Read Papantla Totonac 2 Kronikanan 29 Bible Online

2 Kronikanan 29 - Papantla Totonac bible

2 Kronikanan 29

¹Ezekias a bira rei tempu ku e tabatin bint'i sinku ana; i el a reina bint'i nuebe ana na Jerusalem. I nomber di su mama tabata Abias, yu muhe di Zakarias.

²I el a hasi bon den bista di SENOR, konforme tur loke su tata David a hasi.

³Den e prome ana di su reinado, den e prome luna, el a habri e portanan di e kas di SENOR i a drecha nan.

⁴I el a trese e saserdotenan i e levitanan, i a reuni nan riba e plenchi parti pariba.

⁵E ora ei el a bisa nan: "Skuchami, O levitanan. Konsagra boso mes awor i konsagra e kas di SENOR, e Dios di boso tatanan, i saka tur e impuresa for di e luga santu.

⁶Pasobra nos tatanan tabata infiel i a hasi malu den bista di SENOR nos Dios, i a bandon'E, i a bira nan kara for di e luga-di-biba di SENOR, i a bira nan lomba.

⁷Tambe nan a sera e portanan di veranda i a paga e lampinan, i no a kima sensia ni ofrese ofrenda kima den e luga santu na e Dios di Israel.

⁸Pesei e furia di SENOR tabata kontra Juda i Jerusalem, i El a hasi nan un opheto di teror, di horor, i di bofon, manera boso ta mira ku boso mes wowo.

⁹Pasobra, mira, nos tatanan a muri pa medio di spada i nos yu hombernan, nos yu muhenan i nos esposanan ta den koutiverio pa motibu di esaki.

¹⁰Awor ta den mi kurason pa sera un aliansa ku SENOR Dios di Israel, pa Su rabia ardiente kita for di riba nos.

¹¹Mi yu hombernan, no sea negligente awor, pasobra SENOR a skohe boso pa para Su dilanti, pa sirbié, i pa ta Su sirbidonan i pa kima sensia."

¹²E ora ei e levitanan a lanta para: Mahat, yu homber di Amasai, i Joel, yu homber di Azarias, for di e yu hombernan di e koatitanan; i for di e yu hombernan di Merari: Kis, yu homber di Abdi, i Azarias, yu homber di Jehalelel; i for di e gersonitanan: Joa, yu homber di Zima, i Eden, yu homber di Joa;

¹³i for di e yu hombernan di Elizafan: Simri i Jeiel; i for di e yu hombernan di Asaf: Zakarias i Matanias;

¹⁴i for di e yu hombernan di Heman: Jehiel i Simei; i for di e yu hombernan di Jedutun: Semaias i Uziel.

¹⁵I nan a reuni nan ruman hombernan, a konsagra nan mes, i a drenta pa purifika e kas di SENOR, konforme e mandamentu di rei, pa medio di e palabranan di SENOR.

¹⁶Asina e saserdotenan a drenta den e parti paden di e kas di SENOR pa purifik'e, i tur kos impuru ku nan a hana den e tempel di SENOR, nan a saka pafo den e plenchi di e kas di SENOR. Anto e levitanan a tuma esaki pa kargu'e hiba na e Vaye di Kedron.

¹⁷Awor nan a kuminsa e konsagrashon riba e prome dia di e prome luna, i riba e di ocho dia di luna nan a drenta e veranda di SENOR. Anto nan a konsagra e kas di SENOR den ocho dia, i a kaba riba e di dieseis dia di e prome luna.

¹⁸E ora ei nan a drenta bai serka rei Ezekias i a bisa: "Nos a purifika henter e kas di SENOR, e altar di ofrenda kima ku tur su artikulonan-di-uzo, i e mesa di e pan di proposishon ku tur su artikulonan-di-uzo.

¹⁹Ademas, tur e artikulonan-di-uzo ku rei Akaz a pone un banda durante di su reinado den su infieldat, nos a prepara i konsagra; i mira, nan ta dilanti di e altar di SENOR."

