Read Papantla Totonac 2 Kronikanan 23 Bible Online

2 Kronikanan 23 - Papantla Totonac bible

2 Kronikanan 23

¹Awor den e di shete ana Joiada a fortalese su mes, i a tuma kapitannan di shennan: Azarias, yu homber di Joram, Ismael, yu homber di Johanan, Azarias, yu homber di Obed, Maaseias, yu homber di Adaia, i Elisafat, yu homber di Zikri, i nan a sera un aliansa kune.

²I nan a rekore henter Juda, a reuni e levitanan for di tur stat di Juda, i e kabesnan di e kasnan di e tatanan di Israel, i nan a bin Jerusalem.

³E ora ei henter e asamblea a sera un aliansa ku rei den e kas di Dios. I Joiada a bisa nan: "Mira, e yu homber di rei mester reina, manera SENOR a papia tokante di e yu hombernan di David.

⁴Esaki ta e kos ku boso mester hasi: un di tres parti di boso, di e saserdotenan i levitanan, ku ta bin riba dia di sabat, mester ta wardado-di-porta,

⁵i un di tres parti mester ta na e kas di rei, i un di tres parti na e Porta di Fundeshi; i henter e pueblo mester ta den e plenchinan di e kas di SENOR.

⁶Ma no laga ni un hende drenta e kas di SENOR ku eksepshon di e saserdotenan i e levitanan ku ta sirbi; eseinan por drenta, pasobra nan ta santu. I laga henter e pueblo kumpli ku e enkargo di SENOR.

⁷I e levitanan mester para ront di rei, kada homber ku su armanan den su man; i ken ku drenta e kas mester wordu mata. Asina keda serka rei ora ku e drenta i ora ku e sali."

⁸Asina e levitanan i henter Juda a hasi konforme tur loke saserdote Joiada a ordena. I kada un di nan a reuni su hombernan ku mester a subi warda riba dia di sabat, huntu ku esnan ku tabata baha warda riba dia di sabat, pasobra saserdote Joiada no a duna ningun di e divishonnan liber.

⁹Anto saserdote Joiada a duna e kapitannan di shennan e lansanan i e eskudonan grandi i chikitu ku tabata di rei David, ku tabata den e kas di Dios.

¹⁰I el a stashona henter e pueblo, kada homber ku su arma den su man, for di banda drechi di e kas te na banda robes di e kas, banda di e altar i banda di e kas, tur ront di rei.

¹¹E ora ei nan a trese e yu homber di rei pafo, a pone e korona riba su kabes, a dun'e e testimonio i a hasie rei. I Joiada ku su yu hombernan a ungie i a bisa: "Biba rei!"

¹²Ora ku Atalia a tende e boroto di e pueblo ku tabata kore i elogia rei, el a bin serka e pueblo den e kas di SENOR.

¹³I el a wak, i mira, rei tabata para banda di su pilar na e entrada, i e kapitannan i e tokadonan di trompet tabata banda di rei. I tur e hendenan di e tera tabata regosiha i tabata toka trompet, i e kantadonan ku nan instrumentnan di muzik tabata dirigi e alabansa. E ora ei Atalia a sker su pananan i a bisa: "Traishon! Traishon!"

¹⁴I saserdote Joiada a laga e kapitannan di shennan ku a wordu nombra riba e ehersito sali, i el a bisa nan: "Tres'e pafo meimei di e filanan; i ken ku siguie, laga mat'e ku spada." Pasobra e saserdote a bisa: "No mat'e den e kas di SENOR."

¹⁵Asina nan a gar'e, i ora ku el a yega na entrada di e Porta di Kabai di e kas di rei, nan a mat'e ayanan.

¹⁶E ora ei Joiada a sera un aliansa entre su mes i henter e pueblo i rei, ku nan lo ta e pueblo di SENOR.

¹⁷I henter e pueblo a bai na e kas di Baal i a bash'e abou; i nan a kibra su altarnan i su imagennan na pida-pida, i a mata Matan, e saserdote di Baal, dilanti di e altarnan.

¹⁸Ademas, Joiada a pone e trabounan di e kas di SENOR bou di outoridat di e saserdotenan levitiko, kendenan David a nombra riba e kas di SENOR, pa ofrese e ofrendanan kima di SENOR, manera ta para skirbi den e lei di Moises--ku goso i kantamentu segun e ordu di David.

¹⁹I el a stashona e wardadonan-di-porta di e kas di SENOR, asina ku ningun hende, ku di kualke manera tabata impuru, no por a drenta.

²⁰I el a reuni e kapitannan di shennan, e hendenan di noblesa, e gobernantenan di e pueblo, i henter e pueblo di e tera; i el a trese rei for di e kas di SENOR i a pasa pa e porta ariba bin na kas di rei. I nan a pone rei sinta riba e trono real.

²¹Asina henter e pueblo di e tera a regosiha i e stat a keda trankil, pasobra nan a mata Atalia ku spada.