Read Papantla Totonac 2 Kronikanan 2 Bible Online

2 Kronikanan 2 - Papantla Totonac bible

2 Kronikanan 2

¹Awor Salomon a disidi di traha un kas pa e nomber di SENOR i un palasio real pa su mes.

²Asina Salomon a nombra setenta mil homber pa hiba karga, ochenta mil homber pa kap piedra den e serunan i tres mil seis shen pa kontrola nan.

³E ora ei Salomon a manda bisa Huram, rei di Tiro: "Manera bo a hasi pa mi tata David, i a mand'e palu di seda pa e traha un kas pa biba aden, hasi asina pa mi tambe.

⁴Mira, mi ta bai traha un kas pa e nomber di SENOR mi Dios, pa dedik'e na djé, pa kima sensia aromatiko Su dilanti, i pa pone e pan di proposishon kontinuamente, i pa ofrese ofrenda kima mainta i atardi, riba dianan di sabat i riba dianan di luna nobo i riba e dianan di fiestanan stipula di SENOR nos Dios, siendo ku esaki ta wordu rekeri pa semper na Israel.

⁵"I e kas ku mi ta bai traha lo ta grandi; pasobra nos Dios ta mas grandi ku tur e diosnan.

⁶Ma ken ta kapas pa traha un kas p'E, siendo ku e shelunan i asta e shelu di e shelunan no por konten'E? Asina, ta ken ami ta pa mi traha un kas p'E, si no ta solamente komo un luga pa kima sensia Su dilanti?

⁷"I awor mandami un homber eksperto pa traha ku oro, plata, brons i heru, ku tela purpura, skarlata i blou, i kende sa kon pa graba figura, pa traha ku e hombernan eksperto ku mi tin na Juda i Jerusalem, kendenan mi tata David a provee.

⁸"Mandami tambe palu di seda, di sipres i di sandalo for di Libano, pasobra mi sa ku bo sirbidonan sa kon pa kap palu di Libano; i di berdat, mi sirbidonan lo traha huntu ku bo sirbidonan,

⁹pa prepara palu na abundansia pa mi, pasobra e kas ku mi ta bai traha lo ta grandi i maraviyoso.

¹⁰Awor mira, lo mi duna bo sirbidonan, e hombernan ku ta kap palu, binti mil koro di trigo bati i binti mil koro di puspas, binti mil bato di bina i binti mil bato di zeta."

¹¹E ora ei Huram, rei di Tiro, a kontesta den un karta manda pa Salomon: "Pasobra SENOR ta stima Su pueblo, El a hasibo rei riba nan."

¹²Tambe Huram a bisa: "Bendishona sea SENOR, e Dios di Israel, Kende a traha shelu i tera, Kende a duna rei David un yu sabi, ku tin prudensia i komprendementu, ku lo traha un kas pa SENOR i un palasio real pa su mes.

¹³"I awor mi ta manda un homber eksperto ku tin komprendementu, Huram-abi,

¹⁴yu homber di un muhe danita i su tata tabata un homber di Tiro, kende sa kon pa traha ku oro, plata, brons, heru, piedra i palu, i ku tela purpura, blou, lino i skarlata, i kende sa kon pa graba tur sorto di figura i kon pa traha tur sorto di diseno ku wordu enkarga na dje, pa traha ku bo hombernan eksperto, i ku esnan di mi senor David, bo tata.

¹⁵"Awor anto, laga mi senor manda pa su sirbidonan trigo i puspas, zeta i bina, di kualnan el a papia.

¹⁶I nos lo kap ki sorto di palu ku bo tin mester for di Libano, i trese nan pa bo na flota, via laman, na Jope, asina ku bo por hiba nan Jerusalem."

¹⁷I Salomon a konta tur e stranheronan ku tabata na tera di Israel, segun e senso ku su tata David a tene; i shent'i sinkuent'i tres mil seis shen a wordu hana.

¹⁸I el a nombra setenta mil di nan pa hiba karga, ochenta mil pa kap piedra den e serunan i tres mil seis shen komo forman pa pone e pueblo traha.