Read Papantla Totonac 2 Kronikanan 3 Bible Online

2 Kronikanan 3 - Papantla Totonac bible

2 Kronikanan 3

¹E ora ei Salomon a kuminsa traha e kas di SENOR na Jerusalem riba Seru Moria, kaminda SENOR a parese na su tata David, na e luga ku David a prepara, riba e plenchi-di-bati-mainshi di Oman e jebuseo.

²I el a kuminsa konstrui riba e di dos dia, den e di dos luna di e di kuater ana di su reinado.

³Awor esakinan ta e fundeshinan ku Salomon a pone pa traha e kas di Dios. E largura na kodo, konforme e midi bieu, tabata sesenta kodo, i e hanchura binti kodo.

⁴I e veranda ku tabatin dilanti di e kas tabata mes largu ku e hanchura di e kas, binti kodo, i e haltura tabata shent'i binti. I paden el a fur'e ku oro puru.

⁵I el a fura e sala prinsipal ku palu di sipres i a fur'e ku oro fini, i a dorn'e ku palma i kadena.

⁶Ademas, el a dorna e kas ku piedra presioso; i e oro tabata oro for di Parvaim.

⁷Tambe el a fura e kas ku oro--e balkinan, e drempelnan, su murayanan i su portanan; i el a graba kerubinnan riba e murayanan.

⁸Awor el a traha e luga santisimo; su largura, konforme e hanchura di e kas, tabata binti kodo, i su hanchura binti kodo. El a fur'e ku seis shen talento di oro fini.

⁹I peso di e klabunan tabata sinkuenta siklo di oro. Tambe el a fura e kambernan ariba ku oro.

¹⁰Anto el a traha dos kerubin di palu den e sala di e luga santisimo i a fura nan ku oro.

¹¹I e midi di e halanan gespan di e kerubinnan tabata binti kodo; hala di esun, di sinku kodo, tabata toka muraya di e kas, i e otro hala, di sinku kodo, tabata toka e hala di e otro kerubin.

¹²I hala di e otro kerubin, di sinku kodo, tabata toka muraya di e kas; i su otro hala di sinku kodo tabata pega na e hala di e prome kerubin.

¹³E halanan di e kerubinnan aki tabata midi binti kodo, i nan tabata para riba nan pia ku kara pa e sala prinsipal.

¹⁴I el a traha e velo di hilu blou, purpura, skarlata i lino fini, i el a traha kerubinnan riba dje.

¹⁵Tambe el a traha dos pilar pa e parti dilanti di e kas, trint'i sinku kodo haltu, i e kapitel riba kabes di kada un tabata sinku kodo.

¹⁶I el a traha kadenanan den e santuario paden, i a pone nan riba kabes di e pilarnan; i el a traha shen granatapel i a pone nan riba e kadenanan.

¹⁷I el a lanta e pilarnan dilanti di e tempel, un na banda drechi i e otro na banda robes, i a yama esun na banda drechi Jakin i esun na banda robes Boaz.