Read Papantla Totonac 2 Kronikanan 21 Bible Online

2 Kronikanan 21 - Papantla Totonac bible

2 Kronikanan 21

¹Anto Josafat a bai sosega serka su tatanan i a wordu dera serka su tatanan den e stat di David, i su yu homber Joram a bira rei na su luga.

²I e tabatin ruman hombernan, e yu hombernan di Josafat: Azarias, Jehiel, Zakarias, Azarias, Mikael i Sefatias. Tur esakinan tabata yu homber di Josafat, rei di Israel.

³I nan tata a duna nan hopi regalo di plata, oro i kosnan presioso, ku statnan fortifika na Juda; ma e reino el a duna Joram, pasobra e tabata e primogenito.

⁴Awor ora Joram a tuma e reino di su tata ofer i a sigura su posishon, el a mata tur su ruman hombernan ku spada, i tambe algun di e gobernantenan di Israel.

⁵Joram tabatin trint'i dos ana dia ku el a bira rei, i el a reina ocho ana na Jerusalem.

⁶I el a kana den e kaminda di e reinan di Israel, meskos ku e kas di Akab a hasi, pasobra yu muhe di Akab tabata su esposa; i el a hasi malu den bista di SENOR.

⁷Sinembargo, SENOR no tabata kier a destrui e kas di David pa motibu di e aliansa ku El a sera ku David, komo ku El a priminti di duna e i su yu hombernan un lampi pa semper.

⁸Den su dianan Edom a rebeldia kontra e gobemashon di Juda, i a skohe un rei pa nan mes.

⁹E ora ei Joram a krusa bai ku su komandantenan i tur su garoshinan huntu kune. I a sosode ku el a lanta anochi i a mata e edomitanan ku tabata rondona tantu e komo e komandantenan di e garoshinan.

¹⁰Asina Edom tabata den rebeldia kontra Juda te dia djawe. Anto na mesun tempu Libna a rebeldia kontra su gobemashon, pasobra el a bandona e SENOR Dios di su tatanan.

¹¹Ademas el a traha luganan haltu den e serunan di Juda i a kousa ku e habitantenan di Jerusalem a prostitui nan mes i a hasi Juda desvia.

¹²E ora ei a bin un karta p'e di profeta Elias, bisando: "Asina SENOR Dios di bo tata David ta bisa: 'Pasobra bo no a kana den e kamindanan di bo tata Josafat i den e kamindanan di Asa, rei di Juda,

¹³ma a kana den e kaminda di e reinan di Israel i a kousa ku Juda i e habitantenan di Israel a prostitui nan mes, meskos ku e kas di Akab a hasi, i tambe bo a mata bo ruman hombernan, bo mes famia, kendenan tabata miho ku bo,

¹⁴mira, SENOR ta bai kastiga bo pueblo, bo yu hombernan, bo esposanan i tur loke ta di bo ku un kalamidat grandi;

¹⁵i abo lo sufri un enfermedat grave, un malesa di tripa, te ora ku, dia pa dia, bo tripa sali afo pa motibu di e malesa.'"

¹⁶E ora ei SENOR a anima e spiritu di e filisteonan i e arabirnan, kendenan tabata biba na frontera di e etiopenan, kontra Joram;

¹⁷i nan a bin kontra Juda, a invadie i a hiba tur loke ku nan a hana den e kas di rei, huntu ku su yu hombernan i su esposanan, asina ku no a ked'e ningun yu homber, sino Joakaz so, esun di mas chikitu di su yu hombernan.

¹⁸Asina ta ku despues di tur esaki, SENOR a afligie ku un malesa inkurabel den su tripa.

¹⁹Awor a sosode ku den kurso di tempu, despues di dos ana, su tripa a bin afo pa motibu di su malesa i el a muri ku hopi dolo. I su pueblo no a sende kandela p'e, manera nan a hasi pa su tatanan.

²⁰E tabatin trint'i dos ana dia ku el a bira rei i el a reina ocho ana na Jerusalem; i el a muri sin ku ningun hende a lamenta p'e, i nan a der'e den e stat di David, ma no den e tumbanan di e reinan.