Read Papantla Totonac 2 Kronikanan 22 Bible Online

2 Kronikanan 22 - Papantla Totonac bible

2 Kronikanan 22

¹E ora ei e habitantenan di Jerusalem a hasi Okozias, Joram su yu homber di mas chikitu, rei na su luga, pasobra e trupa di hombernan ku a bin na e kampamentu huntu ku e arabirnan a mata tur e yu hombernan mas grandi. Asina Okozias, yu homber di Joram, rei di Juda, a kuminsa reina.

²Okozias tabatin bint'i dos ana dia ku el a bira rei, i el a reina un ana na Jerusalem. I nomber di su mama tabata Atalia, nieta di Omri.

³E tambe a kana den e kamindanan di e kas di Akab, pasobra su mama tabata su konsehera pa hasi maldat.

⁴I el a hasi malu den bista di SENOR, manera e kas di Akab, pasobra nan tabata su konseheronan despues di morto di su tata, pa su mes destrukshon.

⁵Tambe el a kana segun nan konseho i a bai ku Joram, yu homber di Akab, rei di Israel, pa hasi guera kontra Hazael, rei di Siria, na Ramot-galaad. Ma e sirionan a herida Joram.

⁶Asina el a bin bek na Jezreel, pa kura di e heridanan ku nan a kous'e na Ramot, ora ku el a bringa kontra Hazael, rei di Siria. I Okozias, yu homber di Joram, rei di Juda, a bai Jezreel pa bishita Joram, yu homber di Akab, pasobra e tabata malu.

⁷Awor e destrukshon di Okozias tabata di Dios, ya ku el a bai serka Joram. Pasobra ora ku el a yega, el a sali bai ku Joram kontra Jehu, yu homber di Nimsi, kende SENOR a ungi pa kaba ku kas di Akab.

⁸I a sosode ku ora Jehu tabata ehekuta huisio riba e kas di Akab, el a hana e prensnan di Juda i e yu hombernan di e ruman hombernan di Okozias ta sirbi Okozias, i el a mata nan.

⁹Tambe el a buska Okozias i nan a koh'e mientras ku e tabata skonde na Samaria; nan a tres'e serka Jehu, a mat'e i a der'e. Pasobra nan a bisa: "E ta yu homber di Josafat, kende a buska SENOR ku henter su kurason." Asina no tabatin ningun hende di kas di Okozias pa retene e poder di e reino.

¹⁰Awor ora ku Atalia, mama di Okozias, a mira ku su yu homber tabata morto, el a lanta i a destrui henter e desendensia real di e kas di Juda.

¹¹Ma Josabet, yu muhe di rei, a kohe Joas, yu homber di Okozias, i a sak'e na skondi for di den e yu hombernan di rei ku nan tabata bai mata i a pone e ku su yaya den e kamber di drumi. Asina Josabet, yu muhe di rei Joram, esposa di saserdote Joiada (pasobra e tabata ruman muhe di Okozias), a skond'e pa Atalia, pa e no mat'e.

¹²I Joas a keda seis ana skondi serka nan den e kas di Dios, mientras ku Atalia tabata reina riba e tera.