²⁰Anto rei Ezekias a lanta tempran i a reuni e prensnan di e stat i a bai na e kas di SENOR.

²¹I nan a trese shete bishe machu, shete karne chubatu, shete lamchi, i shete kabritu chubatu pa un ofrenda pa pika pa e reino, pa e santuario, i pa Juda. I el a ordena e saserdotenan, e yu hombernan di Aaron, pa ofrese nan riba e altar di SENOR.

²²Asina nan a mata e bishenan machu, i e saserdotenan a kohe e sanger i a sprengu'e riba e altar. Tambe nan a mata e karnenan chubatu i a sprengu e sanger riba e altar; nan a mata e lamchinan tambe i a sprengu e sanger riba e altar.

²³Despues nan a trese e kabritunan chubatu pa e ofrenda pa pika dilanti di rei i e asamblea, i nan a pone nan man riba nan.

²⁴I e saserdotenan a mata nan i a purifika e altar ku nan sanger pa hasi ekspiashon pa henter Israel, pasobra rei a ordena e ofrenda kima i e ofrenda pa pika pa henter Israel.

²⁵E ora ei el a stashona e levitanan den e kas di SENOR ku simbal, ku arpa i ku salterio, konforme e mandamentu di David, di Gad, e mirado di rei, i di profeta Natan; pasobra e mandamentu a bin di SENOR pa medio di Su profetanan.

²⁶I e levitanan a para ku e instrumentnan di muzik di David, i e saserdotenan ku trompet.

²⁷Anto Ezekias a duna ordu pa ofrese e ofrenda kima riba e altar. Ora ku e ofrenda kima a kuminsa, e kantika na SENOR tambe a kuminsa ku trompet, akompana pa e instrumentnan di David, rei di Israel.

²⁸Mientras ku henter e asamblea tabata adora Dios, e kantadonan tambe tabata kanta i e trompetnan tabata zona; tur esaki a sigui te ora ku e ofrenda kima a termina.

²⁹Awor ora ku e ofrenda kima a termina, rei i tur esnan ku tabata presente huntu kune a buig te na suela i a adora Dios.

³⁰Ademas, rei Ezekias i e ofisialnan a ordena e levitanan pa kanta alabansa na SENOR ku e palabranan di David i Asaf, e mirado. Asina nan a kanta alabansa ku goso, i a buig te na suela i a adora Dios.

³¹E ora ei Ezekias a kontesta i a bisa: "Awor ku boso a konsagra boso mes na SENOR, hala serka i trese sakrifisionan i ofrendanan di gradisimentu na e kas di SENOR." I e asamblea a trese sakrifisionan i ofrendanan di gradisimentu, i tur esnan ku tabatin e deseo a trese ofrendanan kima.

³²I e kantidat di e ofrendanan kima ku e asamblea a trese tabata setenta bishe machu, shen karne chubatu i dos shen lamchi; tur esakinan tabata pa ofrendanan kima pa SENOR.

³³I e kosnan konsagra tabata seis shen bishe machu i tres mil karne.

³⁴Ma e saserdotenan tabata muchu poko, asina ku nan no por a soya tur e ofrendanan kima; pesei nan rumannan e levitanan a yuda nan te ora ku e trabou a keda kla, i te ora ku e otro saserdotenan a konsagra nan mes. Pasobra e levitanan tabata mas konsiente pa konsagra nan mes ku e saserdotenan.

³⁵I tambe tabatin hopi ofrenda kima, huntu ku e vet di e ofrendanan di pas i e ofrendanan di bibida pa e ofrendanan kima. Asina e sirbishi di e kas di SENOR a keda stablesi atrobe.

³⁶Anto Ezekias i henter e pueblo a regosiha pa e manera ku Dios a prepara pa e pueblo, pasobra e kos a sosode direpiente.