Read Papantla Totonac 2 Kronikanan 24 Bible Online

2 Kronikanan 24 - Papantla Totonac bible

2 Kronikanan 24

¹Joas tabatin shete ana dia ku el a bira rei, i el a reina kuarenta ana na Jerusalem; nomber di su mama tabata Sibia di Beerseba.

²I Joas a hasi bon den bista di SENOR tur e dianan di e saserdote Joiada.

³I Joiada a tuma dos esposa p'e, i el a engendra yu hombernan i yu muhenan.

⁴Awor a sosode ku despues di esaki Joas a disidi di restora e kas di SENOR.

⁵I el a reuni e saserdotenan i levitanan, i a bisa nan: "Sali bai na e statnan di Juda i kolekta plaka for di henter Israel pa drecha e kas di boso Dios tur ana, i hasi e asunto aki lihe." Ma e levitanan no a aktua lihe.

⁶Asina rei a manda yama sumosaserdote Joiada i a bis'e: "Pakiko bo no a perkura pa e levitanan trese for di Juda i for di Jerusalem e impuesto ku Moises, e sirbido di SENOR, a impone riba e kongregashon di Israel, pa e tent di testimonio?"

⁷Pasobra e yu hombernan di e mal muhe Atalia a kibra drenta e kas di Dios i asta a uza e artikulonan santu di e kas di SENOR pa e Baalnan.

⁸Asina rei a ordena i nan a traha un kaha i a pon'e pafo, banda di porta di e kas di SENOR.

⁹I nan a hasi un proklamashon na Juda i Jerusalem pa trese pa SENOR e impuesto ku Moises, e sirbido di Dios, a impone riba Israel den desierto.

¹⁰I tur e ofisialnan i henter e pueblo a regosiha i a trese nan impuesto i a tir'e den e kaha te ora ku nan tur a kaba di duna.

¹¹I a sosode ku ki ora ku e levitanan a trese e kaha serka e ofisial di rei, i esakinan a mira ku tabatin hopi plaka aden, e eskriba di rei i e ofisial di e sumosaserdote tabata bin hasi e kaha bashi, i koh'e pon'e bek na su luga. Asina nan tabata hasi tur dia i tabata kolekta hopi plaka.

¹²I rei i Joiada a duna esaki na esnan ku tabata hasi e trabou di sirbishi di e kas di SENOR; i nan a kontrata mesla i karpinte pa restora e kas di SENOR, i tambe hende ku tabata sa traha ku heru i brons pa drecha e kas di SENOR.

¹³Asina e trahadonan a traha, i e trabou di e drechamentu a progresa den nan man; i nan a restora e kas di Dios segun su diseno original i a fortifik'e.

¹⁴I ora nan a kaba, nan a trese e plaka ku a resta dilanti di rei i Joiada; i kune nan a traha artikulonan-di-uzo pa e kas di SENOR, artikulonan-di-uzo pa e sirbishi i pa e ofrenda kima, i weanan i artikulonan-di-uzo di oro i di plata. I nan a ofrese ofrendanan kima den e kas di SENOR kontinuamente, tur e dianan di Joiada.

¹⁵Awor, ora Joiada a alkansa un edat avansa el a muri; e tabatin shent'i trinta ana dia ku el a muri.

¹⁶I nan a der'e den e stat di David entre e reinan, pasobra el a hasi loke ta bon den Israel i na Dios i Su kas.

¹⁷Ma despues di morto di Joiada e ofisialnan di Juda a bin i a buig dilanti di rei, i rei a skucha nan.

¹⁸I nan a bandona e kas di SENOR, e Dios di nan tatanan, i a sirbi e imagennan di Asera i e ldolonan; asina furia a bin riba Juda i Jerusalem pa motibu di e kulpa di nan aki.

¹⁹Sinembargo, SENOR a manda profetanan serka nan pa trese nan bek serka SENOR; maske nan a duna testimonio kontra nan, nan no kier a tende.

²⁰E ora ei e Spiritu di Dios a bin riba Zakarias, yu homber di saserdote Joiada; i el a bai para dilanti di e pueblo i a bisa nan: "Asina Dios a bisa: 'Pakiko boso ta transgresa e mandamentunan di SENOR i no ta prospera? Pasobra boso a bandona SENOR, E tambe a bandona boso.'"

²¹Asina nan a konspira kontra dje i riba ordu di rei nan a piedr'e mat'e den e plenchi di e kas di SENOR.

²²Asina rei Joas no a korda e karino ku su tata Joiada a mustr'e, ma el a mata su yu homber. I ora Zakarias tabata muriendo, el a bisa: "Ku SENOR mira i tuma vengansa!"

²³Awor a sosode ku na kuminsamentu di ana e ehersito di e sirionan a bin kontra dje; i nan a bin Juda i Jerusalem, a destrui tur e ofisialnan di e pueblo for di meimei di e pueblo, i a manda tur nan botin pa rei di Damasko.

²⁴Di berdat e ehersito di e sirionan a bin ku un kantidat chikitu di homber; tog SENOR a entrega un ehersito masha grandi den nan man, pasobra nan a bandona SENOR, e Dios di nan tatanan. Asina nan a ehekuta huisio kontra Joas.

²⁵I ora nan a bai lagu'e (pasobra nan a lagu'e hopi malu), su mes sirbidonan a konspira kontra dje pa motibu di e sanger di e yu homber di saserdote Joiada, i a mat'e riba su kama. Asina el a muri, i nan a der'e den e stat di David, ma nan no a der'e den e tumbanan di e reinan.

²⁶Awor esakinan ta esnan ku a konspira kontra dje: Zabad, yu homber di Simeat e muhe amonita, i Jozabad, yu homber di Simrit e muhe moabita.

²⁷Tokante di su yu hombernan, i e hopi profesianan kontra dje, i e drechamentu di e kas di Dios, mira, nan ta para skirbi den e relatonan di e Buki di reinan. Anto su yu homber Amasias a bira rei na su luga.