁹Awor rei di Israel i Josafat, rei di Juda, tabata sinta kada un riba su trono, bisti na pana di rei, i nan tabata sinta na e plenchi-di-bati-mainshi na entrada di e porta di Samaria; i tur e profetanan tabata profetisa nan dilanti.

¹⁰I Zedekias, yu homber di Kenaana, a traha kachunan di heru pa su mes i a bisa: "Asina SENOR ta bisa: 'Ku esakinan lo bo kacha e sirionan te ora bo kaba ku nan.'"

¹¹I tur e profetanan tabata profetisa asin'aki, bisando: "Subi bai Ramot-galaad i prospera, pasobra SENOR lo entregu'e den man di rei."

¹²E ora ei e mensahero ku a bai yama Mikaias a papia kune, bisando: "Mira, e palabranan di e profetanan ta unanimamente na fabor di rei. Asina, pa fabor, laga bo palabra ta manera palabra di un di nan, i papia faborabel."

¹³Ma Mikaias a bisa: "Manera SENOR ta biba, loke mi Dios bisa, esei lo mi papia."

¹⁴I ora ku el a yega serka rei, rei a bis'e: "Mikaias, nos lo bai bringa kontra Ramot-galaad, of mi lo keda sin bai?" El a bisa: "Bai i prospera, pasobra nan lo wordu entrega den bo man."

¹⁵E ora ei rei a bis'e: "Kuantu biaha mi mester hurabo pa no papia nada otro sino e berdat ku mi den e nomber di SENOR?"

¹⁶Asina el a bisa: "Mi a mira henter Israel plama riba e serunan, manera karne ku no tin wardado. I SENOR a bisa: 'Esakinan no tin shon. Laga kada un di nan bolbe su kas na pas.'"

¹⁷E ora ei rei di Israel a bisa Josafat: "Mi no a bisabo ku e lo no profetisa nada bon di mi, sino malu so?"

¹⁸I Mikaias a bisa: "Pesei, tende e palabra di SENOR. Mi a mira SENOR sinta riba Su trono, i henter e ehersito di shelu para na Su man drechi i na Su man robes.

¹⁹I SENOR a bisa: 'Ken lo gana Akab, rei di Israel, pa bai muri na Ramot-galaad?' "I un a bisa esaki i un otro a bisa esaya.

²⁰E ora ei un spiritu a bin dilanti i a bai para dilanti di SENOR i a bisa: 'Ami lo gan'e.' "I SENOR a bis'e: 'Kon?'

²¹"I el a bisa: 'Ami lo bai i bira un spiritu di mentira den boka di tur su profetanan.' E ora ei El a bisa: 'Abo mester gan'e i bo ta logra tambe. Bai i hasi asina.'

²²"Pesei anto, SENOR a pone un spiritu di mentira den boka di e profetanan aki di bo; pasobra SENOR a proklama desaster kontra bo."

²³E ora ei Sedekias, yu homber di Kenaana, a yega serka i a dal Mikaias na su banda di kara i a bisa: "Kon e Spiritu di SENOR por a bai for di mi pa papia ku bo?"

²⁴I Mikaias a bisa: "Mira, lo bo mira riba e dia ku bo drenta un kamber paden pa skonde."

²⁵E ora ei rei di Israel a bisa: "Kohe Mikaias hib'e bek serka Amon, e gobernado di e stat, i serka Joas, rei su yu homber,

²⁶i bisa: 'Asina rei ta bisa: "Pone e homber aki den prizon i aliment'e ku pan di aflikshon i awa di aflikshon te ora mi bolbe sano i salvo.

²⁷I Mikaias a bisa: "Si di berdat bo bolbe sano i salvo, SENOR no a papia pa medio di mi." I el a bisa: "Skucha, boso, pueblonan tur!"

²⁸Asina rei di Israel i Josafat, rei di Juda, a bai kontra Ramot-galaad.

²⁹I rei di Israel a bisa Josafat: "Lo mi disfrasa mi mes i bai den bataya, ma abo bisti bo pana di rei." Asina rei di Israel a disfrasa su mes, i nan a bai den bataya.

³⁰Awor rei di Siria a ordena e kapitannan di su garoshinan, bisando: "No bringa kontra chikitu ni grandi, sino solamente kontra rei di Israel."

³¹Asina a sosode ku ora e kapitannan di e garoshinan a mira Josafat, nan a bisa: "Ata rei di Israel!" I nan a bira pa bringa kontra dje. Ma Josafat a dal un gritu i SENOR a yud'e, i Dios a desvia nan for di dje.

³²E ora ei a sosode ku ora e kapitannan di e garoshinan a mira ku no tabata rei di Israel, nan a bira bai i a stop di persiguie.

³³I un homber a span su bog tira pa loko, i a alkansa rei di Israel net kaminda su armadura tabata hinka den otro. Asina el a bisa e koredo di garoshi: "Bira bai bek i sakami for di bataya, pasobra mi ta gravemente herida."

³⁴I e bataya tabata duru e dia ei, 1 rei di Israel a keda wanta regt den su garoshi dilanti di e sirionan te part'i atardi; i ora solo a baha el a muri.