Read Papantla Totonac 2 Kronikanan 28 Bible Online

2 Kronikanan 28 - Papantla Totonac bible

2 Kronikanan 28

¹Akaz tabatin binti ana dia ku el a bira rei, i el a reina dieseis ana na Jerusalem; i e no a hasi bon den bista di SENOR, manera su tata David a hasi.

²Ma el a kana den e kamindanan di e reinan di Israel; tambe el a traha imagennan basha pa e Baalnan.

³Ademas, el a kima sensia den e vaye di Ben-hinom, i a kima su yu hombernan den kandela, konforme e abominashonnan di e nashonnan ku SENOR a kore kune for di dilanti di e yunan di Israel.

⁴I el a ofrese sakrifisio i a kima sensia riba e luganan haltu, riba e serunan, i bou di tur palu berde.

⁵Pesei, SENOR su Dios a entregu'e den man di rei di Siria; i nan a derot'e i a hiba for di dje un gran kantidat di katibu, i a hiba nan Damasko. I tambe el a wordu entrega den man di rei di Israel, kende a derot'e ku un matansa grandi.

⁶Pasobra den un solo dia Peka, yu homber di Remalias, a mata shent'i binti mil na Juda, tur hombernan balente, pasobra nan a bandona e SENOR Dios di nan tatanan.

⁷I Zikri, un homber poderoso di Efrain, a mata Maaseias, yu homber di rei, i Azrikam, e mayordomo di e kas, i Elkana, e di dos despues di rei.

⁸I e yunan di Israel a hiba komo katibu for di nan rumannan: dos shen mil muhe, yu hombernan i yu muhenan; tambe nan a kohe un kantidat grandi di botin for di nan, i a hiba e botin na Samaria.

⁹Ma ayanan tabatin un profeta di SENOR ku tabata yama Oded; i el a sali pa bai kontra ku e ehersito ku tabata yega Samaria i a bisa nan: "Mira, pasobra SENOR, e Dios di boso tatanan, tabata rabia ku Juda, El a entrega nan den boso man, i boso a mata nan den un rabia ku a yega te na shelu.

¹⁰I awor boso tin intenshon di somete e hendenan di Juda i Jerusalem komo esklabu homber i muhe. Di berdat, boso mes no tin kulpa dilanti di SENOR boso Dios?

¹¹Pesei anto, skuchami i debolbe e katibunan ku boso a kaptura for di boso rumannan, pasobra e rabia ardiente di SENOR ta kontra boso."

¹²E ora ei algun di e kabesantenan di e yunan di Efrain--Azarias, yu homber di Johanan, Berekias, yu homber di Mesilemot, Jehizkias, yu homber di Salum, i Amasa, yu homber di Hadlai--a lanta kontra esnan ku tabata bin for di bataya,

¹³i a bisa nan: "Boso no mester trese e katibunan akinan, pasobra boso proposito ta pa trese kulpa riba nos kontra SENOR, dor di oumenta nos pikanan i nos kulpa; pasobra nos kulpa ta grandi, asina ku Su rabia ardiente ta kontra Israel."

¹⁴Asina e hombernan arma a laga e katibunan i e botin dilanti di e ofisialnan i henter e asamblea.

¹⁵E ora ei e hombernan ku tabata apunta na nan nomber a lanta, a kohe e katibunan, i for di e botin nan a bisti tur esnan ku tabata sunu; i nan a duna nan pana i sandalia, a duna nan di kome i di bebe, a ungi nan ku zeta, a pone tur di nan ku tabata debil riba buriku, i a hiba nan Jeriko, e stat di palma, serka nan rumannan; despues nan a bolbe Samaria.

¹⁶Na e tempu ei rei Akaz a manda buska yudansa serka e reinan di Asiria.

¹⁷Pasobra atrobe e edomitanan a bin ataka Juda, i a hiba katibunan.

¹⁸E filisteonan tambe a invadi e statnan di e vayenan i di Negev di Juda, i a kohe Bet-semes, Ajalon, Gederot, i Soko ku su pueblitonan, Timna ku su pueblitonan i Gimzo ku su pueblitonan; i nan a keda biba ayanan.

¹⁹Pasobra SENOR a umiya Juda pa motibu di Akaz, rei di Israel, pasobra el a promove maldat den Juda i tabata masha infiel na SENOR.

²⁰Asina Tiglat-pileser, rei di Asiria, a bin kontra dje i a afligie, enbes di fortales'e.

²¹I Akaz a tuma un porshon for di e kas di SENOR i for di e palasio di rei i di e prensnan, i a duna esaki na rei di Asiria; ma esaki no a yud'e.

²²Awor den e tempu di su angustia e mesun rei Akaz aki a bira mas infiel ainda na SENOR.

²³Pasobra el a ofrese sakrifisio na e diosnan di Damasko ku a derot'e, i a bisa: "Pasobra e diosnan di e reinan di Siria a yuda nan, lo mi ofrese sakrifisio na nan, pa nan yudami." Ma nan a bira su ruina i ruina pa henter Israel.

²⁴Ademas, ora ku Akaz a rekohe e artikulonan-di-uzo di e kas di Dios, el a korta e artikulonan-di-uzo di e kas di Dios na pida-pida; i el a sera e portanan di e kas di SENOR, i a traha altarnan pa su mes den tur skina di Jerusalem.

²⁵I den tur stat di Juda el a traha luganan haltu pa kima sensia na otro diosnan, i a proboka SENOR, e Dios di su tatanan, na rabia.

²⁶Awor e restu di su echonan i tur su kamindanan, for di prome te delaster, mira, nan ta para skirbi den e Buki di reinan di Juda i Israel.

²⁷Asina Akaz a bai sosega serka su tatanan, i nan a der'e den stat, den Jerusalem, pasobra nan no a hib'e den e tumbanan di e reinan di Israel; i su yu homber Ezekias a reina na su luga.